​ព្រឹត្តិការណ៍​ជាតិ ប្រចាំ​សប្តាហ៍​

936
ចែករម្លែក

ដោយៈ ម៉េង​ឆៃ​
​ភ្នំពេញៈ
កាលពី​ថ្ងៃអាទិត្យ ទី​២៦ ខែឧសភា​ឆ្នាំ​២០១៩ កម្ពុជា បានរៀបចំ​ការបោះឆ្នោត​ជ្រើសរើស​សមាជិក​ក្រុមប្រឹក្សា​រាជធានី​ខេត្ត ក្រុង​ស្រុក​ខណ្ឌ អាណត្តិ​ទី​៣ ដូច​ការគ្រោងទុក​។ ជា​លទ្ធផល​មាន​មាន​អង្គ​បោះឆ្នោត​រហូតដល់​៩៩,៩៤ ភាគរយ បាន​បោះឆ្នោត​។ គណបក្ស​ប្រជាជន​កម្ពុជា ទទួលបាន​សំឡេងឆ្នោត​គាំទ្រ​ច្រើន​លើសលុប​បំផុត​។ នេះ​បើតាម​លទ្ធផល​បឋម​។ ចំណែក​សម្ដេច ស ខេង រដ្ឋមន្ត្រី​ក្រសួងមហាផ្ទៃ បាន​ថ្លែង​កោតសរសើរ​បរិយាកាស​នៃ​ការបោះឆ្នោត កាលពី​ថ្ងៃទី​២៦ ខែឧសភា​។​

​កាលពី​ថ្ងៃ​ចន្ទ ទី​២៧ ខែឧសភា សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា បាន​ចំណាយពេល​មួយថ្ងៃ អញ្ជើញ​ថ្លែង​សុន្ទរកថា ចែករំលែក​បទពិសោធ​ន៍​ជោគជ័យ​ក្នុងការ​អភិវឌ្ឍ​ប្រទេស​កម្ពុជា នៅក្នុង​សន្និបាត​ប្រចាំឆ្នាំ លើក​ទី​៧៥ របស់​អង្គការសហប្រជាជាតិ​(​អ​.​ស​.​ប​) ដែល​រៀបចំ​ធ្វើ​នៅក្នុង​ទីក្រុង​បាងកក ប្រទេស​ថៃ​។ អ​.​ស​.​ប បានសម្រេច​អញ្ជើញសម្តេច​តេ​ជោ ជា​វាគ្មិន​កិត្តិយស ត្បិត​អង្គការ​ពិភពលោក​មួយ​នេះ ទទួលស្គាល់​នូវ​ការអភិវឌ្ឍ​របស់​កម្ពុ​ជា តាមរយៈ​ការខិតខំ​ប្រឹងប្រែង​ជារួម​របស់​សម្ដេចនាយក​រដ្ឋមន្ត្រី ក្នុងការ​បញ្ចប់សង្គ្រាម​ស៊ីវិល ការកាត់បន្ថយ​ភាពក្រីក្រ និង​ការរក្សា​ស្ថិរភាព​ម៉ាក្រូសេដ្ឋកិច្ច ដែល​នាំ​ឲ្យ​កម្ពុជា រក្សា​កំណើនសេដ្ឋកិច្ច​ល្អប្រសើរ ក្នុង​រង្វង់​ប្រមាណ ៧,៧ ភាគរយ ជា​រៀងរាល់ឆ្នាំ ក្នុង​រយៈពេល ២ ទសវត្សរ៍​ចុងក្រោយ​នេះ​។​

​កាលពី​ថ្ងៃទី​២៨ ខែឧសភា សម្តេច​តេ​ជោ នាយករដ្ឋមន្ត្រី ហ៊ុន សែន បាន​ដឹកនាំ​គណៈប្រតិភូ​អញ្ជើញ​ធ្វើដំណើរ​ចាកចេញ​ពី​រាជធានី​ភ្នំពេញ ទៅកាន់​ទីក្រុង​តូ​ក្យូ ប្រទេស​ជប៉ុន ដើម្បី​ចូលរួម​សន្និសីទ​អន្តរជាតិ ស្តីពី អនាគត​អាស៊ី និង​កិច្ចប្រជុំ​ពាក់ព័ន្ធ​។ ក្នុងអំឡុងពេល​ស្នាក់នៅ និង​បំពេញការងារ នៅ​ប្រទេស​ជប៉ុន ប្រមុខ​ថ្នាក់ដឹកនាំ​កម្ពុជា ក្រៅពី​អញ្ជើញ​ចូលរួម​សន្និសីទ​អន្តរជាតិ ស្តីពី អនាគត​អាស៊ី សម្តេច ក៏បាន​អញ្ជើញ​ចូលរួម​សិក្ខាសាលា ស្តីពី បរិយាកាស​វិនិយោគ​នៅ​កម្ពុជា ជួបពិភាក្សា​ការងារ​ជាមួយ​អ្នក​វិនិយោគិន​ជប៉ុន ជួបពិភាក្សា​ការងារ​ជាមួយ​នាយករដ្ឋមន្ត្រី ស៊ីន ហ្ស៊ូ​អា​បេ និង​អញ្ជើញ​ជា​សាក្សី ក្នុង​ពិធី​ចុះហត្ថលេខា​មួយចំនួន ជាមួយ​ភាគី​ជប៉ុន​ផងដែរ​។​

