អ្នកនាំពាក្យ​៖ គជប មិនអាច​បង្កើត​ការិយាល័យ​ចុះឈ្មោះ​បោះឆ្នោត​នៅ​ព្រំដែន ឬក៏​នៅក្រៅ​ប្រទេស​នោះទេ

325

(​ភ្នំពេញ​)៖ គណៈកម្មាធិការ​ជាតិ​រៀបចំ​ការបោះឆ្នោត (​គជប​) មិនអាច​បង្កើត​ការិយាល័យ​ចុះឈ្មោះ​អ្នកបោះឆ្នោត នៅតាម​ព្រំដែន ជាប់​ប្រទេស​ថៃ ឬក៏​ទៅ​បង្កើត​ការិយាល័យ​ចុះឈ្មោះ​អ្នកបោះឆ្នោត នៅតាម​ស្ថានទូត​កម្ពុជា ប្រចាំ​ប្រទេស​នីមួយៗ​នោះទេ​។​ការ​​មិនអាច​ធ្វើដូច្នេះបាន ព្រោះតែ​មិនមាន​ច្បាប់​ចែង​។ នេះ​បើតាម​អ្នកនាំពាក្យ​គជប​។​

​លោក ហង្ស ពុទ្ធា សមាជិក និង​ជា​អ្នកនាំពាក្យ គជប បាន​លើកឡើងថា កន្លងមក មានការ​ស្នើ​ដល់​គជប​ចុះឈ្មោះ​បោះឆ្នោត​នៅ​​តាម​ព្រំដែន​កម្ពុជា​-​ថៃ និង​នៅតាម​ស្ថានទូត​កម្ពុជា នៅឯ​ក្រៅប្រទេស ជាដើម ក៏ប៉ុន្តែ​ការលើកឡើង​នេះ​មិនមាន​ច្បាប់​ណា​តម្រូវ​​ឲ្យ​គជប ធ្វើដូច្នេះបាន​ទេ​។​

​លោក ហង្ស ពុទ្ធា បាន​គូសបញ្ជាក់ថា “​ច្បាប់​តម្រូវ​ឲ្យ​គជប រៀបចំ​ការិយាល័យ​ចុះឈ្មោះ នៅក្នុង​ឃុំ​សង្កា​ត់នៃ​ព្រះរាជាណាចក្រ​កម្ពុជា ដែល​សាមីខ្លួន​ត្រូវ​បោះឆ្នោត​។ អីចឹង​បើ​សាមីខ្លួន​ត្រូវ​បោះឆ្នោត​នៅ​ខេត្តព្រៃវែង​អីចឹង​សាមីខ្លួន​ត្រូវ​ទៅ​ចុះឈ្មោះ​បោះឆ្នោត​នៅក្នុង​​ឃុំ​សង្កាត់​នៅក្នុង​ខេត្តព្រៃវែង​នោះ​។ ផ្ទុយទៅវិញ អនុសាសន៍ អាច​នឹង​ទាញ​ឲ្យ​គជប​នឹង​ទៅ​រៀបចំ​ការិយាល័យ​ចុះឈ្មោះ​បោះឆ្នោត​នៅ​តាម​ខ្សែ​ព្រំដែន​។ អីចឹង​វា​ខុស​ហើយ វា​មិនមែន​ស្ថិតនៅក្នុង​ឃុំ​សង្កាត់ ដែល​ច្បាប់​ចែងថា ស្ថិតនៅក្នុង​ឃុំ​សង្កាត់​ទេ​”​។​
​ ​
​លោក​ហង្ស​ពុទ្ធា បន្តថា “​រឿង​ទី​២ ការរៀបចំ​ឲ្យ​មាន​ការិយាល័យ​ចុះឈ្មោះ​នៅតាម​ព្រំដែន​ថៃ​។ ហេតុ​អី​ក៏​គជប​ត្រូវធ្វើ​ការរើសអើង​សម្រាប់​​អ្នក​ដែល​ទៅធ្វើ​ការ​នៅ​កូរ៉េ នៅ​ម៉ា​ឡេ​? អាហ្នឹង​ក៏​ជា​បញ្ហា​មួយ​។ បញ្ហា​មួយទៀត​ការស្នើសុំ​ឲ្យ​រៀបចំ​ការិយាល័យ​ចុះឈ្មោះ​បោះឆ្នោត​នៅ​តាម​ស្ថានទូត អាហ្នឹង​ក៏​វា​នៅតែ​ខុសច្បាប់​ដដែល​”​។​
​ ​
​ជាមួយគ្នា​នោះ លោក ហង្ស ពុទ្ធា បាន​បញ្ជាក់ថា គ​.​ជ​.​ប អនុវត្ត​ទៅតាម​តែ​ច្បាប់​ចែង​ប៉ុណ្ណោះ​។ ប្រសិនបើ​រដ្ឋសភា ធ្វើ​វិសោធនកម្ម​ច្បាប់ ត្រង់ចំណុច​ណាមួយ ឬ​ទៅតាម​សំណើរ​របស់​ភាគី​ណាមួយ​នោះ គ​.​ជ​.​ប នឹង​អនុវត្ត​ទៅតាម​ច្បាប់​នោះ​។ ដូច្នេះ​លោក​ហង្ស​ពុទ្ធា គូសបញ្ជាក់​​ថា ការចោទប្រកាន់ថា គ​.​ជ​.​ប មើលរំលង​សំណើ​នានា​នោះ ហាក់ដូចជា​មិន​សម​ហេតុផល​ច្បាប់​ទាល់តែសោះ​។​

