អ្នក​ដើរចេញ​ចុងក្រោយ នៃ​ជុំ​ទី​១

331
ចែករម្លែក

ដោយ​៖ រ៉ូ​ហ្សា /
​ភ្នំពេញ​៖
ព្រឹត្តិការណ៍ TV5 Boxing Knock-Out Serie by K-Cement នា​យប់​ថ្ងៃទី​៧ កញ្ញា បានបញ្ចប់​ការប្រកួត​ជម្រុះ​ជុំ​ទី​១ ហើយ ។ អ្នក​ប្រដាល់ ចំនួន ៣២ រូប មកពី ៣២ សមាគម ក្លិប ដែល​ចូលរួម​ប្រកួត​ជម្រុះ​នោះ ពេលនេះ នៅសល់ ១៦ រូប ដើម្បី​បន្ត​ប្រកួត​ជម្រុះ នៅ​ជុំ​ទី​២ ទៀត ។ ជុំ​ទី​២ នេះ ក្នុងចំណោម​ជើង​ខ្លាំង ទាំង ១៦ រូប នឹងត្រូវ​ជម្រុះ​យក ៨ រូប ដើម្បី​ប្រកួត​ជម្រុះ​នៅ​ជុំ​ទី​៣ បន្តទៀត ។​

ទិដ្ឋភាព​ប្រកួត​

​ក្នុងការ​ប្រកួត​ជម្រុះ បញ្ចប់​ជុំ​ទី​១ នា​យប់​ថ្ងៃទី​៧ កញ្ញា អ្នក​ប្រដាល់​ជើងចាស់ ទិ​ត្យ សុវណ្ណ​គី​រី របស់​សមាគម​ប្រដាល់​ក្រសួងកសិកម្ម បាន​ប្រើ​កែង ផ្ដួល​អ្នក​ប្រដាល់​ជើង​ថ្មី ពិល រ័ត្ន មកពី​ក្លិប​ពន្លឺ​សាមគ្គី ខេត្តបាត់ដំបង ឲ្យ​សន្លប់​នៅ​ទឹក​ទី​២​។ សុវណ្ណ​គី​រី ទោះបី​គេ បោះបង់ចោល​ការប្រកួត យូរហើយ ក៏ពិតមែន តែ​គេ​នៅ​វ៉ៃ​បានល្អ រហ័ស និង​ក្លាហាន ក្នុងការ​វាយលុក ។ ស្ថានភាព​នៃ​ការប្រកួត គេ​មានប្រៀប​លើ​គូប្រកួត​របស់ខ្លួន តាំងពីដើម​ទឹក​ទី​១ មកម្ល៉េះ តែ​នៅ​ទឹក​​ទី​២ គេ​មានឱកាស​បញ្ចេញ​មួយ​កែង បាន​យ៉ាង​ល្អ ធ្វើ​ឲ្យ ពិល រ័ត្ន សន្លប់​ក្រោក​លែងរួច ។ ពិល រ័ត្ន ខ្ទាត​ចេញពី​ការប្រកួត រីឯ សុវណ្ណ​គី​រី កក់​កៅអី សម្រាប់​ប្រកួត នៅ​ជុំ​ទី​២​ទៀត ។​

​ប្រកួត​ក្នុង​ព្រឹត្តិការណ៍​នេះដែរ អ្នក​ប្រដាល់ ទូច ដេវីដ ក្លិប​អា​រុណ​រះ​កីឡា បាន​ផ្ដួល​អ្នក​ប្រដាល់ កុយ ចាន់តូ ក្លិប​គី​សែ​មាន​រិ​ទ្ធ ឲ្យ​សន្លប់​មុន​ស្នូរ​ជួង បញ្ចប់​ទឹក​ទី​១ ។ ទោះបី កុយ ចាន់តូ ស្គាល់​សង្វៀន​ប្រដាល់ មុន​ដេវីដ ក៏ពិតមែន តែ​ដេវីដ ជា​អ្នក​ប្រដាល់ ដែលមាន​កណ្ដាប់ដៃ​រហ័ស និង​ធ្ងន់​នោះ គេ​បាន​ដាល់​ចំក្បាល​ពោះ ចាន់តូ ធ្វើ​ឲ្យ​អ្នក​ប្រដាល់​រូបនេះ ដួលសន្លប់ ក្រោក​លែងរួច​តែម្ដង ។ ចាន់តូ ខ្ទាត​ចេញពី​ការប្រកួត ត្រឹមនេះ ចំពោះ ទូច ដេវីដ រង់ចាំ​ប្រកួត​បន្ត នៅ​ជុំ​ទី​២ ទៀត​។​

ទិដ្ឋភាព​ប្រកួត​

​ការប្រកួត​ជា​មិត្តភាព ជាមួយ​អ្នក​ប្រដាល់​ថៃ វិញ​នោះ អ្នក​ប្រដាល់​កម្ពុជា សួន ចាន់នី ដែល​គេ​ស្គាល់​ជាទូទៅ​ថា សូត្រ ប៊ុន​ធី ក្លិប​បក្សី​ស្លាប​ដែក បាន​ផ្ដួល​អ្នក​ប្រដាល់​ថៃ ភេ​ច ង៉ា​ម (Phich Ngam) ឲ្យ​សន្លប់​នៅ​ទឹក​ទី​២ ។ សូមបញ្ជាក់ថា ភេ​ច ង៉ា​ម ជា​អ្នក​ប្រដាល់​ជើង​ខ្លាំង មួយរូប ដែល​ធ្លាប់​ស្ពាយ​ខ្សែក្រវាត់ ពី​ស្រុក​ខ្មែរ ទៅ​ស្រុកថៃ បាន​មួយ តែ​គេ​មក​លើក​នេះ ហាក់ដូចជា​វ៉ៃ មិនបាន​ល្អ​ឡើយ ។​

​ចំពោះ​គូប្រកួត ក្រៅ​ព្រឹត្តិការណ៍​ពានរង្វាន់ រវាង​អ្នក​ប្រដាល់​រួម​ជាតិ​វិញ​នោះ អ្នក​ប្រដាល់ ធី​ម ទាន់ ក្លិប​ខេត្ត​រតនគីរី ផ្ដួល​អ្នក​ប្រដាល់​ជើងចាស់ ឃឹម ពេជ្រ​ចិន្ដា ក្លិប​កុលបុត្រ​គុន​ខ្មែរ ឲ្យ​បង្ខំចិត្ត​បោះបង់ ចោលការ​ប្រកួត មុន​ស្នូរ​ជួង​បញ្ចប់​ទឹក​ទី​២ ៕v