​មន្ត្រី​កាំកុងត្រូល​ចាប់​ឆ្អឹង​និង​ជង្គង់​មាន់​ខូចគុណភាព​ជិត​មួយ​តោន​ដែល​ឈ្មួញ​នាំ​ពី​ប្រទេស​ថៃ​

988
ចែករម្លែក

(​បន្ទាយមានជ័យ​)៖​មន្ត្រី​កាំកុងត្រូល​បាន​ចាប់​ឆ្អឹង​និង​ជង្គង់​មាន់​ខូចគុណភាព​ជិត​មួយ​តោន​ដែល​ឈ្មួញ​នាំ​ពី​ប្រទេស​ថៃ​ចូលមក​តាម​ច្រក​អន្តរជាតិ​ប៉ោយប៉ែត​ខេត្តបន្ទាយមានជ័យ​កាលពី​ថ្ងៃទី​៨ ខែសីហា ឆ្នាំ​២០១៧ ។​ប្រតិបត្តិការ​នេះ​ដឹកនាំ​ដោយ​លោក ស៊ាន ស៊ី​ណាត ប្រធាន​សាខា​កាំកុងត្រូល​ខេត្តបន្ទាយមានជ័យ​បានធ្វើការ​បង្ក្រាប​រឹប​ផលិតផល​ខូចគុណភាព​សរុប​ចំនួន​៨២០​គីឡូក្រាម ។​ចំណែក​ឈ្មួញ​អ្នក​នាំចូល​បាន​រត់គេចខ្លួន​ខណៈដែល​មន្ត្រី​ជំនាញ​កំពុង​ឆែកឆេរ​ត្រួតពិនិត្យ​រទេះ​កម្មករ​ដឹក​ផលិតផល​ហាមឃាត់​នោះ​។​

​លោក​ស៊ាន​ស៊ី​ណាត​ប្រធាន​សាខា​កាំកុងត្រូល​ខេត្តបន្ទាយមានជ័យ​បាន​ប្រាប់​ឱ្យដឹងថា​ផលិតផល​ទាំងនោះ​ត្រូវបាន​ច្បាប់​ក្រសួងពាណិជ្ជកម្ម​ប្រទេស​កម្ពុជា​ហាមឃាត់​មិន​អនុញ្ញាតឱ្យ​នាំចូល​ក្នុងប្រទេស​កម្ពុជា​នោះឡើយ​។​វា​ជា​ប្រភេទ​ផលិតផល​កាកសំណល់​ដែល​ខាង​ថៃ​គេ​ពន្លះ​យក​សាច់​អស់ នៅសល់តែ​ឆ្អឹង ហើយ​ឈ្មួញ​ខ្មែរ​បែរជា​នាំចូល​លួចលាក់​ខុសច្បាប់ បម្រុង​យកមក​ចែកចាយ​នៅលើ​ទីផ្សារ​កម្ពុជា មិន​គិតពី​ផលប៉ះពាល់​សុខភាព ប្រជាពលរដ្ឋ​ខ្មែរ ដែល​មិន​បានដឹង​ទិញយក​ទទួលទាន​បង្ក​គ្រោះថ្នាក់​សុខភាព​យ៉ាងធ្ងន់ធ្ងរ​នោះ​។​

​លោក​បញ្ជាក់​ឱ្យដឹងទៀតថា បើតាម​ច្បាប់​ទាំង​ឈ្មួញ និង អ្នកស៊ីឈ្នួល​ដឹកជញ្ជូន​មាន​ចេតនា​នាំចូល​ផលិតផល​ទំនិញ​ខូចគុណភាព បង្ក​គ្រោះថ្នាក់​សុខភាព​ប្រជាពលរដ្ឋ ត្រូវ​ប្រឈម​នឹង​មុខ​ច្បាប់​ដាក់ទោស​ទណ្ឌ​ស្មើភាព​គ្នា ។ ផលិតផល​ខូចគុណភាព​ខាងលើ នៅ​រសៀល​ថ្ងៃ​ដដែល​ត្រូវបាន​មន្ត្រី​ជំនាញ​យកទៅ​ដុត​កំទេចចោល​ដើម្បី​បញ្ចៀស​ផលប៉ះពាល់​សុខភាព​ប្រជាពលរដ្ឋ​ខ្មែរ​នោះ​៕S/​ដោយ​៖​ហូ​សាន់​

​មន្ត្រី​កាំកុងត្រូល​ចាប់​ឆ្អឹង​និង​ជង្គង់​មាន់​ខូចគុណភាព​ជិត​មួយ​តោន​ដែល​ឈ្មួញ​នាំ​ពី​ប្រទេស​ថៃ​(រូប៖វ៉េបសាយ)