​នាយក​សាលា​កៀង​សិស្ស​គេច​ថ្នាក់​ឱ្យចូល​រៀន​បែរជា​រង​ការចោទប្រកាន់​យ៉ាង​ចាស់ដៃ​

1004
ចែករម្លែក

ដោយ​បូកគោ​/​កំ​ពតៈ​ម្ចាស់​គណនី​មួយ​បាន​បញ្ចេញ​ពាក្យ​ប​ណ្តឹ​ដោយ​អះអាងថា​ជា​របស់​ប្រជាពលរដ្ឋ​ដែល​ប្តឹង​ចោទប្រកាន់​នាយក​និង​នាយករង​នៃ​វិទ្យាល័យ​ហ៊ុនសែន​ត្រ​សេក​កោង​មាន​ទីតាំង​ស្ថិតក្នុង​ឃុំ​ថ្មី​ស្រុក​ទឹកឈូ​ថា​ប្រើ​សិទ្ធិ​ដេញចាប់​សិស្ស​បញ្ជូនទៅ​ប៉ុស្តិ៍​ទាំង​គ្មាន​ដីកា​ពី​តុលាការ​។​

​ម្ចាស់​គណនី​ហ្វេ​ស​ប៊ុ​ក​ឈ្មោះ​(​និយាយ​ការពិត​) កាលពី​វេលា​ម៉ោង​៤ និង​១០​នាទី​រសៀល​ថ្ងៃទី​៤ ខែកក្កដា​ឆ្នាំ​២០១៩​បាន​បង្ហោះ​សារ​ជា​ពាក្យបណ្តឹង​មួយ​មាន​ខ្លឹមសារ​ថា​ប្រជាពលរដ្ឋ​និង​អាណាព្យាបាល​របស់​សិស្សានុសិស្ស​រស់នៅ​ភូមិ​ត្រ​សេក​កោង​ឃុំ​ថ្មី​ស្រុក​ទឹកឈូ​។​

​ពួកគាត់​កើតទុក្ខ​មិន​សុខចិត្ត​ចំពោះ​លោក​ស៊ីវ​ប៉ូ​និង​លោក​រឿន​សារិន​នាយក​នាយករង​វិទ្យាល័យ​ហ៊ុនសែន​ត្រ​សេក​កោង​បាន​ប្រើប្រាស់​សិទ្ធិអំណាច​ដេញចាប់​សិស្ស​ប្រាំពីរ​នាក់​ដូច​ជន​ប្រព្រឹត្ត​បទល្មើស​ខុសច្បាប់​យកទៅដាក់​ប៉ុស្តិ៍​កាលពី​ម៉ោង​៩​ព្រឹក​ថ្ងៃទី​២ ខែកក្កដា ឆ្នាំ​២០១៩ ទាំង​គ្មាន​ដីកា​ពី​តុលាការ​។