​កាលពី​ព្រឹក​ថ្ងៃទី​២៨ ខែឧសភា ប្រធានរដ្ឋសភា​កម្ពុជា សម្ដេច​អគ្គ​មហា​ពញា​ចក្រី ហេង សំរិន បាន​ដឹកនាំ​គណៈប្រតិភូ​ជាន់ខ្ពស់​រដ្ឋសភា អញ្ជើញ​ទៅ​បំពេញ​ទស្សនកិច្ច នៅ​ប្រទេស​វៀតណាម និង​បន្តដំណើរ​ទៅកាន់​ប្រទេស​ឡាវ​។ ដំណើរ​ទស្សនកិច្ច​នេះ មាន​រយៈពេល ៤​ថ្ងៃ ចាប់ពី​ថ្ងៃទី​២៨ ខែឧសភា ដល់​ថ្ងៃទី​១ ខែមិថុនា បានធ្វើ​ឡើង តាម​ការអញ្ជើញ​ពី​ប្រធានរដ្ឋសភា​វៀតណាម និង​ឡាវ​។

​កាលពី​ថ្ងៃទី​២៩ ខែឧសភា ដែលជា​ថ្ងៃទី​១ នៃ​ដំណើរ​ទស្សន​កិច្ចការងា​រ នៅ​ប្រទេស​ជប៉ុន​។ តាមរយៈ​សិក្ខាសាលា ស្តីពី ការវិនិយោគ​នៅ​កម្ពុជា កាលពី​ថ្ងៃទី​២៩ ខែឧសភា នៅ​ទីក្រុង​តូ​ក្យូ សម្តេច​តេ​ជោ ហ៊ុន សែន បានធ្វើ​បទ​បង្ហាញ​ដល់​អ្នក​ធុរកិច្ច​ជប៉ុន ពី​គោលនយោបាយ​គន្លឹះ និង​សក្កា​នុព​ល ដែល​កម្ពុជា មាន​ក្នុងន័យ​ទាក់ទាញ​អ្នកវិនិយោគ​ជប៉ុន​បន្ថែ​ម មក​ធ្វើ​អាជីវកម្ម​នៅ​កម្ពុជា​។ សម្តេចនាយក​រដ្ឋមន្ត្រី បញ្ជាក់ថា កម្ពុជា​ជា​ប្រទេស ដែលមាន​សក្កា​នុព​ល និង​កំណើនសេដ្ឋកិច្ច​ខ្ពស់​ជាងគេ នៅ​តំបន់​អាស៊ី​អាគេ្នយ៍​។ កម្ពុជា ក៏មាន​សន្តិភាព សន្តិសុខ ស្ថិរភាព​នយោបាយ ស្ថិរភាព​ម៉ាក្រូសេដ្ឋកិច្ច មាន​ធនធានមនុស្ស គួបផ្សំ​នឹង​ការធ្វើកំណែទម្រង់​ផ្ទៃក្នុង​ស៊ីជម្រៅ​ថែមទៀត ដែល​នាំ​ឲ្យ​អ្នកវិនិយោគ​ជប៉ុន​ពិតជា​សម្រេចចិត្ត​មិន​ខុស​ឡើយ ក្នុងការ​មក​វិនិយោគ​នៅ​កម្ពុជា​។​

