អ៊ីរ៉ង់​ព្រមាន​អាម៉េរិក​កុំអោយ​ចាប់​នាវា​ដឹក​ប្រេង​ដែល​ជី​ល​ប្រា​ល់តា​ទើប​ដោះលែង​

340
ចែករម្លែក

​អ៊ីរ៉ង់​កាលពី​ថ្ងៃ​ចន្ទ​ទី​១៩​សីហា​បាន​ព្រមាន​អាម៉េរិក​កុំអោយ​ប៉ុនប៉ង​ជា​ថ្មី​ដើម្បី​ចាប់​ឃាត់​នាវា​ដឹក​ប្រេង​អ៊ីរ៉ង់​មួយ​បន្ទាប់​ពី​វា​បាន​ចាកចេញ​ពី​ជី​ល​ប្រា​ល់តា​ដែលជា​ទឹកដី​អង់គ្លេស​​នៅ​បរទេស​។​

​នាវា​ដឹក​ប្រេង​នេះ​ត្រូវ​កង​ម៉ា​រី​ន​អង់គ្លេស​ចាប់​ទុក​កាលពី​ថ្ងៃ​០៤​កក្កដា តែ​បាន​ចេញដំណើរ​ទៅ​ក្រិច​កាលពី​ថ្ងៃ​ចន្ទ​ក្រោយ​ចាកចេញ​ពី​ជី​ល​ប្រាល់តា នៅ​ប៉ុន្មាន​ម៉ោង​ក្រោយ​ទឹក​ឋ​​ដី​អង់គ្លេស​នេះ​ច្រានចោល​សំណើ​របស់​អាម៉េរិក​អោយ​ឃាត់​វា​ទុក​បន្តទៀត​។​

​នៅពេល​ត្រូវ​បាន​សួរថា​តើ​អាម៉េរិក​អាច​ធ្វើសំណើ​ចាប់​នាវា​នេះ​ជា​ថ្មី​ដែរឬទេ​ក្រោយ​វា​ចេញពី​ជី​ល​ប្រា​ល់តា អ្នកនាំពាក្យ​ក្រសួងការបរទេស​អ៊ីរ៉ង់​បាន​និយាយ​ក្នុង​ទូរទស្សន៍​ថា «​អំ​​ពើ​ដូច្នេះ​…​នឹង​ធ្វើ​អោយ​គ្រោះថ្នាក់​សុវត្ថិភាព​ដឹកជញ្ជូន​តាម​សមុទ្រ​។​យើង​បាន​ចេញ​ការព្រមាន​តាម​បណ្តាញ​ការទូត​ហើយ ជា​ពិសេស​តាម​ស្ថានទូត​ស្វីស​»​។​

​ស្វីស​តំណាងអោយ​ផលប្រយោជន៍​អាម៉េរិកនៅ​អ៊ីរ៉ង់ ដោយសារ​តែ​អាម៉េរិក​និង​អ៊ីរ៉ង់​មិន​មាន​ទំនាក់ទំនង​ការទូត​នឹង​គ្នា​។​

​នាវា​Grace 1 ត្រូវបាន​កង​ម៉ា​រី​ន​អង់គ្លេស​ចាប់​ឃាត់​ទុក​នៅ​ជី​ល​ប្រា​ល់តា ដោយ​សង្ស័យ​ដឹក​ប្រេង​ទៅ​ស៊ី​រី ដែល​រំលោភ​ទណ្ឌកម្ម​របស់​អឺរ៉ុប​។​នាវា​ដែល​ជា​ស្នូល​នៃ​ជម្លោះ​ការទូត​មួយ​​តែ​វា​បាន​ចាកចេញ​ពី​ជិល​ប្រាល់តា ក្រោយ​តុលាការ​សំរេច​អោយ​ដោ​លែង​។​

​តុលាការ​កំពូល​កាលពី​ថ្ងៃ​ព្រហស្បតិ៍​សប្តាហ៍​មុន បានសំរេច​ដោះលែង​នាវា​នេះ ដោយ​អ៊ីរ៉ង់​បាន​បញ្ជូន​អ្នកបើក​ថ្មី​និង​ដូរ​ឈ្មោះ​ថ្មី​ថា Adrian Darya ។​តែ​កាលពី​ថ្ងៃ​សុក្រ ក្រសួង​​យុត្តិធម៌​អាម៉េរិក​បាន​ដាក់​សំណើ​សុំ​ឃាត់​វា​ទុក ដោយ​ចោទប្រកាន់​ថា​នាវា​នេះ​ជាប់​ពាក់ព័ន្ធ​ការដឹក​ជញ្ជូន​ខុសច្បាប់​ទៅកាន់​ស៊ី​រី​ដោយ​ក្រុម​ឆ្មាំ​បដិវត្តន៍​អ៊ីរ៉ង់​ដែល​អាម៉េរិក​​ចាត់ទុក​ជា​ក្រុម​ភេរ​វករ​។​

​រដ្ឋាភិបាល​ជី​ល​ប្រាល់តា បាន​ជំទាស់​នឹង​សំណើ​នេះ ដោយ​ថា​វា​មិន​បាន​សុំ​ដីកា​ពី​តុលាការ​ដើម្បី​ចាប់​ឃាត់​នាវា​ដឹក​ប្រេង ពីព្រោះ​ទណ្ឌកម្ម​របស់​អាម៉េរិក​លើ​អ៊ីរ៉ង់​មិន​ត្រូវ​អនុវត្ត​ក្នុង​​ចំណោម​ប្រទេស​ជា​សមាជិក​សហភាព​អឺរ៉ុប​ទេ​៕​ដោយ​៖​វាសនា​