​ក្នុង​បណ្តឹង​ដដែល​បាន​បន្តថា​លោកនាយក​នាយករង​បាន​គំរាមកំហែង​ធ្វើបាប​ប្រើពាក្យ​សម្តី​គ្មាន​សុជីវធម៌​ប្រើប្រាស់​ម៉ៃ​ក្រូ​ហ្វូ​ន​ជេរប្រមាថ​សិស្ស​អ្នកលក់ដូរ​ក្នុង​សាលា​និង​ប្រជាពលរដ្ឋ​រស់នៅ​ជុំវិញ​ខាងក្រៅ​របង​ទៀតផង​។​ទង្វើ​ទាំងនេះ​មិន​ស័ក្តិ​សមជា​នាយក​សាលា​ដឹកនាំ​លោកគ្រូ​អ្នកគ្រូ និង​សិស្សានុសិស្ស​បន្ត​ទេ​។​ដូច្នេះ​សូម​ក្រសួង​និង​មន្ទីរអប់រំ​ជួយ​រក​យុត្តិធម៌​ពិសេស​នាំ​បុគ្គល​ទាំងពីរ​នាក់​ទៅ​អប់រំ​និង​ដាក់ពិន័យ​ទៅតាម​ច្បាប់​ស្តីពី​សហលក្ខន្តិកៈ​មន្ត្រីរាជកា​រ​ស៊ីវិល​នៃ​ព្រះរាជាណាចក្រ​កម្ពុជា​។​
​ទាក់ទិន​នឹង​ករណី​ខាងលើ​លោក​ស៊ីវ​ប៉ូ​នាយក​វិទ្យាល័យ​ហ៊ុនសែន​ត្រ​សេក​កោង​បាន​បំភ្លឺថា​រហូតមកដល់​ប​ច្ចុ​ប្បន្នសាលា​មិនដែល​ហាមឃាត់​សិស្ស​ក្នុងការ​ទៅ​ទិញ​ឬ​បរិភោគ​ចំណីអាហារ​នៅ​ខាង​ក្រៅរបង​វិទ្យាល័យ​ទេ​។​ប៉ុន្តែ​តម្រូវឱ្យ​ប្រញាប់ប្រញាល់​ចូលមកក្នុង​វិញ​ទោះបី​មិនទាន់​ដល់​ម៉ោង​រៀន​ក៏ដោយ​ដើម្បី​បាន​អង្គុយ​អាន​សៀវភៅ ឬ​វាយ​កុំព្យូទ័រ​។

​សូម្បី​កន្លងទៅ​លោក​ស្នងការរង​ខេត្ត​បាន​ចុះមក​ក្រើនរំលឹក​ដល់​អ្នកលក់ដូ​រ​ឱ្យ​សហការ​ក្នុង​ការជួយ​ណែនាំ​សិស្ស​កុំឱ្យ​សម្ងំ​អង្គុយលេង​គឺ​រូតរះ​ចូល​ថ្នាក់រៀន​វិញ​។​ប៉ុន្តែ​អ្នកលក់​តប​ថាបើ​ឃើញ​សិស្ស​នៅ​អង្គុយលេង​សូម​សាលា​ហៅ​សមត្ថកិច្ច​មក​នាំចូល​ទៅក្នុង​វិញ​ចុះ​។
​លោកនាយក​បាន​បន្តថា​កាលពី​ថ្ងៃទី​២​ខែកក្កដា​នោះ​លោក​បាន​សុំ​កិច្ចសហការ​ពី​នគរបាល​ប៉ុស្តិ៍​ពីរ​នាក់​ដើម្បី​ចូលទៅ​ហៅ​សិស្ស​ចូលរៀន​ព្រោះ​បើ​ទៅ​តែ​គ្រូ​ខ្លាចក្រែង​គេ​ចោទប្រកាន់ថា​ចូល​អុកឡុក​កន្លែង​លក់ដូរ​។​ពេលនោះ​សិស្ស​ខ្លះ​បាន​រត់គេចខ្លួន​តែ​អ្នកខ្លះ​ក៏​ចូលរៀន​វិញ​។​និយាយ​រួម​មិនមាន​ការចាប់​សិស្ស​បញ្ជូនទៅ​ប៉ុស្តិ៍​នោះទេ​។
​ចំពោះ​ពាក្យ​ចោទប្រកាន់ថា​មានការ​ប្រើ​ម៉ៃ​ក្រូ​ហ្វូ​ន​ដៀល​ជេរ​គំរាមកំហែង​សិស្ស អ្នកលក់ដូរ និង​ពលរដ្ឋ​រស់នៅ​ជិតខាង លោក​ស៊ីវ ប៉ូ​បាន​បញ្ជាក់ថា​នេះ​ជា​រឿង​មូល​បង្កាច់​ទាំងស្រុង​។ ជាធម្មតា​ពេល​គោរព​ទង់ជាតិ​ឬ​ម៉ោង​ចេញលេង​លោក​តែង​ដាស់តឿន​សិស្ស​តាម​ឧ​ឃោស​ន​សព្ទ​និយាយ​រំលឹក​ណែនាំ​ឱ្យ​ចេះ​ថែរក្សា​បរិស្ថាន​ជាដើម​។​

