អ្នក​ចិញ្ចឹម​គោក្របី​បច្ចុប្បន្ន​ភាគច្រើន​សម្រាប់​លក់​ឱ្យ​ឈ្មួញ​

1533
ចែករម្លែក
  • 5
    Shares

​ដោយ​: បូកគោ / កំពត​: ការចិញ្ចឹម​គោក្របី​របស់​ប្រជាកសិករ នាពេល​បច្ចុប្បន្ន មិនមែន​គោលដៅ ដើម្បី​ប្រើប្រាស់​ជា​កម្លាំង​អូសទាញ​នោះទេ ពោលគឺ​មួយ​ភាគ​ធំ​នៃ​ពពួកសត្វ​នេះ សម្រាប់​លក់​ឱ្យ​ឈ្មួញ​កាប់សាច់​ផ្គត់ផ្គង់​នៅលើ​ទីផ្សារ តាម​តម្រូវការ​នៃ​ម្ហូបអាហារ​ប្រចាំថ្ងៃ​ប៉ុណ្ណោះ​។​

​ក្នុង​វ័យ​៥៣​ឆ្នាំ កសិករ​សឿង មិត្ត រស់នៅ​ភូមិ​ព្រែក​ក្រែង ឃុំ​ព្រែក​ត្នោត ស្រុក​ទឹកឈូ ខេត្តកំពត​បាន រៀបរាប់ថា​ជាង​១០​ឆ្នាំ​មកហើយ គ្រួសារ​គាត់​តែងតែ​ចិញ្ចឹមសត្វ​ក្របី​ជាប្រចាំ​មិនដែល​អាក់ខាន​ឡើយ ហើយ​មាន​ចំនួន​ច្រើន​ទៀតផង​។ ប៉ុន្តែ​ឥឡូវនេះ​នៅតែ​បួន​ក្បាល​ប៉ុណ្ណោះ ព្រោះ​បាន​លក់​ចេញ​ជា​បន្តបន្ទាប់​។ កសិករ​ដដែល​បាន​នេះ​បញ្ជាក់ថា​ពីមុន​ការចិញ្ចឹម​ក្របី​សម្រាប់​ភ្ជួរ​រាស់​ក្នុង​កិច្ចការងារ​ធ្វើស្រែ​។ ប៉ុន្តែ​ពីរ​បី​ឆ្នាំ​ចុងក្រោយ គាត់​ឈប់​ប្រើក្របី​ជា​កម្លាំង​អូសទាញ​ទៀតហើយ​គឺ​ជួល​ឱ្យគេ​ភ្ជួរ​រាស់​ដោយ​គ្រឿងយន្ត​ព្រោះ​មាន​ភាព​ចំណេញ​ច្រើនជាង​។​

​រៀបរាប់​ស្រដៀង​គ្នា​នេះដែរ លោក ធុង ខឿន មេភូមិ​ព្រែក​ក្រែង​បាន​បញ្ជាក់ថា គ្រួសារ​លោក​មាន​ទាំង គោ​មាន​ទាំង​ក្របី ហើយ​សុទ្ធតែ​ពេញកម្លាំង​ប្រើប្រាស់​។ ប៉ុន្តែ​រាល់ពេល​ធ្វើស្រែ​ចម្ការ លោក​តែងតែ​ជួល​គោយន្ត​ឱ្យគេ​មក​ភ្ជួរ ដែល​អាច​បញ្ចៀស​បាន​ពី​ការ​ហត់នឿយ​ទាំង​សត្វ​ទាំង​ម្ចាស់ ហើយ​យក​ពេលវេលា​ធ្វើ​កិច្ចការងារ​ផ្សេង​វិញ​។
​លោក​មេភូមិ​បាន​បន្តថា ការចិញ្ចឹម​គោក្របី​គ្រប់ៗ គ្រួសារ​នាពេល​បច្ចុប្បន្ន គឺ​រង់ចាំ​ឈ្មួញ​មក​ទិញ​យកទៅ​កាប់សាច់​លក់​។ មានតែ​ប្រហែល​២០​ភាគរយ​ប៉ុណ្ណោះ ក្នុងចំណោម​គោក្របី​ទាំងអស់​ដែល​ម្ចាស់​នៅ​បន្ត​ប្រើប្រាស់​សម្រាប់​ជា​កម្លាំង​អូសទាញ លើ​ការងារ​ស្រែចម្ការ និង​ដឹកជញ្ជូន​ផ្សេងៗ​។ លោក​ធុង ខឿន​បាន​ប្រាប់​ឱ្យដឹងទៀតថា មកដល់​ឆ្នាំនេះ ក្នុងភូមិ​ព្រែក​ក្រែង ឃុំ​ព្រែក​ត្នោត​មាន​ពលរដ្ឋ​ចំនួន​៣៩៣​គ្រួសារ ដែលមាន​គោ​៥២​ក្បាល និង​ក្របី​២៤​ក្បាល​។​

​លោក​ម៉េង សន្តិភាព ប្រធានការិយាល័យ​ផលិតកម្ម និង​បសុព្យាបាល នៃ​មន្ទីរ​កសិកម្ម​បានបញ្ជាក់​ឱ្យដឹងថា ក្នុង​មួយខែៗ ក្រៅពី​សត្វ​ជ្រូក​សត្តឃាតដ្ឋាន​ប្រាំ​កន្លែង​ទូទាំង​ខេត្តកំពត ត្រូវការ​គោក្របី​ប្រមាណ​២៧០​ក្បាល សម្រាប់​កាប់យ​កសាច់​លក់​នៅលើ​ទីផ្សារ ដើម្បី​បំពេញតម្រូវការ​អ្នក​បរិភោគ​គ្រប់​ស្រទាប់វណ្ណៈ​។​

​លោក ចាន់ រិ​ទ្ធិ ប្រធាន​មន្ទីរ​កសិកម្ម រុក្ខាប្រមាញ់ និង​នេសាទ​ខេត្តកំពត បាន​ប្រាប់​ឱ្យដឹងថា តាម​ការធ្វើជំរឿន​ថ្មីៗ ក្នុង​ឆ្នាំ​២០១៨ នេះ នៅ​ទូទាំង​ខេត្ត​មាន​គោ​ចំនួន​១៧២.៩៨៨​ក្បាល និង​ក្របី​១០.៣៧៣​ក្បាល​៕