ឧ​ត្ត​ម​សេនីយ៍​ឯក ហ៊ុន ម៉ា​ណែ​តៈ អ្នកនយោបាយ​ខ្លះ​ដើម្បី​តែ​អំណាច​បំផុស​មហាជន​ឱ្យធ្វើ​បាតុកម្ម​ផ្តួលរំលំ​រដ្ឋាភិបាល​

350

(​ភ្នំពេញ​)៖ លោក​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត បាន​ថ្លែង​ទៅកាន់​កងទ័ព​ថា អ្នកនយោបាយ​មួយចំនួន ដើម្បី​តែ​អំណាច​និង​ផល​ប្រ​​យោជន៍​នយោបាយ បាន​ខិតខំ​បំផុសបំផុល​មហាជន​ឱ្យធ្វើ​បាតុកម្ម​ផ្តួលរំលំ​រដ្ឋាភិបាល​។ សួរ​ដើម្បី​អ្វី​?​គឺ​មិនមែន​ដើម្បី​លទ្ធិ​ប្រជា​ធិ​ប​​តេ​យ្យ​នោះទេ គឺ​ដើម្បី​អំណាច​ផ្ទាល់ខ្លួន ដើម្បី​ច​ចារ​យក​កូតា​សភា ដែល​ម​ហិ​ច្ច​តា​នេះ ពួកគេ​មាន​ផែនការ​២០​ឆ្នាំ​ហើយ​ដើម្បី​ផ្តួលរំលំ​​រដ្ឋាភិបាល​តាមរបៀប​ប្រទេស​យូ​ហ្គោ​ស្ល​វី​។

​លោក​បាន​បញ្ជាក់ទៀតថា អ្នកនយោបាយ​ទាំងនោះ បាន​ប្រើ​យុទ្ធសាស្ត្រ​ធ្វើឱ្យ​កងកម្លាំងប្រដាប់អាវុធ​បោះ​ឱ្យគេ ទម្លាក់​រដ្ឋាភិបាល ដែល​គោលដៅ​របស់គេ គឺ​ឱ្យ​កងទ័ព​ភ្លេច​អស់​នូវ​គោលដៅ​ធំ​គឺ​សុខសន្តិភាព ដោយ​គេ​មិនបាន​គិតពី​សុខសន្តិភាព​នោះទេ​ព្រោះ​​គេ​មិនបាន​ចូលរួម​ធ្វើ​នោះទេ​។​
​ ​
​ការ​ថ្លែង​របស់លោក​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត នៅក្នុង​ពិធី​បើក​វគ្គ​ហ្វឹកហ្វឺន​ជំនាញ​ឆ័​ត្រ​យោង​ជំនា​ន់ទី​២៣ បិទ​វគ្គ​បំប៉ន​ជំនាញ​បើក ជួសជុល​អូ​ប៊័រ និង​របៀប​សង្គ្រោះ​ជំនា​ន់ទី​២ នៅ​កងពលតូច​ទ័ព​ពិសេស​ឆត្រយោង​៩១១ កាលពី​ថ្ងៃទី​១០ ខែវិច្ឆិកា ឆ្នាំ​២០១៧​។​

​លោក​បាន​បន្តទៀតថា ក្នុង​កាលៈទេសៈ​សុខសន្តិភាព អង្គភាព​ទ័ព​បាន​ដើរតួនាទី​យ៉ាងសំខាន់​ក្នុង​ការជួយ​ពង្រឹង​ដល់​កងយោធពល​ខេមរៈភូមិន្ទ គឺ​ពង្រឹង​ខ្លួនឯង និង​ធ្វើជា​អង្គភាព​ទ័ព​មួយ​មានការ​ទទួលខុសត្រូវ និង​មាន​សមត្ថភាព​ខ្ពស់​ព្រោះ​កងទ័ព​ហ្វឹកហ្វឺន​ជាប់​ជាប្រចាំ​គឺជា​គោលដៅ​សំខាន់​របស់​កងយោធពល​ខេមរៈភូមិន្ទ​គឺ​ហ្វឹកហ្វឺន​ដើម្បី​យក​ភាពជោគជ័យ​ជូន​ជាតិ​។ ពាក្យ​សន្តិភាព គឺជា​ពាក្យ​ដែលមាន​អត្ថន័យ​ណាស់ អ្នក​ដែល​មិន​ធ្លាប់​ឆ្លងកាត់​សង្គ្រាម​ប្រហែលជា​ភ្លេច និង​មិនទាន់​យល់​ពី​ន័យ នៃ​សុខសន្តិភាព​នោះទេ​។ ប៉ុន្តែ​អ្នក​ធ្លាប់​ឆ្លងកាត់ សង្គ្រាម​ពិតជា​យល់ច្បាស់​ពី​តម្លៃ​នៃ​សុខសន្តិភាព​។ ដើម្បី​យល់​ន័យ​ពី​សង្គ្រាម ពី​សុខសន្តិភាព​គឺ​យក​ល្អ​មើលថា តើ​សង្គ្រាម​បានផ្តល់​ផល​លំបាក​អ្វីខ្លះ​? ធ្វើឱ្យប៉ះពាល់​អាយុជីវិត ប៉ះពាល់​ដល់​គ្រួសារ​យើង​យ៉ាងម៉េច​? តើ​គ្រួសារ​យោធិន​ពលី​រង​ការលំបាក​យ៉ាងម៉េច​? ប្រជាពលរដ្ឋ​និង​នាយទាហាន​ដែល​បាន​ស្លាប់​និង​ពលី​ជីវិត​យ៉ាងម៉េច​? បើ​យើង​យល់​ពី​ឥទ្ធិពល​អាក្រក់​ពី​សង្គ្រាម បាន​យើង​យល់​ពី​តម្លៃ​នៃ​សុខសន្តិភាព​។ សុខសន្តិភាព​មិនបាន​ធ្វើឱ្យ​មនុស្ស​ក្លាយខ្លួនជា​ជនពិការ មិនឱ្យ​ខ្មែរ​សម្លាប់​ខ្មែរ មិនឱ្យ​កូន​ក្លាយជា​កូនកព្រា មិនឱ្យ​ម្តាយ​ក្លាយជា​ស្ត្រី​មេម៉ាយ​។​