​បន្ទាប់ពី​អញ្ជើញ​ជា​អធិបតី​ក្នុង​សិក្ខាសាលា ស្តីពី បរិយាកាស​វិនិយោគ​នៅ​កម្ពុជា កាលពី​រសៀល​ថ្ងៃទី​២៩ ឧសភា សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា បាន​អញ្ជើញ​ជួបពិភាក្សា​ការងារ​ដាច់ដោយឡែក​ពីគ្នា ជាមួយ​ប្រធាន​សម្ព័ន្ធ​មិត្តភាព​សភា​ជប៉ុន​-​កម្ពុជា និង​ជួប​នាយក​ប្រតិបត្តិ​ថ្មី​របស់​អង្គការ​ពាណិជ្ជកម្ម​ក្រៅប្រទេស​ជប៉ុន​។ ទាំង​ប្រធាន​សម្ព័ន្ធ​មិត្តភាព​សភា​ជប៉ុន​-​កម្ពុជា និង​នាយក​ប្រតិបត្តិ​ថ្មី​នៃ​អង្គការ​ពាណិជ្ជកម្ម​ក្រៅប្រទេស​ជប៉ុន JETRO សុទ្ធ​ដែល​បាន​មើលឃើញ ក្នុង​ផ្លូវ​វិជ្ជមាន​ដូចគ្នា នូវ​ការ​វិវឌ្ឍន៍​ល្អប្រសើរ​នៃ​ទំនាក់ទំនង​ប្រទេស​ទាំងពីរ កម្ពុជា​-​ជប៉ុន​។ ជប៉ុន ក៏​ទទួលស្គាល់​នូវ​ការរីកចំរើន និង​ការខិតខំ​ប្រឹងប្រែង​ធ្វើកំណែទម្រង់​នានា​របស់​កម្ពុជា ក្នុងន័យ​ឆ្លើយតប​នឹង​តម្រូវការ​នៃ​ការវិនិយោគ​។ ក្នុងន័យនេះ ភាគី​ជប៉ុន សន្យា​បន្ត​ជំរុញ​ការវិនិយោគ​បន្ថែម មក​កម្ពុជា នាពេលខាងមុខ​។​

​នៅ​ប្រទេស​វៀតណាម កាលពី​រសៀល​ថ្ងៃទី​២៨ ខែឧសភា សម្តេច​អគ្គ​មហា​ពញា​ចក្រី ហេង សំរិន ប្រធានរដ្ឋសភា បាន​ជួប​សវនាការ និង​ពិភាក្សា​ការងារ ជាមួយ​លោកជំទាវ ង្វៀន ធី​គីម​ងិន (Nguyen Thi Kim Ngan) ប្រធានរដ្ឋសភា​វៀតណាម នៅ​វិមាន​រដ្ឋសភា​វៀតណាម​។ កិច្ចប្រជុំ​នៅ​ទីក្រុង​ហាណូយ ដើម្បី​ពង្រឹងពង្រីក​កិច្ចសហប្រតិបត្តិការ​រ​វាង​រដ្ឋសភា​ប្រទេស​ទាំងពីរ ឲ្យ​រឹងមាំ និង​គ្រប់​ជ្រុងជ្រោយ ទាំង​នៅក្នុង​ក្របខណ្ឌ​ទ្វេភាគី និង​ពហុភាគី​។​

​សម្តេច​តេ​ជោ នាយករដ្ឋមន្ត្រី ហ៊ុន សែន កាលពី​ថ្ងៃទី​៣០ ខែឧសភា បាន​អញ្ជើញ ជា​វាគ្មិន​កិត្តិយស ចែករំលែក​បទពិសោធ​ន៍ ដល់​មេដឹកនាំ​ក្នុង​តំបន់ និង​ពិភពលោក តាមរយៈ​សន្និសីទ​អន្តរជាតិ ស្តីពី អនាគត​អាស៊ី ដែល​រៀបចំ​ធ្វើ នៅ​ទីក្រុង​តូ​ក្យូ ប្រទេស​ជប៉ុន​។ សម្តេច​តេ​ជោ មិន​ត្រឹមតែ​អញ្ជើញ​ថ្លែង​សុន្ទរកថា​គន្លឹះ​លើ​មូលបទ​របស់​សន្និសីទ​នោះ តែ​សម្តេចនាយក​រដ្ឋមន្ត្រី ក៏បាន​អញ្ជើញ​ឆ្លើយតប​សំនួរ​ជាច្រើន​របស់​អ្នករៀបចំ​កម្មវិធី ដែល​សុទ្ធសឹងតែ​ជាការ​រួមចំណែក​ផ្តល់នូវ​ឧ​ត្ត​ម​ប្រយោជន៍​រួម​របស់​ពិភពលោក និង​ការបង្ហាញ​ការពិត​ពី​កម្ពុជា បច្ចុប្បន្ន​ផងដែរ​។​

