​មហោស្រព​ភាពយន្ត​ជប៉ុន​ប្រចាំឆ្នាំ​២០១៩​នៅ​កម្ពុជា​ចាប់ផ្តើម​

417
ចែករម្លែក

ដោយៈ​សុផល​/​ភ្នំពេញៈ​មូលនិធិ​ជប៉ុន​រួមសហការ​ជាមួយ​ស្ថានទូត​ជប៉ុន​,​ក្រសួង​វប្បធម៌​និង​វិចិត្រសិល្បៈ​និង​មជ្ឈមណ្ឌល​សហប្រតិបត្តិ​ការ​កម្ពុជា​-​ជប៉ុន​នឹង​រៀបចំ​មហោស្រព​ភាពយន្ត​ជប៉ុន​ប្រចាំឆ្នាំ​២០១៩ ចាប់ពី​ថ្ងៃទី​២០ ដល់​ថ្ងៃទី​២៤ ខែវិច្ឆិកា ឆ្នាំ​២០១៩ នៅ​រាជធានី​ភ្នំពេញ​។ (​រោងភាពយន្ត​MajorCineplex AEONI,​រោងភាពយន្ត​MajorCineplexAEONII​និង​រោងភាពយន្ត​Legend​សាខា​ទួលគោក​)​និង​ចាប់ពី​ថ្ងៃទី​៦ ដល់​ថ្ងៃទី​១០​ខែធ្នូ​ឆ្នាំ​២០១៩ នៅ​ខេត្តសៀមរាប (​រោងភាពយន្ត Major Cineplex) ។​

​កំឡុងពេល​មហោស្រព​មាន​ភាពយន្ត​ជាច្រើន​ប្រភេទ​ត្រូវបាន​សម្រិតសម្រាំង​សម្រាប់​ការចាក់​បញ្ចាំង​នៅ​រោងភាពយន្ត​ល្បីៗ​ដូចដែល​បាន​ជម្រាបជូន​ខាងលើ​។​ភាពយន្ត​ទាំងនោះ​រួមមាន​ភាពយន្ត​បែប​មនោសញ្ចេតនា ស៊ើបអង្កេត បែប​តន្ត្រី គំនូរជីវចល ប្រវត្តិសាស្ត្រ និង​កំប្លែង​ជាដើម​។

​ភាពយន្ត​ដែល​នឹងត្រូវ​ចាក់​បញ្ចាំង​ទាំងនេះ​ឆ្លុះបញ្ចាំង​អំពី​ជីវភាព​រស់នៅ​របស់​ប្រជាជន​សង្គម​និង​វប្បធម៌​ជប៉ុន​ហើយ​មហោស្រព​នេះ​ក៏​ផ្តល់ឱកាស​ដ៏​ល្អ​មួយ​សម្រាប់​អ្នកទស្សនា​អាច​ស្គា​ល់ពី​ប្រទេស​និង​ប្រជាជន​ជប៉ុន​។​ភាពយន្ត​ជប៉ុន​ចំនួន​១០​រឿង​នឹងត្រូវ​ចាក់​បញ្ចាំង​ជាមួយ​ចំណងជើង​រង​ជា​ភាសា​ខ្មែរ​និង​ភាសា​អង់គ្លេស​។​សម្រាប់​តារាង​កាលបរិច្ឆេទ​នៃ​ការចាក់​បញ្ចាំង​មាន​ផ្សព្វផ្សាយ​នៅលើ​គេហទំព័រ​មហោស្រព​ភាពយន្ត​ជប៉ុន​៖ (http://kh.japanesefilmfest.org/screening-schedule/)​។​សម្រាប់​ការចូលរួម គឺ​ដោយ​សេរី និង​ឥតគិតថ្លៃ​។​

​សូមជម្រាបថា​មហោស្រព​ភាពយន្ត​ជប៉ុន ត្រូវបាន​ប្រារព្ធ​ឡើងជា​រៀងរាល់ឆ្នាំ​ចាប់តាំងពី​ឆ្នាំ​២០១៥ ដើម្បី​ជម្រុញ​ការផ្លាស់ប្តូរ​វប្បធម៌​រវាង​ជប៉ុន និង​កម្ពុជា​៕S/

​ចំណងជើង​រូបថត​៖​ភាពយន្ត​ជប៉ុន​ចំនួន​១០​រឿង​នឹងត្រូវ​ចាក់​បញ្ចាំង​នៅ​ភ្នំពេញ​និង​សៀមរាប​នៅក្នុង​មហោស្រព​ភាពយន្ត​ជប៉ុន​ប្រចាំឆ្នាំ​២០១៩