​លោក​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត បាន​អះអាងថា កងទ័ព​មិន​ខ្លាច​ប្រយុទ្ធ​ទេ ប៉ុន្តែ​ប្រយុទ្ធ​ត្រូវមាន​បុព្វហេតុ​ច្បាស់លាស់​ដើម្បី​ការពារ​ទឹកដី ដើម្បី​ការពារ​សុខសន្តិភាព​មិន​ឱ្យ​យ​ត្រឡប់​ទៅ​ឱកាស​ដើម​វិញ គឺ​ធ្វើឱ្យ​ខ្មែរ​រួបរួមគ្នា មិនឱ្យ​ខ្មែរ​បែកបាក់ មិនឱ្យ​កូនចៅ​យើង​ព្រាត់ប្រាស់ ការពារ​សុខសន្តិភាព ការពារ​បូរណភាព​ទឹកដី ព្រោះ​ថាបើ​ខ្មែរ​បែកបាក់​គេ​មើលងាយ​ហើយ ព្រោះ​គ្មាន​នរណា​ស្រលាញ់​ខ្មែរ​ជាង​ខ្មែរ​ទេ ហើយ​កុំ​គិតថា​បរទេស​មកពី​លោកខាងលិច​សុទ្ធតែ​ល្អ​ទាំងអស់នោះ​។​

​ជាមួយគ្នានេះ លោក​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត ក៏បាន​អរគុណ​ដល់​កម្លាំងប្រដាប់អាវុធ​ដែលមាន​ជំហរ​ច្បាស់លាស់ ការប្តេជ្ញាចិត្ត នៅក្នុង​ការគោរព​និង​ការពារ​រដ្ឋធម្មនុញ្ញ ការពារ​រដ្ឋាភិបាល​ស្របច្បាប់​ដែល​ទាំងអស់នេះ គឺ​ដើម្បី​ការពារ​សុខសន្តិភាព និង​ប្រជាជន ហើយ​ការការពារ​នេះ​មិនមែន​សម្រាប់តែ​រដ្ឋាភិបាល​នោះទេ គឺ​ការពារ​សម្រាប់​យើងទាំងអស់គ្នា​។​

​លោក​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត បាន​បញ្ជាក់ថា រដ្ឋាភិបាល​បាន​យក​ចិ​ត្ក​ទុកដាក់​ចំពោះ​កងកម្លាំងប្រដាប់អាវុធ​ទាំង​កម្រិតជីវភាព​និង​កិត្តិយស​។ ផ្ទុយទៅវិញ​គណបក្សប្រឆាំង​មិនដែល​គិតថា​ជា​កម្លាំង​របស់​ជាតិ​ទេ គេ​គិតថា​កម្លាំងប្រដាប់អាវុធ​ជា​កម្លាំង​បម្រើ​បក្សពេល​បងប្អូន​បម្រើ​ជាតិ​។ ការ​តម្លើង​ប្រាក់បៀវត្ស ការផ្តល់​គោល​របប​ផ្សេងៗ ការផ្តល់​ដី​សម្បទាន​សង្គមកិច្ច​ដ​ល់​អតីតយុទ្ធជន​គឺ​ដើម្បី​ធ្វើឱ្យ​ជីវភាព​របស់​កងទ័ព​មាន​លក្ខណៈ​ល្អប្រសើរ​ដែល​នេះ​គឺជា​ខិតខំ​របស់​រាជរដ្ឋាភិបាល​មិនមែន​ដោយសារតែ​គណបក្សប្រឆាំង​នោះទេ ព្រោះ​គណបក្សប្រឆាំង​បាន​បោះឆ្នោត​ប្រឆាំងនឹង​ការ​តម្លើង​ថវិកា​ក្រសួងការពារជាតិ​ដើម្បី​តម្លើង​ប្រាក់បៀវត្ស​ជូន​ដល់​កងកម្លាំងប្រដាប់អាវុធ​៕​ដោយៈ មុនី​រ័ត្ន​/sn

ឧ​ត្ត​ម​សេនីយ៍​ឯក ហ៊ុន ម៉ា​ណែ​ត ក្នុង​ពិធី​បើក​វគ្គ​ហ្វឹកហ្វឺន​ជំនាញ​ឆ័​ត្រ​យោង​ជំនា​ន់ទី​២៣​នៅ​កងពលតូច​ទ័ព​ពិសេស​ឆត្រយោង​៩១១