​ព្រឹត្តិការណ៍​ជាតិ ប្រចាំ​សប្តាហ៍​

406

ដោយ​៖ ម៉េង​ឆៃ / ភ្នំពេញ​៖ កាលពី​ព្រឹក​ថ្ងៃ​ចន្ទ ទី​២៦ ខែមីនា ឆ្នាំ​២០១៨ សម្តេច​តេ​ជោ​ហ៊ុនសែន បាន​អញ្ជើញ​បើក​ការដ្ឋាន​សាងសង់​ឲ្យ​កាន់តែ​រឹងមាំ និង​ពង្រីក​ឲ្យ​ធំ​ជាង​មុន​នូវ​កំណាត់​ផ្លូវជាតិ​លេខ​៥ ពី​បាត់ដំបង ទៅកាន់​ក្រុង​សិរីសោភ័ណ ខេត្តបន្ទាយមានជ័យ ប្រវែង​ប្រមាណ ៨៥​គីឡូម៉ែត្រ​។ ការដ្ឋាន​សាងសង់​នេះ ផ្តល់​ហិរញ្ញប្បទាន​ដោយ​រដ្ឋាភិបាល​ជប៉ុន ប្រមាណ ១៨៥ លាន​ដុល្លារ​អាមេរិក​។ ជប៉ុន ក៏​នឹង​ធានារ៉ាប់រង​ក្នុងការ​សាងសង់ និង​ពង្រីក​កំណាត់​ផ្លូវជាតិ​លេខ​៥ ពីរ​ដំណាក់កាល​ទៀត ចាប់ពី​ស្ពាន​ព្រែក​ក្តាម រហូតដល់​ប៉ោយប៉ែត ព្រំដែន​ថៃ​។​

.​ក្នុង​ពិធី​ចែក​សញ្ញាបត្រ​ដល់​និស្សិត​ជ័យលាភី នៃ​សាកលវិទ្យាល័យ​អាស៊ី​អឺរ៉ុប កាលពី​ព្រឹក​ថ្ងៃទី​២៧ ខែមីនា សម្តេច​តេ​ជោ ហ៊ុនសែន បានបង្ហាញ​ប្រតិកម្ម​ជា​សាធារណៈ​ខ្លាំងៗ ឆ្លើយតប​ទៅនឹង​ព័ត៌មាន ដែល​សម្តេច ហ៊ុន សែន ចាត់ទុកថា ជា​ព័ត៌មាន​បំផ្លើស ជុំវិញ​ការ​លើកឡើងថា ជប៉ុន​បាន​បង្គាប់បញ្ជា អោយ​រាជរដ្ឋាភិបាល​កម្ពុជា សិក្សា​លទ្ធភាព​ចរចា​នយោបាយ ជាមួយ​មេដឹកនាំ​អតីត​គណបក្ស​សង្គ្រោះ​ជាតិ​។ ប៉ុន្តែ​បើតាម​សម្តេច​ហ៊ុនសែន ជប៉ុន​មិនដែល​មាន​ទំលាប់​បែបនេះ​ទេ តែ​ផ្ទុយទៅវិញ​ប្រទេស​ជប៉ុន ជា​ប្រទេសមួយ ដែល​គោរព​ច្បាប់ និង​អធិបតេយ្យភាព​ខ្លាំងណាស់​របស់​កម្ពុជា​។ សម្តេច​ក៏បាន​បញ្ជាក់​ជាថ្មី​យ៉ាងច្បាស់​ថា មិនមាន​ការចរចា​ណាមួយ​ជាមួយ​អតីត​មេដឹកនាំ​អតីត​គណបក្ស​សង្គ្រោះ​ជាតិ ដែល​សម្តេច​ចាត់ទុក ជា​ក្រុម​ក្បត់ជាតិ​នោះឡើយ​។​

.​កាលពី​រសៀល​ថ្ងៃទី​២៧ ខែមីនា សម្តេច​តេ​ជោ​នាយករដ្ឋមន្ត្រី បាន​អញ្ជើញ ជា​អធិបតី ក្នុង​ពិធី​បិទ​សន្និបាត សុខាភិបាល លើក​ទី​៣៩ នៅ​សណ្ឋាគារ សូ​ហ្វី​តែ​ល ភ្នំពេញ ភូ​គី​ត្រា​។ សម្តេច បាន​ជំរុញ​ឲ្យ​ក្រុមគ្រូពេទ្យ បន្ត​យកចិត្តទុកដាក់ ផ្តល់​សេវា​ព្យាបាល​ប្រជាពលរដ្ឋ​។​

