​បង្កើន​ការ​រឹតបន្តឹង​ផ្លូវច្បាប់​និង​លក្ខណៈ​បច្ចេកទេស​លើ​វិស័យ​សំណង់​

207
ចែករម្លែក

ដោយ​បូកគោ​/​កំ​ពតៈ​”​អាជ្ញាធរ​ក្រុង​ស្រុក​ឱ្យ​យកចិត្តទុកដាក់​ក្នុងការ​អនុវត្ត​ច្បាប់​និង​ត្រួតពិនិត្យ​លក្ខណៈ​បច្ចេកទេស​ឱ្យបាន​តឹងរ៉ឹង​និង​ម៉ឺងម៉ាត់​បំផុត​ចំពោះ​វិស័យ​សំណង់​។​គ្រប់​ការដ្ឋាន​សាងសង់​ចាំបាច់​ត្រូវតែ​គោរព​គោលការណ៍​តាម​បទដ្ឋាន ជៀសវាង​គ្រោះថ្នាក់​កើតឡើង​ដោយ​ប្រការ​ណាមួយ​”​។

​ថ្លែង​ក្នុង​កិច្ចប្រជុំ​ប្រចាំខែ​របស់​គណៈ​អភិបាល​ខេត្តកំពត នៅ​ថ្ងៃទី​៣១ ខែកក្កដា ឆ្នាំ​២០១៩ លោក​ជាវ តា​យ​អភិបាលខេត្ត​កំពត​បាន​មានប្រសាសន៍ថា​ក្នុង​ខេត្តកំពត​មាន​សំណង់​អគារ​ជាច្រើន​បាន​សាងសង់​រួច​ដោយ​មិនមាន​ច្បាប់​។​កន្លែង​ខ្លះទៀត​មានច្បាប់​តែ​ធ្វើ​មិនបាន​ត្រឹមត្រូវ​តាម​លក្ខណៈ​បច្ចេកទេស​។ ទាំងនេះ​ជា​ចំណុច​ដែល​រដ្ឋបាលខេត្ត​ត្រូវតែ​យកចិត្តទុកដាក់​ក្នុងការ​ពិនិត្យ និង​ចាត់វិធានការ​បន្ថែម​។

​លោក​អភិបាលខេត្ត​បាន​បន្តថា​កន្លងទៅ​រដ្ឋ​បាល​ខេត្ត​បាន​បង្កើត​គណៈកម្មការ​ចុះ​ត្រួតពិនិត្យ​តាមដាន និង​វាយតម្លៃ​ព្រមទាំង​ណែនាំ​ឱ្យ​ម្ចាស់​សំណង់​ទាំងអស់​មកសុំ​ច្បាប់​ឡើងវិញ​នូវ​អ្វីដែល​ខ្វះចន្លោះ ។​ទោះ​សំណង់​បាន​សង់​រួចរាល់​ក្តី​ចាំបាច់​ត្រូវតែ​មានច្បាប់​គ្រប់គ្រាន់​។

​ជាមួយ​នោះដែរ​ក៏មាន​ពលរដ្ឋ​មួយចំនួន​បានធ្វើ​សំណូមពរ​សូម​ការយោគយល់​ដោយសារ​ពេលខ្លះ​ពួកគាត់​កំពុង​បុកគ្រឹះ​ស្រាប់តែ​សមត្ថកិច្ច​ជំនាញ​ចុះ​ឃាត់​ដែលជា​ផ្នែក​មួយ​ធ្វើឱ្យ​ខាតបង់​ប្រា​ក់លើ​ការជួល​ជាង​។

​លោក​ជាវ​តា​យ​បាន​បញ្ជាក់ថា​រដ្ឋបាលខេត្ត​ក៏មាន​ការយោគយល់​ដែរ​។​ប៉ុន្តែ​មិនឱ្យ​ឃ្លាតឆ្ងាយ​ពី​ច្បាប់​នោះទេ​។​និយាយ​រួម​រាល់​សំណង់​ត្រូវតែ​ស្របច្បាប់​និង​មាន​លិខិតអនុញ្ញាត​ហើយ​ការយោគយល់​ក៏មាន​កម្រិត​ព្រំដែន​ដូចជា​ការ​ទុកពេល​វេលា​ឱ្យ​ពលរដ្ឋ​ទៅ​បំពេញ​សំណុំបែបបទ​ដើម្បី​បញ្ជូនទៅ​ផ្នែក​ជំនាញ​ជាដើម​។​

ក្នុងករណី​បើ​ដល់​ថ្ងៃ​កំណត់​នៅតែ​គ្មាន​ច្បាប់​មិន​គោរព​តាម​ការណែនាំ​នោះ​រដ្ឋបាលខេត្ត​នឹង​ចាត់ការ​បន្ត​។ លោក​អភិបាលខេត្ត​ក៏បាន​ក្រើនរំលឹក​ផងដែរ​ថា​ថ្នាក់ដឹកនាំ​ក្រុង​ស្រុក​ត្រូវ​បញ្ជា​ដល់​ម្ចាស់​ត្រូវ​ហ៊ុមព័ទ្ធ​ការដ្ឋាន​សំណង់​ឱ្យបាន​ត្រឹមត្រូវ​តាម​លក្ខណៈ​បច្ចេកទេស​ជៀសវាង​គ្រោះថ្នាក់​កើតឡើង​ដោយ​ប្រការ​ណាមួយ​៕S/​