​ប្រជាពលរដ្ឋ​ក្រុងភ្នំពេញ​បង្ហាញ​ទឹកមុខ​រីករាយ​ក្រោយ​បោះឆ្នោត​រួច​

841
ចែករម្លែក

​ដោយ​:​ពៅ​និមល​/​ភ្នំពេញ​:​ខណៈដែល​ការបោះឆ្នោត​ថ្នាក់ជាតិ​នីតិកាល​ទី​៦​បានបញ្ចប់​ជា​ស្ថាប​ពរ ក្នុងឱកាស​ចូលរួម​បោះឆ្នោត​នេះ​ប្រជាពលរដ្ឋ​ដែល​រស់នៅក្នុង​ទីក្រុង​ភ្នំពេញ​បានបង្ហាញ​ទឹកមុខ​សប្បាយរីករាយ​និង​បញ្ជាក់​ឲ្យ​ដឹងថា​ខ្លួន​បាន​បំពេញ​កាតព្វកិច្ច​រួចរាល់​ហើយ​ក្នុងនាម​ជា​ពលរដ្ឋ​ម្នាក់​សម្រាប់​ប្រទេស ជាមួយនឹង​ការបោះឆ្នោត​ដោយ​គ្មាន​ការបង្ខិតបង្ខំ​។​

​អ្នកស្រី លីន​ណា និង​សមាជិក​ក្នុង​គ្រួសារ​៣​នាក់​ផ្សេងគ្នា ស្ថិតក្នុង​មណ្ឌល​វិទ្យាល័យ​បឹង​កេងកង បាន​ប្រាប់​កាសែត​រស្មី​កម្ពុជា​ក្នុង​ថ្ងៃ​បោះឆ្នោត​កាលពី​ថ្ងៃទី​២៩ ខែកក្កដា ឆ្នាំ​២០១៨​កន្លងទៅ​ថា អ្នកស្រី​ពិត ជាមាន​អារម្មណ៍​សប្បាយចិត្ត​ណាស់​ក្រោយ​បាន​ចូលរួម​បោះឆ្នោត ។​ព្រោះនេះ​ជា​ភារកិច្ច​ដ៏​ចាំបាច់​និង​សំខាន់​ណាស់​សម្រាប់​ជ្រើសរើស​អ្នកដឹកនាំ​ដែល​យើង​ពេញចិត្ត​។​

​បែរ​ទៅខាង​មណ្ឌល​សាលាបឋមសិក្សា​បាក់​ទូក​ឯណោះ​វិញ អ្នកស្រី សុខលាភ បាន​លើកឡើងថា ក្នុង​ទិដ្ឋភាព​ជុំវិញ​បរិវេណ​ការិយាល័យ​បោះឆ្នោត​ផ្ទាល់​របស់​អ្នកស្រី​កត់សម្គាល់​ឃើញថា គឺមាន​ភាពល្អប្រសើរ​និង​ប្រព្រឹត្ត​ទៅដោយ​ភាពរលូន ទាំង​ការត្រួតពិនិត្យ​ឈ្មោះ និង​ទឹក​ថ្នាំ​ជ្រលក់​ជាដើម​ក្រោយ​ចប់​គូស​សន្លឹកឆ្នោត​។

អ្នកស្រី​បាន​រំពឹងទុក​ថា សន្លឹកឆ្នោត​ដែល​បាន​បោះ​នាពេលនេះ​នឹង​ទទួល​បានការ​តបស្នង​យ៉ាង​ពេញចិត្ត​នូវ​ថ្នាក់ដឹកនាំ​ដ៏​ល្អៗ​សម្រាប់​បម្រើប្រជាជន​ប​ន្ត​ទៅមុខទៀត​និង​ដឹកនាំ​ប្រទេស​កាន់តែ​រីកចម្រើន​។​

​ដោយឡែក ពលរដ្ឋ​រស់នៅក្នុង​សង្កាត់​អូរ​ឬ​ស្សី​៣ និង​ក្នុង​សង្កាត់​មនោ​រម្យ ខណ្ឌ​៧​មករា បាន​ប្រាប់​កាសែត​រស្មី​កម្ពុជា​ដែរ​ថា​អ្វី​ដែលជា​សង្ឃឹមទុក​ក្រោយ​ចប់​ការបោះឆ្នោត​គឺ​ចង់ឃើញ​ប្រទេសជាតិ​កាន់តែ​អភិវឌ្ឍន៍ ពិសេស​ការរស់នៅ​ប្រកបដោយ​ភាពសម្បូរ​សប្បាយ​ដោយ​គ្មាន​ហិង្សា​។​

​សូម​រំលឹកថា ការបោះឆ្នោត​ជ្រើសរើស​តំណាង​នីតិកាល​ទី​៦ បាន​ប្រព្រឹត្តទៅ​រយៈពេល​មួយថ្ងៃ​គត់ គឺ​ថ្ងៃទី​២៩ ខែកក្កដា ឆ្នាំ​២០១៨ ដោយមាន​គណបក្ស​ឈរឈ្មោះ​សរុប​ចំនួន​២០​គណបក្ស​៕S/

​ប្រជាពលរដ្ឋ​ក្រុងភ្នំពេញ​បង្ហាញ​ទឹកមុខ​រីករាយ​ក្រោយ​បោះឆ្នោត​រួច​