អុំទូក​ថ្ងៃទី​២​ឆេះ​រោងចក្រ​ផលិត​កាបូប កា​តាប និង​អាវ​ពោង​សុវត្ថិភាព ជាង​១០​ម៉ោង​ទើប​រលត់​ជា​ស្ថាពរ​

298
ចែករម្លែក

ដោយ​: សម្បត្តិ / ភ្នំពេញ​: ពិតជា​គួរអោយ​សោកស្តាយ នៅ​ថ្ងៃទី​២ នៃ​ព្រះរាជ​ពិ​ធិ​បុណ្យអុំទូក រោងចក្រ​ចំនួន​២ ត្រូវបាន​អគ្គិភ័យ​ឆាបឆេះ​សន្ធោសន្ធៅ​។ រថយន្ត​ពន្លត់​អគ្គិភ័យ​មក​អន្តរាគមន៍​បាញ់​ពន្លត់​ជាច្រើន​គ្រឿង កាលពី​វេលា​ម៉ោង​០១​និង​៣០​នាទី រសៀល​ថ្ងៃទី​១១ ខែវិច្ឆិកា ឆ្នាំ​២០១៩ រហូតមក ដល់​ម៉ោង​០១​រំលង​អា​ធ្រា​ត្រ​ឈានចូល​ថ្ងៃទី​១២​ខែវិច្ឆិកា​ឆ្នាំ ២០១៩ ទើប​រលត់​។ ហេតុការណ៍​នេះ បានកើត​ឡើង​នៅ​ចំណុច​ក្បែ​ផ្លូវ​៥០​ម៉ែត្រ ភូមិ​អន្លង់​គង​ថ្មី សង្កាត់​ព្រៃ​ស ខណ្ឌដង្កោ​។​

​តាម​សមត្ថកិច្ច​បាន​ឲ្យ​ដឹងថា ម្ចាស់​ទីតាំង​មាន​ចំនួន​០២ /​ទី​១ ៖ មានឈ្មោះ អេស ឃ្វេ ភើ​ហ្វ​មែន​ស៍ រោងចក្រ ផលិត​កាបូប កា​តាប អាវ​ពោង​សុវត្ថិភាព និង​រោងចក្រ ផលិត ទ្រនាប់ សម្លៀក បំពាក់ បាធាយ​(​ខេ​ម​បូ​ឌា )​អ៊ិន​ដាស ស្ទ្រី អេ​ន​គ្រេជ មាន​ទីតាំង​ស្ថិត​ក្នុងភូមិ​អន្លង់​គង​ថ្មី សង្កាត់ ព្រៃ​ស ខណ្ឌដង្កោ ។ ទី​២ ម្ចាស់​ទីតាំង​មានឈ្មោះ WU MEI ភេទ​ស្រី អាយុ ៣៤​ឆ្នាំ (​ជនជាតិ​ចិនដីគោក​) មុខរបរ អ្នកគ្រប់គ្រង រោងចក្រ ស្នាក់នៅ​ទីតាំង​កើតហេតុ​ខាងលើ ។​

​សមត្ថកិច្ច​បន្តថា ក្នុង​ប្រតិបត្តិ​កាណ៍​បាញ់​ពន្លត់ អគ្គិភ័យ​នេះ កម្លាំង​សមត្ថកិច្ច​បាន​ប្រើប្រាស់​រថយន្ត​ពន្លត់​អគ្គិភ័យ​សរុប​ចំនួន​៤៤​គ្រឿង ដោយ​ប្រើប្រាស់​ទឹក​អស់​ចំនួន​២៩៧​ឡាន​។​

​សមត្ថកិច្ច​បន្ថែមទៀត​ថា ក្នុង​ហេតុការណ៍​អគ្គិភ័យ​នេះ បាន​បណ្តាល​ឲ្យ​រងគ្រោះ​មនុស្ស​ម្នាក់​មានឈ្មោះ សយ ឌី ភេទ​ប្រុស អាយុ ៣៣​ឆ្នាំ មុខរបរ​កម្មករ​រោងចក្រ​អេស​ឃ្វេ មាន​ទីលំនៅ​ភូមិ​អន្លង​គង​ថ្មី សង្កាត់ ព្រៃ​ស ខណ្ឌដង្កោ កំពុង​សម្រាក​ព្យាបាល​នៅ​មន្ទីរពេទ្យ​លោកសង្ឃ​។​

​ចំពោះ​ការខូចខាត​ទាំងពីរ​រោងចក្រ មាន​ទំហំ 100X80 ម៉ែត្រ​រោងចក្រ អេស ឃ្វេ ខូចខាត សំភារៈ​ទាំងស្រុង និង​រោងចក្រ​បាធាយ​ខូចខាត​បន្តិចបន្តួច​ប៉ុណ្ណោះ​។ ចំណែក​មូលហេតុ (​មិនទាន់​ដឹង​ច្បាស់​) សមត្ថកិច្ច​ជំនាញ​កំពុងធ្វើការ​ស្រាវជ្រាវ​បន្ត​៕ ល​