.​ជាមួយគ្នានេះ កាលពី​ថ្ងៃទី​២៧ ខែមីនា សម្តេច​តេ​ជោ ហ៊ុន សែន បាន​អញ្ជើញ​ជួបពិភាក្សា​ការងារ​ជាមួយ រដ្ឋមន្ត្រី​សម្របសម្រួល​កិច្ចការ​សមុទ្រ នៃ​ប្រទេស​ឥណ្ឌូនេស៊ី​។ ក្រៅពី​នាំនូវ​ការសាកសួរ​សុខទុក្ខ​ពី​លោក​ប្រធានាធិបតី​ឥណ្ឌូនេស៊ី ជូន​ចំពោះ​សម្តេច​តេ​ជោ ហ៊ុន សែន ហើយ​នោះ លោក​រដ្ឋមន្ត្រី​ឥណ្ឌូនេស៊ី ក៏បាន​នាំនូវ​លិខិត​គោរព​អញ្ជើញសម្តេច​តេ​ជោ ហ៊ុន សែន ចូលរួម​ក្នុង​កិច្ចប្រជុំ​ប្រចាំឆ្នាំ ស្តីពី​បញ្ហា​សេដ្ឋកិច្ច នៅ​កោះ​បាលី ប្រទេស​ឥណ្ឌូនេស៊ី នា​ខែតុលា ដែលមាន​វត្តមាន​មេ​ដឹក​អាស៊ាន និង​ធនាគារពិភពលោក ព្រមទាំង​មូលនិធិ​រូបិយវត្ថុ​អន្តរជាតិ​( IM F) ចូលរួម​ផងដែរ​។

.​តុលាការ​សាលាឧទ្ធរណ៍ កាលពី​ព្រឹក​ថ្ងៃទី​២៧ ខែមីនា បាន​បើកសវនាការ​ជំនុំជម្រះ​លើ​បណ្ដឹង​របស់លោក កឹម សុខា ដែល​មិន​សុខ​ចិត្តនឹង​សាលាដំបូង​រាជធានី​ភ្នំពេញ ក្នុងការ​សម្រេច បន្ត​ឃុំខ្លួន​លោក ៦​ខែ​ទៀត​។ ប៉ុន្តែ​ជា​លទ្ធផល​នៃ​សវនាការ ដែល​មិនមាន​វត្តមាន​របស់លោក​កឹម​សុខា ចូលរួម​នោះ ត្រូវបាន​តុលាការ​សាលាឧទ្ធរណ៍ បានសម្រេច​យល់ស្រប ចំពោះ​សេចក្ដីសម្រេច​របស់​សាលាដំបូង​រាជធានី​ភ្នំពេញ គឺ​បន្ត​ឃុំខ្លួន​លោក​កឹម​សុខា រយៈពេល ៦​ខែ​បន្តទៀត ដើម្បី​រង់ចាំ​ការស៊ើបអង្កេត ក្នុង​សំណុំរឿង​ក្បត់ជាតិ​។​

.​កាលពី​ព្រឹក​ថ្ងៃទី​២៨ ខែមីនា សម្តេច​តេ​ជោ ហ៊ុន សែន បាន​បន្ត​កម្មវិធី​ចុះ​ជួប​សំណេះសំណាល​ជាមួយ​កម្មករ​កម្មការិនី​ប្រមាណ​ជាង ១​ម៉ឺន ៤​ពាន់​នាក់ មកពី​រោងចក្រ​សហគ្រាស​ចំនួន ២៣ នៅ​តំបន់​ព្រៃទា ខណ្ឌ​ពោធិ៍​សែន​ជ័យ រាជធានី​ភ្នំពេញ​។ គោលបំណង​សំខាន់​នៃ​ការអញ្ជើញ​ចុះ​ជួប​សំណេះសំណាល​នេះ គឺ​ដើម្បី​ស្វែងយល់​ពី​សុខទុក្ខ​របស់​បងប្អូន​កូនក្មួយ​កម្មករ កម្ម​ការ​នី​ដោយផ្ទាល់ និង​ដើម្បី​ដោះស្រាយ​បញ្ហា​ប្រឈម​នានា​។ ទន្ទឹមនឹងនេះ សម្តេច​តេ​ជោ​នាយករដ្ឋមន្ត្រី បាន​មានប្រសាសន៍ថា កន្លងមក រាជរដ្ឋាភិបាល បាន​ចំណាយ​ថវិកា​ប្រមាណ ៤​លាន ៦​សែន ដុល្លារ ក្នុងការ​ដោះស្រាយ​ប្រាក់ខែ​ដល់ក​ម្មករក​ម្មការ​នីមួយ​ចំនួន ដែល​ត្រូវ​ម្ចាស់​រោងចក្រ​រត់ចោល​។​