​អត្ថាធិប្បាយ​របស់​អ្នកនាំពាក្យ​គជប​ខាងលើនេះ បានធ្វើ​ឡើង បន្ទាប់ពី​ក្រុម​អង្គការ​សង្គម​ស៊ីវិល​មួយចំនួន​ដឹកនាំ​ដោយ​អង្គការ​​ខុមហ្វ្រែល រួមទាំង​តំណាងរាស្ត្រ​គណបក្ស​សង្គ្រោះ​ជាតិ បាន​ជួបប្រជុំ កាលពី​ថ្ងៃទី​១៩ ខែកក្កដា ឆ្នាំ​២០១៧​ហើយ​បាន​លើក​អនុសាសន៍​​មួយចំនួន ស្នើ​ឲ្យ​គជប រៀបចំ​ការិយាល័យ​ចុះឈ្មោះ​អ្នកបោះឆ្នោតនៅតាម​ព្រំដែន​កម្ពុជា​-​ថៃ ដោយ​សំអាងថា ពលរដ្ឋ​ខ្មែរ​ជាង ១​លាន​នាក់ បាន​ទៅធ្វើ​ការ​នៅ​ប្រទេស​ថៃ​។ ម្យ៉ាងទៀត ក្រុម​អង្គការ​សង្គម​ស៊ីវិល និង​គណបក្ស​សង្គ្រោះ​ជាតិ ក៏បាន​ស្នើ​ដល់​គជប ឲ្យ​បង្កើត​ការិយាល័យ​ចុះឈ្មោះ​អ្នកបោះឆ្នោត នៅតាម​ស្ថានទូត​កម្ពុជា​ប្រចាំ​នៅ​ប្រទេស​ជាច្រើន​ផងដែរ​។​

លោក ហង្ស ពុទ្ធា សមាជិក និង​ជា​អ្នកនាំពាក្យ គជប

​គជប នឹង​រៀបចំ​ដំណើរ​ការធ្វើ​បច្ចុប្បន្នភាព​បញ្ជី​បោះឆ្នោត និង​ការចុះឈ្មោះ​បោះឆ្នោត ឆ្នាំ​២០១៧ ចាប់ពី​ថ្ងៃទី​១ ខែកញ្ញា ឆ្នាំ​២០១៧ ដល់​ថ្ងៃទី​៩ ខែវិច្ឆិកា ឆ្នាំ​២០១៧​។ ការធ្វើ​បច្ចុប្បន្នភាព​បញ្ជី​បោះឆ្នោត និង​ការចុះឈ្មោះ​បោះឆ្នោត នឹងធ្វើ​ឡើង​នៅតាម​ឃុំ​សង្កាត់​។​​បញ្ជី​បោះឆ្នោត​ឆ្នាំ​២០១៧ នឹងត្រូវ​ផ្តល់​សុពលភាព និង​ប្រកាស​ផ្សាយ​បញ្ជី​បោះឆ្នោត​ផ្លូវការ​ដោយ​គជប នា​ថ្ងៃទី​២៤ ខែមករា ឆ្នាំ​២០១៨ ជា​ថ្ងៃ​ចុងក្រោយ​។ បញ្ជី​បោះឆ្នោត​នេះ សម្រាប់​ប្រើប្រាស់​ក្នុងការ​បោះឆ្នោត​ជ្រើសតាំង​តំណាងរាស្ត្រ អាណត្តិ​ទី​៦ នៅ​ខែកក្កដា ឆ្នាំ​២០១៨៕ដោយ​៖ ម៉េង​ឆៃ​