​រោងចក្រ​ស៊ីម៉ង​តិ៍​ថ្មី​មួយទៀត​នឹង​ដំណើរការ​ដោយ​អាច​ផលិត​បាន​បី​ពាន់​តោន​ក្នុង​មួយថ្ងៃ​

146
ចែករម្លែក

ដោយ​បូកគោ​/​កំពត​:​រោងចក្រ​ស៊ី​ម៉​តិ៍​របស់​ក្រុមហ៊ុន​ថៃ​ប៊ុន​រ៉ុង​ជា​សក្តានុពល​សេដ្ឋកិច្ច​បន្ថែម​ថ្មី​មួយទៀត​នឹង​សម្ពោធ​នា​សប្តាហ៍​ក្រោយ​ដើម្បី​បើក​ដំណើរការ​ជាមួយ​អានុភាព​ដែល​អាច​ផលិត​បាន​បី​ពាន់​តោន​ក្នុង​មួយថ្ងៃ​។​ក្នុង​ដំណើរ​ចុះ​ពិនិត្យ​ទីតាំង​ដើម្បី​ធ្វើ​ពិធី​សម្ពោធ​រោងចក្រ​ស៊ី​ម៉​តិ៍​របស់​ក្រុមហ៊ុន​ថៃ ប៊ុន​រ៉ុង កាលពី​ព្រឹក​ថ្ងៃទី​៨​ខែវិច្ឆិកា​ឆ្នាំ​២០១៩​។​

​លោកនាយ​ឧ​ត្ត​ម​សេនីយ៍​យូ​ស៊ុនឡុង​រដ្ឋមន្ត្រី​ប្រតិភូ​អម​នាយករដ្ឋមន្ត្រី​បាន​មានប្រសាសន៍ថា​នា​ថ្ងៃទី​១៤​ខែវិច្ឆិកា​ឆ្នាំ​២០១៩​ខាងមុខ​ក្រុមហ៊ុន​ថៃ​ប៊ុន​រ៉ុង​នឹងធ្វើ​ពិធី​សម្ពោធ​រោងចក្រ​ស៊ីម៉ង​តិ៍​ដែលមាន​ទីតាំង​ស្ថិតក្នុង​ភូមិ​ល្អាង​ឃុំ​ល្អាង​ស្រុក​ដងទង់​ដើម្បី​ដំណើរការ​ផលិត​ជា​ផ្លូវការ​។​

ពិធី​នេះ​ស្ថិតក្រោម​អធិបតីភាព​សម្តេច​តេ​ជោ​នាយករដ្ឋមន្ត្រី​និង​សម្តេច​កិត្តិ​ព្រឹទ្ធ​បណ្ឌិត​ប៊ុនរ៉ានី​ហ៊ុនសែន​រួមជាមួយ​ភ្ញៀវកិត្តិយស​ជាតិ​អន្តរជាតិ​ជាង​២០០​នាក់​ព្រមទាំង​ប្រជាពលរដ្ឋ​ប្រមាណ​៨.៥០០​នាក់​។​ដូច្នេះ​ក្រុមហ៊ុន​ថៃ​ប៊ុន​រ៉ុង​ត្រូវ​សហការ​ជាមួយ​រដ្ឋបាល​ខេត្តកំពត​ក្នុង​កិច្ច​រក្សា​សណ្តាប់ធ្នាប់​របៀបរៀបរយ​និង​ក្តី​សុខ​សុវត្ថិភាព​មួយរយ​ភាគរយ​ដើម្បីឱ្យ​ពិធី​នោះ​ប្រព្រឹត្តទៅ​ប្រកបដោយ​ភាពល្អប្រសើរ​។​

តំណាង​របស់​ក្រុមហ៊ុន​ថៃ​ប៊ុន​រ៉ុង​បានបញ្ជាក់​ឱ្យដឹងថា​រោងចក្រ​ស៊ី​ម៉​តិ៍​ល្អាង​ជា​រោងចក្រ​ផលិត​ស៊ីម៉ង​តិ៍​ទី​បួន​របស់​ខេត្តកំពត​ដែលជា​ករ​បន្ថែម​សក្តានុពល​សេដ្ឋកិច្ច​ថ្មី​មួយទៀត​សម្រាប់​ខេត្ត​។​នៅពេល​ដំណើរការ​រោងចក្រ​ស៊ីម៉ង​តិ៍​ល្អាង​មាន​អានុភាព​អាច​ផលិត​បាន​៣.០០០​តោន​ក្នុង​មួយថ្ងៃ​ស្របពេល​ដែល​ការផលិត​របស់​រោងចក្រ​បី​ទៀត​មាន​បរិមាណ​លើស និង​តិចជាង​នេះ​បន្តិចបន្តួច​។

​សូមបញ្ជាក់ថា​កំពត​ជា​ខេត្ត​មាន​សក្តានុពល​យ៉ាងខ្លាំង​ក្លា​ពិសេស​ផ្នែក​ធនធានធម្មជាតិ​ហើយ​កំពុង​រីកចម្រើន​លើ​គ្រប់​វិស័យ​។ ក្នុងនោះ​វិស័យ​ឧស្សាហកម្ម​ខេត្តកំពត​មាន​រោងចក្រ​ផលិត​ស៊ីម៉ង់ត៍​បី​កន្លែង ដែល​ឆ្នាំ​២០១៨​អាច​ផ្គត់ផ្គង់​ការប្រើប្រាស់​ទូទាំងប្រទេស​ប្រមាណ​ជាង​៧០​ភាគរយ​៕S/​