អាម៉េរិក​យល់ព្រម​លក់​ឧទ្ធម្ភាគចក្រ​ច្រើន​គ្រឿង​តម្លៃ​សរុប​៨០០​លាន​ដុល្លារ​ទៅ​ឱ្យ​កូរ៉េ​ខាងត្បូង​ (វីដេអូ)

1226
ចែករម្លែក

​មន្ទីរ​បញ្ច​កោណ​បាន​ប្រកាស​កាលពី​ថ្ងៃ​ពុធ​ទី​៧​សីហា​ថា រដ្ឋាភិបាល​អាម៉េរិក បាន​អនុម័ត​យល់ព្រម​លក់​ឧទ្ធម្ភាគចក្រ​ច្រើន​គ្រឿង​ដែល​មាន​តម្លៃ​សរុប​៨០០​លាន​ដុល្លារ​ទៅ​ឱ្យ​កូរ៉េ​​ខាងត្បូង ។ ការយល់ព្រម​លក់​នេះ ត្រូវបាន​ធ្វើ​ឡើង​តែ​ប៉ុន្មាន​ម៉ោង​បន្ទាប់​ពី ប្រធានាធិបតី​អាម៉េរិក លោក ដូ​ណា​ល់ ត្រាំ​បាន​និយាយថា​រដ្ឋាភិបាល​ក្រុង​សេ​អ៊ូ​ល​បាន​យល់ព្រម​​បង់ប្រាក់​បន្ថែមទៀត​សម្រាប់​វត្ត​មាន​កងទ័ព​អាម៉េរិក​នៅ​ប្រទេស​នេះ​។​

​ភ្នាក់ងារ​សហប្រតិបត្តិ​ការ​សន្តិសុខ​ការពារជាតិ​របស់​មន្ទី​រ​បញ្ច​កោណ​បាន​និយាយថា​ក្រសួង​ការបរទេស​បាន​យល់ព្រម​លក់​ឧទ្ធម្ភាគចក្រ MH-60R Seahawk ចំនួន​១២​គ្រឿង​និង​ប្រព័ន្ធ​រ៉ា​ដា ប្រព័ន្ធ​ទាក់ទង​និង​គ្រឿង​អាវុធ​ជា​ច្រើន​ទៀត​។​

​ភ្នាក់ងារ​សហប្រតិបត្តិ​ការ​សន្តិសុខ​ការពារ​ជាតិ​អាម៉េរិក​នេះ បាន​និយាយថា​ឧទ្ធម្ភាគចក្រ ទាំងនេះ បង្កើន​បេសកកម្ម​ប្រឆាំង​នាវា​និង​នាវាមុជទឹក​និង ធ្វើ​បេសកកម្ម​​ស្វែងរក​និង​ជួយសង្គ្រោះ និង​ការបញ្ជូន​ការទាក់ទង​បន្ត​។​

​ភ្នាក់ងារ​សហប្រតិបត្តិ​ការ​សន្តិសុខ​ការពារ​ជាតិ​នេះ​បាន​និយាយថា កូរ៉េខាងត្បូង​នឹង​ប្រើ​សមត្ថភាព​ដែល​ពង្រឹង​នេះ​ដើម្បី​ទប់ស្កាត់​ការគំរាមកំហែង​ក្នុង​តំបន់​និង​ពង្រឹង​ការ​​ការពារ​មាតុភូមិ​របស់​ខ្លួន ៕ដោយ៖សុខា/sn

ឧទ្ធម្ភាគចក្រ MH-60R Seahawk នៅ​លើ​នាវា​USS Blue Ridge​ដែល​ចត​នៅ​ឆកសមុទ្រ​ក្រុម៉ានីល ប្រទេស​ហ្វីលីពីន កាលពី​ខែ​មីនា​