អ្នក​ផលិត​ក្អម​ព្រួយបារម្ភ​សម្រាប់​អនាគត​នូវ​ការខ្វះ​អ្នក​បន្តវេន​

869

(​កំពត​): អ្នកភូមិ​ដំណាក់​ចំបក់ ឃុំ​សំរោង​លើ ស្រុក​បន្ទាយមាស ខេត្តកំពត​ស្ថិតក្នុង​វ័យ​ចំណាស់ៗ បាន​សម្តែង​នូវ​ក្តី​ភ័យព្រួយ​ពី​ការបាត់បង់​ចំណេះ​ជំនាញ​ផលិត​ក្អម​ដែល​បន្សល់ទុក​ពី​បរម​បុរាណ​ព្រោះតែ យុវវ័យ​ជំនាន់​នេះ​មិន​ចាប់អារម្មណ៍ ដោយ​ស្រវា​យក​ការងារ​ផ្សេង​វិញ​នោះ​។​

​ស្ត្រី​ឈ្មោះ​នាក់ ស្រី អាយុ ៥៦​ឆ្នាំ រស់នៅ​ភូមិ​ដំណាក់​ចំបក់ ឃុំ​សំរោង​លើ ស្រុក​បន្ទាយមាស ខេត្តកំពត បាន​រៀបរាប់ថា តាំងពី​បរម​បុរាណ​តរៀងមក ក្នុងភូមិ​នេះ​មិនមាន​ផ្ទះ​ណាមួយ​ដែល​មិន​ធ្វើ​ក្អម​ដី​លក់ នោះទេ​។ ប៉ុន្តែ​សព្វថ្ងៃ​នៅ​មិន​ដល់​៥០​ផ្ទះ​ផង ហើយ​អ្នក​កំពុង​ធ្វើ​សុទ្ធតែ​មនុស្ស​វ័យ​ចំណាស់ៗ​ទៀតផង​។ ដោយសារ​ការងារ​សម្បូ​រ ក្មេងៗ​ពេញកម្លាំង​គេ​មិន​ខ្វល់​ទេ ខ្លះ​នាំគ្នា​ចាក​ចេញពី​ភូមិ​ស្រុក ដោយ​មិនបាន​ចាប់អារម្មណ៍​រឿង​ធ្វើ​ក្អម​ដូច​អ្នក​ជំនាន់​មុន​សោះ​។​

​ស្ត្រី​ដដែល​សម្តែង​ការព្រួយបារម្ភ​ថា នៅ​ថ្ងៃក្រោយ​អស់ពី​ចាស់ៗ​ទៅ​ប្រហែលជា​ចំណេះ​ជំនាញ​នេះ​ត្រូវ​បាត់​បង់ហើយ​។ ពាក់ព័ន្ធ​ដំណើរការ​ផលិត​ក្អម ស្ត្រី​រូបនេះ​បាន​រៀបរាប់ថា ក្អម​មិនមែន​ដី​ណា​ក៏​អាច​ធ្វើបាន​នោះទេ ពោលគឺ​លុះត្រាតែ​ជា​ប្រភេទ​ដី​បាត​ភ្នំ​។ តាំងពីដើម​រហូតដល់​សព្វថ្ងៃ អ្នកភូមិ​នាំគ្នា​ទៅ​ជីក​កាយ​ពី​ជើងភ្នំ​សែន​ហាន​ក្នុង​ជម្រៅ​ប្រមាណ​ពី​ប្រាំ​ទៅ​ប្រាំមួយ​ម៉ែត្រ​។ ដំបូង​ឡើយ ត្រូវយក​ដី​នោះមក​បុក​ឱ្យ​ម៉ដ្ត​ហុយ​ដូច​ធូលី ទើប​ចាក់ទឹក​លាយ​ច្របាច់​រហូត​សាច់​ទន់​អាច​ចាប់ធ្វើ​ចេញ​ជា​រាង​បាន​។ បន្ទាប់​ពីនេះ ត្រូវ​ហាលថ្ងៃ​ឱ្យ​រឹង​ស្ងួត​មុននឹង​យកទៅ​ដុត ដើម្បី​បញ្ចៀស​ពី​ការផ្ទុះ​ខាតបង់​។​

​ស្ត្រី​រូបនេះ​បញ្ជាក់ថា បើសិន​មិនមាន​ការរំខាន​ដោយ​ការមើល​ចៅ​ទេនោះ ក្នុង​មួយថ្ងៃ​គាត់​អាច​ធ្វើបាន​ចន្លោះ​ពី​២០​ទៅ​៣០​ក្អម ដែល​ក្អម​មួយ​លក់បាន​តម្លៃ​៨.០០០​រៀល ហើយ​គេ​មក​ទិញ​ដល់ផ្ទះ​តែម្តង​។​

​លោក ហ៊ុន ម៉ាន់ មេឃុំ​សំរោង​លើ​បាន​រៀបរាប់ថា ពីមុន​គេ​ហៅ​ក្រៅ​ភូមិ​ដំណាក់​ចំបក់​នោះ​ថា​ជា ភូមិ​ក្អម​ព្រោះ​ស្ទើរតែ​មួយរយ​ភាគរយ​នៃ​គ្រួសារ​ទាំងអស់​នាំគ្នា​ធ្វើ​ក្អម​ដី​លក់​។ ប៉ុន្តែ​បច្ចុប្បន្ន ក្នុងចំណោម ពលរដ្ឋ​ជិត​៤០០​គ្រួសារ នៅតែ​ជាង​៣០​គ្រួសារ​ប៉ុណ្ណោះ​បន្ត​រក្សា​មុខរបរ​ពី​បរម​បុរាណ​នេះ​។​

​លោក​មេឃុំ បញ្ជាក់ថា ការពិត​ចំណូល​បានមកពី​ការធ្វើ​ក្អម​សមល្មម​នឹង​កម្លាំង​ពលកម្ម​ដែរ តែ​អាច​ជួប​ការលំបាក​លើ​បញ្ហា​រក​អុស ចំបើង​មក​ដុត និង​ខ្វះ​កម្លាំង​ក្នុងការ​ជីក​កាយ​ដី​បាត​ភ្នំ​នោះ​។ ម្យ៉ាងទៀត ឮថា​ដី​ទ្រព្យសម្បត្តិ​របស់​រដ្ឋ​ស្ថិតក្នុង​ភូមិសាស្ត្រ​ស្រុក​អង្គរជ័យ​ដែល​ពួកគាត់​តែង​យកមកប្រើ​ប្រាស់​តាំងពី​បុរាណកាល​មក ត្រូវបាន​គេ​ហ៊ុមព័ទ្ធ​ប៉ុនប៉ង​កាន់កាប់​ជា​កម្មសិទ្ធិ​ផងដែរ​។ លោក​មេឃុំ​បាន​បញ្ជាក់ថា មួយផ្នែក​ទៀត ការ ដាំ​ដុះ​ដំណាំ​រយៈពេល​ខ្លី ដូចជា​ពោត ល្ហុង និង​បន្លែ​ផ្សេងៗ​អាច​រកចំណូលបាន​ច្រើនជាង​ទើប​នាំគ្នា​ផ្លាស់ ប្តូរ​មុខរបរ​ចាស់​ចោល​៕L ដោយ​: បូកគោ​