អាល្លឺម៉ង់ បារាំង អង់គ្លេស ថ្កោលទោស​ការបាញ់​មី​ស៊ី​ល​របស់​កូរ៉េខាងជើង​

218
ចែករម្លែក

​អាល្លឺម៉ង់ បារាំង និង​អង់គ្លេស កាលពី​ថ្ងៃ​ពុធ​ទី​១៣​វិច្ឆិកា​បាន​ថ្កោលទោស​យ៉ាងខ្លាំង​ចំពោះ​ការបាញ់​មី​ស៊ី​ល​ផ្លោង​រាប់សិប​គ្រាប់​ដោយ​កូរ៉េ​ខាងជើង ចាប់តាំងពី​ខែ​ឧសភា​និង​​បាន​ជំរុញ​ឱ្យ​រដ្ឋាភិបាល​ក្រុង​ព្យុងយ៉ាង​ចូលរួម​”​ការចរចា​ប្រកបដោយ​អត្ថន័យ​”​ជាមួយ​សហរដ្ឋ​អាម៉េរិក​ស្តីពី​កម្មវិធី​នុយក្លេអ៊ែរ​និង​មី​ស៊ី​ល​របស់ខ្លួន​។​

​ប្រទេស​អ៊ឺរ៉ុប​ទាំង​៣​នេះ​បាន​និយាយថា ការបាញ់​សាកល្បង​ដែល​រួម​ទាំង​អ្វី​ដែល​ដូចជា​មី​ស៊ី​ល​រយៈ​ចម្ងាយ​មធ្យម​ដែល​បាញ់​ចេញ​ពី​ក្រោម​ទឹក​នោះ​ធ្វើឱ្យ​ប៉ះពាល​ខ្លាំង​ដល់​សន្តិ​​សុខ​ក្នុង​តំបន់​និង​រំលោភ​សេចក្តីសម្រេចចិត្ត​របស់​ក្រុមប្រឹក្សាសន្តិសុខ​អង្គការសហប្រជាជាតិ​ដែល​បាន​អនុម័ត​ជា​ឯកច្ឆន្ទ​។​

​ប្រទេស​ទាំង​៣​នេះ​បាន​ចេញ​សេចក្តីថ្លែងការណ៍​រួម​មួយ​បន្ទាប់​ពី​ឯកអគ្គរដ្ឋទូត​អាល្លឺម៉ង់ ប្រចាំ​នៅ​អង្គការសហប្រជាជាតិ លោកគ្រី​ស្តូប ហឺ​ស​ជិន បាន​ធ្វើ​សេចក្តី​សង្ខេប​​ជូន​ដល់​ក្រុមប្រឹក្សា​នេះ​ស្តីពី​ការអនុវត្ត​ទណ្ឌកម្ម​ប្រឆាំង​កូរ៉េខាងជើង​។​

​ប្រទេស​ទាំង​៣​នេះ​បាន​ជំរុញ​កូរ៉េខាងជើង​ឱ្យ​ចាត់​វិធានការ​ជាក់ស្តែង​នៅក្នុង​កិច្ច​ពិ​ចរចា​ថ្មី ជាមួយ​សហរដ្ឋ​អាម៉េរិក​ដើម្បី​បោះបង់ចោល​ទាំងស្រុង​នូ​រាល់​អាវុធ​ដ៏​ប្រល័យ និង​បំផ្លាញ​ទ្រង់ទ្រាយ​ធំ​និង​កម្មវិធី​មី​ស៊ី​ល​ផ្លោង​។​

​កូរ៉េ​ខាងជើង​បាន​បង្កើន​ការបាញ់​សាកល្បង​មី​ស៊ី​ល​របស់​ខ្លួន​នៅក្នុង​ប៉ុន្មាន​ខែ​ថ្មីៗ​នេះ​ហើយ​ក្រុម​អ្នកជំនាញ​និយាយថា​ការបាញ់​ទាំងនេះ​គឺ​ទំនង​ជា​បន្ត​ធ្វើ​ជា​មធ្យោបាយ​មួយ​​ដើម្បី​ដាក់​សម្ពាធ​លើ​រដ្ឋាភិបាល​ក្រុង​វ៉ាស៊ីនតោន​ឱ្យ​ឆ្លើយតប​ទៅនឹង​ការទាមទារ​របស់​រដ្ឋាភិបាល​ក្រុង​ព្យុងយ៉ាង​ចំពោះ​សំណើ​ថ្មី​ដើម្បី​ធ្វើឱ្យ​ប្រសើរ​ឡើង​វិញ​នូវ​កិច្ចការ​ទូត​អំពី​​ជំនួប​ចរចា​អំពី​អាវុធ​នុយក្លេអ៊ែរ​នៅ​ចុង​ខែ​ធ្នូ​នេះ​៕ ដោយ​៖​សុខា​/sn

​​លោក ដូ​ណា​ល់ ត្រាំ និង លោក គីម ជុង​អ៊ុន ស្ថិត​នៅក្នុង​ជំនួប​ចរចា​នៅ​សិង្ហ​បុរី កាលពី​ឆ្នាំ​២០១៨