អ៊ុង​សាន ស៊ូ​ជី នឹង​ទៅ​តុលាការ​អន្តរជាតិ​ដើម្បី​តតាំង​ការចោទប្រកាន់​ប្រល័យ​ពូជសាសន៍​

224
ចែករម្លែក

​លោកស្រី អ៊ុង​សាន ស៊ូ​ជី ទីប្រឹក្សា​រដ្ឋ​នៃ​ប្រទេស​មី​យ៉ាន់​ម៉ា នឹង​ត្រូវ​បង្ហាញខ្លួន​នៅ​ចំពោះមុខ​តុលាការ​យុត្តិធម៌​អន្តរជាតិ (ICJ)​ដើម្បី​តតាំង​ប្រឆាំង​ករណី​ចោទប្រកាន់​មួយ ដែល​ត្រូវបាន​ប្តឹង​ដោយ​ប្រទេស​ហ្គំ​ប៊ី​ដែល​ចោទប្រកាន់​មី​យ៉ាន់​ម៉ា​ពី​បទ​ប្រល័យពូជសាសន៍​ប្រឆាំង​ជនជាតិភាគតិច​អ៊ីស្លាម​រ៉ូ​ហ៊ីង​យ៉ា​។​នេះ​បើ​យោង​តាម​រដ្ឋាភិបាល​របស់លោក​​ស្រី​ដែល​បាន និយាយ​ដូចនេះ​កាលពី​ថ្ងៃ​ពុធ​ទី ២០​ខែវិច្ឆិកា​។​

​កាលពី​ថ្ងៃ​ព្រហស្បតិ៍​ទី​២១​វិច្ឆិកា អ្នកនាំពាក្យ​យោធា​បាន​និយាយថា ទាំង​រដ្ឋាភិបាល​ស៊ីវិល​និង​យោធា​មី​យ៉ាន់​ម៉ា នៅ​ពីក្រោយ​ការសំរេចចិត្ត​របស់​ស៊ូ​ជី ក្នុង​ការ​ទៅ​ការពារ​ប្រទេស​​របស់​លោកស្រី​ប្រឆាំងនឹង​ការចោទប្រកាន់​ពី​បទ​ប្រល័យពូជសាសន៍​នៅ​ឯ​តុលាការ​កំពូល​របស់​ស​ហ​ប្រជាជាតិ​។​

​សូម​រំលឹក​ថា ជនជាតិ​អ៊ីស្លាម​រ៉ូ​ហ៊ីង​យ៉ា​ជាង​៧៣០.០០០​នាក់​បាន​រត់​ភៀសខ្លួន​ទៅកាន់ ប្រទេស​បង់​ក្លា​ដែស​ដែល​នៅ​ជិតខាង​ចាប់តាំងពី​ការបង្ក្រាប​ដោយ​យោធា​មី​យ៉ាន់​ម៉ា​​នៅ​ឆ្នាំ ២០១៧ ដែល​ក្រុម​អ្នក​ស៊ើបអង្កេត​របស់​អង្គការសហប្រជាជាតិ​បាន​និយាយថា​ត្រូវបានធ្វើ​ដោយ​មាន​ចេតនា​ប្រល័យពូជសាសន៍ ប៉ុន្តែ​ប្រទេស​មី​យ៉ាន់​ម៉ា​បាន​បដិសេធ​​ការចោទប្រកាន់​នេះ​។​

​ប្រទេស​ហ្គំ​ប៊ី​ដែល​ជា​ប្រទេស​តូច​មួយ​នៅ​អាហ្វ្រិក​ខាងលិច បាន​ដាក់​ពាក្យបណ្តឹង​បន្ទាប់​ពី​បាន​ទទួលបាន​ការគាំទ្រ​ពី​អង្គការ​សហប្រតិបត្តិកា​រ​អ៊ីស្លាម​(OIC) ដែល​មាន​រដ្ឋ​ជា​​សមាជិក​ចំនួន​៥៧ ។ មាន​តែ​រដ្ឋ​មួយ​ប៉ុណ្ណោះ​ដែល​អាច​ដាក់​ពាក្យបណ្តឹង​ប្រឆាំង​នឹង​រដ្ឋ​មួយ​ផ្សេងទៀត​បាន​នៅ​តុលាការ​យុត្តិធម៌​អន្តរជាតិ (ICJ) ។​

​ការិយាល័យ​ក្រុមប្រឹក្សា​រដ្ឋ​របស់ លោកស្រី អ៊ុង​សាន​ស៊ូ​ជី បាន​និយាយ​នៅលើ​ហ្វេ​សប៊ុក​ថា មី​យ៉ាន់​ម៉ា​មាន​ក្រុម​មេធាវី​អន្តរជាតិ​សំខាន់ៗ​ដើម្បី​តតាំង​ប្រឆាំង​ករណី​ដែល​បាន​​ដាក់​ប្តឹង​ដោយ​ប្រទេស​ហ្គំ​ប៊ី​។​

​ការិយាល័យ​នេះ បាន​និយាយថា លោកស្រី អ៊ុង​សាន ស៊ូ​ជី ដែល​ជា​រដ្ឋមន្ត្រី​ការបរទេស​ផង​ដែរ​នេះ​នឹង​ដឹកនាំ​មន្ត្រី​មួយក្រុម​ទៅ​កាន់​ទីក្រុង​ឡាអេ ប្រទេស​ហូ​ឡង់​ដើម្បី​ការពារ​​ផលប្រយោជន៍​ជាតិ​មី​យ៉ាន់​ម៉ា​នៅ​តុលាការ​យុត្តិធម៌​អន្តរជាតិ (ICJ) ៕​ប្រែ​សម្រួល​៖​សុខា​/sn

លោកស្រី អ៊ុង​សាន ស៊ូ​ជី ស្ថិត​នៅ​កិច្ចប្រជុំ​អាស៊ាន​នៅ​ទីក្រុង​បាងកក​កាលពី​ថ្ងៃទី​៤​ខែវិច្ឆិកា​ឆ្នាំ​២០១៩