អ្វី​ទៅជា​បាតុភូត​រលក​យក្ស​បង្កដោយ​ព្យុះ និង​ហេតុអ្វី​បានជា​វា​មាន​គ្រោះថ្នាក់​ខ្លាំង​?

767
ចែករម្លែក

​ខ្យល់ព្យុះ​ស៊ីក្លូន​ដ៏​ខ្លាំងក្លា​ឈ្មោះថា ហ្វា​នី (Fani) ដែល​បក់បោក​មកលើ​ដី​គោក​កាលពី​ថ្ងៃ​សុក្រ​ទី ៣ ឧសភា​នៅ​ប្រទេស​ឥណ្ឌា ត្រូវគេ​រំពឹងថា​នឹងដាក់​ការគំរាមកំហែង​ដ៏​សាហាវ​មួយទៀត ដែល​គេ​ហៅថា បាតុភូត​រលក​យក្ស​បង្កដោយ​ព្យុះ​។​

​បាតុភូត​របៀបនេះ​កើតឡើង​នៅពេល​កម្រិត​ទឹកសមុទ្រ​កើនឡើង​យ៉ាងខ្លាំង​ក្នុងអំឡុងពេល​ខ្យល់ព្យុះ ដោយ​បញ្ជូន​រលក​ធំៗ​ដ៏​បំផ្លិចបំផ្លាញ​បោកបក់​មកលើ​មនុស្ស​និង​ផ្ទះសម្បែង​នៅលើ​ដីគោក​។​

​ខាងក្រោម​នេះ​គឺជា​សំណួរ​និង​ចម្លើយ​សំខាន់ៗ​អំពី​បាតុភូត​នេះ ៖

  • តើ​បាតុភូត​នេះ​ដំណើរការ​យ៉ាងដូចម្តេច​?

​បាតុភូត​រលក​យក្ស​បង្កដោយ​ព្យុះ​មិនមែនជា​លទ្ធផល​នៃ​ទឹកភ្លៀង​ឬ​ទឹកជំនន់​ទេ តែ​វា​កើតឡើង​នៅពេលដែល​ខ្យល់​ដ៏​ខ្លាំងក្លា​រុញ​ទឹកសមុទ្រ​ឆ្ពោះ​មក​ដីគោក​។​

​បាតុភូត​នេះ គឺជា “​ការកើនឡើង​មិនធម្មតា​នៃ​ទឹកសមុទ្រ​ដែល​បង្កឡើង​ដោយ​ខ្យល់ព្យុះ និង​ជំនោរ​កើនឡើង​ខ្ពស់​ហួស​ពី​ការព្យាករណ៍​”​។ នេះ​បើ​យោងតាម​រដ្ឋបាល​មហាសមុទ្រ​និង​បរិយាកាស​ជាតិ​របស់​អាមេរិក (NOAA)​។​

​អ្នក​ព្យាករណ៍​នៅ​ឥណ្ឌា​និយាយថា ការកើនឡើង​កម្ពស់​ទឹកសមុទ្រ ១,៥ ម៉ែត្រ​អាច​នឹង​វាយប្រហារ​រដ្ឋ​អូ​ឌី​សា ភាគ​ខាងកើត កន្លែង​ដែល​ព្យុះសង្ឃរា​នេះ​ត្រូវបាន​ព្យាករណ៍​ថា​នឹង​បោកបក់​មកលើ​ដីគោក​។​

  • ហេតុអ្វី​បានជា​វា​មាន​គ្រោះថ្នាក់​?

​នៅក្នុង​ព្យុះ​ពីមុនៗ មនុស្ស​មិនបាន​ចាប់អារម្មណ៍​ភៀសខ្លួន​ទេ ពីព្រោះ​ពួកគេ​មិនដឹង​អំពី​ការគំរាមកំហែង​ដ៏​គ្រោះថ្នាក់​នេះ​។​

​ជាក់ស្តែង គឺ​ករណី​ព្យុះ​ទី​ហ្វុ​ង​ហៃ​យ៉ាន​ឆ្នាំ ២០១៣ ដែល​បានសម្លាប់​មនុស្ស ៧.៣៥០ នាក់ នៅ​កណ្តាល​ប្រទេស​ហ្វីលីពីន ដោយសារតែ​ការកើនឡើង​ទឹកសមុទ្រ​។​

​រលក​សមុទ្រ​កម្ពស់​ប្រមាណ ៧,៥ ម៉ែត្រ​បាន​បោកបក់​មកលើ​ទីក្រុង​តាម​ឆ្នេរសមុទ្រ​ដូចជា​ទីក្រុង​តា​ក្លូ​បាន់ ដែលមាន​ប្រជាជន ២៤០.០០០ នាក់​។​

​លើសពីនេះទៅទៀត រលក​ទឹកសមុទ្រ​អាច​ហូរ​ចូល​ដីគោក​បាន​ចម្ងាយ​រាប់សិប​គីឡូម៉ែត្រ ដោយ​ពន្លិច​អគារ​និង​កាត់ផ្តាច់​ផ្លូវថ្នល់​យ៉ាង​រហ័ស​។ មនុស្ស​អាច​នឹង​លង់ទឹក​ស្លាប់​នៅក្នុង​រថយន្ត​ឬ​ផ្ទះ​របស់​ពួកគេ​។​

​រលក​ធំៗ​អាច​នឹង​ចាប់ផ្តើម​កើតឡើង​មុនពេល​ខ្យល់ព្យុះ​បក់បោក​មកលើ​ដីគោក​ទៅទៀត ដោយ​ធ្វើឱ្យមាន​ការលំបាក​ក្នុងការ​បញ្ចេញ​សំឡេង​ប្រកាសអាសន្ន​ឱ្យទាន់​ពេលវេលា​ដើម្បី​សង្គ្រោះ​ជីវិត​មនុស្ស​៕ ដោយ៖ កញ្ញាដាលីស

បាតុភូត​រលក​យក្ស​បង្កដោយ​ព្យុះ អាច​នឹង​កើតឡើង រាល់ពេល​មាន​ព្យុះសង្ឃរា​ធំៗ​ម្តងៗ