​ជាមួយគ្នានេះ​លោកមា​សអាន​នាយប៉ុស្តិ៍​នគរបាល​រដ្ឋ​បាល​ឃុំ​ថ្មី​បាន​បញ្ជាក់ថា​ថ្ងៃនោះ​ខាង​លោក​ពិតជា​បាន​ចូលរួម​ក្នុង​ការហៅ​សិស្ស​ឱ្យចូល​សាលា​មែន​។​តែ​មិនបាន​សម្លុត​គំរាមកំហែង​ឬ​ចាប់បញ្ជូន​នាំមក​ប៉ុស្តិ៍​នោះទេ​។​ករណីបែបនេះ​តើ​មាន​សិទ្ធិ​អ្វី​ត្រូវ​ចាប់​គេ​នោះ​។​ការចោទប្រកាន់​នោះ​មិន​ត្រឹមត្រូវ​ទាល់តែសោះ​។ លោក​ហ៊ាន​ស្បថ​ស្លាប់ចោល​កូន​បើ​និយាយ​មិន​ពិត​។​លោកនាយ​ប៉ុស្តិ៍​បាន​បន្តថា​កន្លែង​លក់​កាហ្វេ​ក្បែរ​សាលា​នោះ​ដូចជា​មិន​សមរម្យ​ទាល់​ទេ​ព្រោះ​ធ្វើ​បន្ទប់​បិទបាំង​ដាច់ៗ​ពីគ្នា​មាន​អង្រឹង​ហើយ​សិស្ស​ខ្លះមក​កៀកកើយ​គេច​សាលា​មិន​ចូលរៀន​ទៀតផង​។​ដូច្នេះ​ការ​កៀង​សិស្ស​ឱ្យចូល​សាល​របស់​លោកនាយក​ដូចជា​មិន​ខុសឆ្គង​ទេ​មានតែ​ឪពុកម្តាយ​សិស្ស​អរគុណ​ទៅវិញ​។​

​លោក​សុខ ហេង​ប្រធានការិយាល័យ​អប់រំ​ស្រុក​ទឹកឈូ​បាន​បញ្ជាក់ថា​រហូតមក​ដល់​រសៀល​ថ្ងៃទី​៥ ខែកក្កដា ឆ្នាំ​២០១៩ ខាង​លោក​មិនទាន់​បានទទួល​បណ្តឹង​ស្តីពី​ការចោទប្រកាន់​ខាងលើ​នោះទេ ។​តែ​តាមរយៈ​ព័ត៌មាន​ដែល​បាន​លេចឮ​មក​នៅ​ព្រឹក​ថ្ងៃទី​៥​ខែកក្កដា​លោក​បាន​ចុះទៅ​ស្រាវជ្រាវ​ដោយ​ស៊ើបសួរ​អ្នកជិតខាង​និង​សមត្ថកិច្ច​។​

​ព្រមទាំង​អ្នកពាក់ព័ន្ធ​ទើប​ដឹងថា​នោះ​ជា​ករណី​យល់ច្រឡំ​របស់​ប្រជាពលរដ្ឋ​ដែល​ឃើញ​មាន​សមត្ថកិច្ច​ទៅ​កន្លែង​លក់ដូរ​ថា​ចា​ការចាប់​សិស្ស​ប​ញ្ធូ​ន​ទៅ​ប៉ុស្តិ៍​។​និយាយ​រួម​កិច្ចការ​នេះ​ខាង​ការិយាល័យ​ស្រុក​បាន​ចុះ​ធ្វើ​រួចរាល់​ហើយ​គឺជា​រឿង​យល់ច្រឡំ​ហើយ​ការ​បង្ហោះ​នោះ​កើតឡើង​ពី​ជនអនាមិក​ប៉ុណ្ណោះ​៕S/​