.​លំ​ហាត់​សមយុទ្ធ​រវាង​កងទ័ព​កម្ពុជា និង​កងទ័ព​រំដោះប្រជាជន​ចិន ដែល​បានធ្វើ​រួមគ្នា រយៈពេល ១៥​ថ្ងៃ បាន​បិទ​បញ្ចប់ កាលពី​ថ្ងៃទី​២៩ ខែមីនា ក្រោម​អធិបតីភាព​សម្តេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ និង​លោក​ឧ​ត្ត​ម​សេនីយ៍​ឯក ចូ​វ សុង​ហឺរ (Zhou Songhe) មេបញ្ជាការរង​កងទ័ព​ជើងគោក​នៃ​កងទ័ព​រំដោះប្រជាជន​ចិន​។ ប្រមុខ​ដឹកនាំ​ក្រសួងការពារជាតិ​កម្ពុ​ជា បាន​ចាត់ទុកថា លំ​ហាត់​សមនេះ ថា​ក្រៅពី​ការជួយ​រឹតចំណង​មិត្តភាព​កម្ពុ​ជា​-​ចិន គឺ​បាន​ជួយ​លើកកម្ពស់​សមត្ថភាព បង្កើន​ជំនាញ​បច្ចេកវិទ្យា បទពិសោធន៍​ថ្មីៗ​ជាច្រើន​លើ​ប្រតិបត្តិ​ការប្រឆាំង​អំពើ​ភេរវកម្ម ដល់​កងយោធពល​ខេមរភូមិន្ទ​កម្ពុជា​។​

.​កាលពី​ព្រឹក​ថ្ងៃទី​៣០ ខែមីនា ប្រមុខ​ដឹកនាំ​រាជរដ្ឋាភិបាល​កម្ពុជា សម្តេច​តេ​ជោ ហ៊ុន សែន បាន​ដឹកនាំ​គណៈប្រតិភូ​ជាន់ខ្ពស់ អញ្ជើញ​ទៅកាន់​ប្រទេស​វៀតណាម ដើម្បី​ចូលរួម​កិច្ចប្រជុំ​កំពូល​មហា​អនុតំបន់​មេគង្គ លើក​ទី​៦ និង​កិច្ចប្រជុំ​កំពូល​កម្ពុជា​-​ឡាវ​-​វៀតណាម លើក​ទី​១០ ស្តីពី តំបន់ត្រីកោណ​អភិវឌ្ឍន៍​។ កិច្ចប្រជុំ​នេះ ប្រព្រឹត្តទៅ​ពីរ​ថ្ងៃ គឺ​នៅ​ថ្ងៃទី​៣០ និង​ថ្ងៃទី​៣១ ខែមីនា នៅ​ទីក្រុង​ហាណូយ​។​

.​កាល​ថ្ងៃទី​៣០ ខែមីនា កម្ពុជា​បាន​បិទ​វគ្គ​ហ្វឹកហ្វឺន​គ្រូ​បង្គោល​ជំនាញ​បោសសម្អាត​មីន ថ្នាក់​អាស៊ាន និង​តំបន់​។ ក្នុងឱកាស​នេះ ប្រមុខ​ដឹកនាំ​ក្រសួងការពារជាតិ សម្តេច ទៀ បាញ់ បាន​លើកឡើងថា កម្ពុជា​ធ្លាប់ជា​ប្រទេស​ទទួល​ជំនួយ​ផ្នែក​បោសសម្អាត​មីន ពី​បណ្តា​ប្រទេស​ជា​មិត្ត និង​តែងតែ​បញ្ជូន​សិក្ខាកាម ទៅ​សិក្សា​នៅ​បរទេស តែ​បច្ចុប្បន្ននេះ កម្ពុជា​បានប្រែក្លាយ ទៅជា​ប្រទេស ដែលមាន​បទពិសោធន៍ មាន​សមត្ថភាព​បោសសម្អាត​មីន និង​ជា​ប្រទេស ដែល​ហ្វឹកហ្វឺន​គ្រូ​បង្គោល​បោសសម្អាត​មីន ដល់​សិក្ខាកាម​នៅក្នុង​តំបន់ និង​ពិភពលោក​ថែម​ទៀតផង​។​

.​នៅ​រសៀល​ថ្ងៃទី​៣១ ខែមីនា ឆ្នាំ​២០១៨ ប៉ូលិស​អគ្គស្នងការ​ន​គ​របាល​ជាតិ បាន​បញ្ជូន​អតីត​ស្នងការរង​នគរបាល​ខេត្តតាកែវ លោក​ឧ​ត្ត​ម​សេនីយ៍​ត្រី ឡាយ ណា​រិ​ទ្ធ រួមទាំង​បក្ខពួក​មួយចំនួន បញ្ជូន​ទៅកាន់​តុលាការ​សាលាដំបូង​រាជធានី​ភ្នំពេញ​។ លោក​ស្នងការរង និង​បក្ខពួក ជាប់​ពាក់ព័ន្ធ​សំណុំរឿង​ឃាតកម្ម​លើ​ស្ត្រី​មេម៉ាយ​រូប​ស្រស់​ម្នាក់ ឈ្មោះ ចេ​វ សុ​វ​ឌ្ឍ​នា ដែល​បាន​ស្លាប់ ហើយ​ត្រូវបាន​គេ​អះអាងថា ចងក​សម្លាប់ខ្លួន កាលពី​ថ្ងៃទី​២៦ ខែមករា ឆ្នាំ​២០១៨៕L