​ដំណើរ​ទស្សនកិច្ច​ផ្លូវការ​របស់​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា រយៈពេល ៣​ថ្ងៃ រាប់​ចាប់តាំងពី​ថ្ងៃទី​២៨ ដល់​ថ្ងៃទី​៣១ ខែឧសភា បាន​បិទ​បញ្ចប់ ដោយ​នាំមក​នូវ​ជោគជ័យ គួរ​ឲ្យ​កត់សំគាល់ សម្រាប់​ជា​ឧ​ត្ត​ម​ប្រយោជន៍​របស់​កម្ពុជា និង​ការពង្រឹង​ពង្រីក​ទំនាក់​ទំនាក់​ល្អ​បន្ថែមទៀត លើ​គ្រប់​វិស័យ​ជាមួយ​ប្រទេស​ជប៉ុន​។ សម្តេច​តេ​ជោ ហ៊ុន សែន បាន​អញ្ជើញ​មកដល់​មាតុប្រទេស​វិញ ដោយ​សុវត្ថិភាព កាលពី​យប់​ថ្ងៃទី​៣១ ខែឧសភា​។​

​កាលពី​ថ្ងៃទី​៣១ ខែឧសភា វគ្គ​ហ្វឹកហ្វឺន​ជំនាញ​បច្ចេកទេស​ដោះមីន​កម្រិត​ខ្ពស់​ថ្នាក់​អាស៊ាន និង​តំបន់ សម្រាប់​គ្រូ​បង្គោល​ក្នុង​ប្រតិបត្តិ​ការរក្សា​សន្តិភាព​របស់​អ​.​ស​.​ប ត្រូវបាន​បិទ​បញ្ចប់​ដោយ​ជោគជ័យ និង​ប្រកបដោយ​កិត្តិយស​។ កម្ពុជា បានបង្ហាញ​មោទនភាព នៅពេល​បណ្ដា​ប្រទេស​ជា​មិត្ត និង​អង្គការ​អន្តរជាតិ​ធំៗ ផ្ដល់​ទំនុក​ទុកចិត្ត​ឲ្យ​ទទួល​ធ្វើជា​ម្ចាស់ផ្ទះ រៀបចំ​វគ្គ​ហ្វឹកហ្វឺន​ជំនាញ​បច្ចេកទេស​ដោះមីន​កម្រិត​ខ្ពស់​ថ្នាក់​អាស៊ាន និង​តំបន់ សម្រាប់​គ្រូ​បង្គោល​ក្នុង​ប្រតិបត្តិ​ការរក្សា​សន្តិភាព​របស់​អង្គការសហប្រជាជាតិ ជា​លើក​ទី​៣​នេះ​។

​កាលពី​ព្រឹក​ថ្ងៃទី​០១ ខែមិថុនា កម្ពុជា​ប្រារព្ធ​ទិវា​កុមារ​អន្តរជាតិ ថ្ងៃ​១​មិថុនា នៅ​កោះ​ពេជ្រ ក្នុង​រាជធានី​ភ្នំពេញ​។ នៅក្នុង​ពិធី​ជួបជុំ​នេះ លោក​ឧបនាយករដ្ឋមន្ត្រី កែ គឹមយ៉ាន​មានប្រសាសន៍ថា កុមារ គឺជា​ធនធានមនុស្ស​ដ៏​មិនអាច​ខ្វះ​បាន សម្រាប់​អភិវឌ្ឍន៍​ប្រទេសជាតិ ហេតុនេះ គ្រប់ភាគី​ពាក់ព័ន្ធ ត្រូវបាន​ការពារ​កុមារ និង​អភិវឌ្ឍ​ពួកគេ​ឱ្យបាន​ល្អ​។ ក្នុង​ទិវា​កុមារ​អន្តរជាតិ ថ្ងៃ​១​មិថុនា លោក កែ គឹមយ៉ាន បានផ្តល់​អនុសាសន៍ ៨ ចំណុច ដើម្បី​កុមារ​កម្ពុជា រួមមាន ការរៀបចំ​លិខិតបទដ្ឋាន​គតិយុត្តិ ការកែលម្អ​យន្តការ ដែលមាន​ស្រាប់ ការពិនិត្យ​តាមដាន ការពង្រឹង និង​ពង្រីក​សេវា​អប់រំ ការការពារ និង​ថែទាំ​សុខភាព​កុមារ ដោយ​ផ្តោត​ជាពិសេស​លើ​កុមារ​រងគ្រោះ និង​ងាយ​រងគ្រោះ ជាដើម​៕ ល​