៧​ខែ​ឆ្នាំនេះភ្ញៀវបរទេសមក កម្សាន្តរមណីយដ្ឋានអង្គរមាន ​ជិត ១,៤ លាន​នាក់

281
ចែករម្លែក

ដោយៈ​គូលែន​/សៀមរាប​: ក្នុង​រយៈពេល ៧​ខែ ឆ្នាំ នេះ ភ្ញៀវ​បរទេស មកលេង​តំបន់​អង្គរ មាន​ជិត ១,៤ លាន​នាក់ និងរកចំណូលបាន​ជាង ៦២ លាន​ដុល្លារ​។ នេះ​គឺជា​ការបញ្ជាក់​របស់​គ្រឹះស្ថាន​អង្គរ ដែល​បាន​ចុះផ្សាយ នៅ​ថ្ងៃទី​១ ខែសីហា ឆ្នាំ​២០១៩ នេះ​។​

​គ្រឹះស្ថាន​អង្គរ ក៏បាន​បញ្ជាក់​ឲ្យ​ដឹងថា នៅក្នុង​ខែកក្កដា ឆ្នាំ​នេះ ចំណូល​សរុប ដែល​ទទួលបាន​ពី​ការលក់​ប័ណ្ណ ចូល​ទស្សនា​រមណីយដ្ឋាន​អង្គរ មាន​ចំនួន ៦.៥៨០.៥៩៨ ដុល្លារ​អាម៉េរិក បើ​ធៀប​នឹង​រយៈពេល​ដូចគ្នា កាលពី​ឆ្នាំ​២០១៨ ធ្លាក់ចុះ ១៩,៨៨ភាគរយ ក្នុង​ចំនួន​ភ្ញៀវទេសចរ​បរទេស សរុប ១៤៩.២៦៥ នាក់ ដែល​ធ្លាក់ចុះ ១៩,៧០ ភាគរយ​។​

​ដូច្នេះ​ក្នុង​រយៈពេល ៧​ខែ នៃ​ឆ្នាំ​ នេះ​ចំនួន​ភ្ញៀវទេសចរ​បរទេស​សរុប ដែល​ចូលមក​ទស្សនា រមណីយដ្ឋាន​អង្គរ មាន​ចំនួន ១.៣៩៣.៧១២ នាក់ ដែល​ធ្លាក់ចុះ ៩,៦៧ ភាគរយ បើ​ធៀប​ទៅនឹង​រយៈពេល​ដូចគ្នា ឆ្នាំ​២០១៨​។ ក្នុងនោះ​ចំណូល​ដែល​ទទួលបាន ពី​ការលក់​ប័ណ្ណ ចូល​ទស្សនា​រមណីយដ្ឋាន​អង្គរ ពី​ភ្ញៀវ​សរុប​មាន​ចំនួន ៦២.៣១០.១៥៩ ដុល្លារ​អាមេរិក ដែល​ធ្លាក់ចុះ ១០,៥៦ ភាគរយ ហើយ​ក្នុង​រយៈពេល​ដូចគ្នានេះ ទឹកប្រាក់ ដែល​បាន​ឧបត្ថម្ភ ចូលទៅ​មូលនិធិ​មន្ទីរពេទ្យ​គន្ធបុប្ផា មាន​ចំនួន​សរុប​ចំនួន ២.៧៨៧.៤២៤ ដុល្លារ​៕សរន