​សមត្ថកិច្ច​ឃាត់ខ្លួន​បុរស​ម្នាក់​ដែល​ប៉ុនប៉ង​ចាប់រំលោភ​នារី​មិនបាន​សម្រេច​

330

(​កណ្តាល​)៖​កម្លាំង​នគរបាល​ក្រុង​តាខ្មៅ​បាន​ឃាត់ខ្លួន​បុរស​ម្នាក់​តាម​ពាក្យបណ្តឹង​ពីបទ​ប៉ុនប៉ង​រំលោភ​សេពសន្ថវៈ​លើ​នារី​ម្នាក់​ក្នុង​បន្ទប់​ជួល​តែ​មិនបាន​សម្រេច​។​ហេតុការណ៍​បានកើត​ឡើង​នៅ​ចំណុច​ផ្ទះជួល​នៅ​ភូមិ​ព្រែក​សំរោង​សង្កាត់​តាខ្មៅ​ក្រុង​តាខ្មៅ​ខេត្តកណ្តាល​កាលពី​រសៀល​ថ្ងៃទី​៩.​ខែកញ្ញា​ឆ្នាំ​២០១៧​។​

​មន្ត្រី​សមត្ថកិច្ច​បានឱ្យដឹងថា​ជនសង្ស័យ​ឈ្មោះ​ឡាំង សុផល ភេទ​ប្រុស អាយុ​៣១​ឆ្នាំ​នៅ​ភូមិ​អូរ​ឬ​ស្សី​ឃុំ​ស្រែ​ចារ​ស្រុក​ស្នួល​ខេត្តក្រចេះ បច្ចុប្បន្ន​:​ស្នាក់នៅ​ផ្ទះជួល​ភូមិ​ព្រែក​សំរោង សង្កាត់​តាខ្មៅ ក្រុង​តាខ្មៅ ខេត្តកណ្តាល មុខរបរ​រៀន​ជួសជុល​រថយន្ត​។​ចំណែក​នារី​រងគ្រោះ​
​ឈ្មោះ​ស​.​ស​.​រ ភេទ​ស្រី អាយុ​១៦​ឆ្នាំ​នៅ​ភូមិ​ព្រះ​ឃុំ​ព្រៃ​កក់ ស្រុក​ស្ទឹងត្រង់ ខេត្តកំពង់ចាម​បច្ចុប្បន្ន​:​ស្នាក់នៅ ភូមិ​ព្រែក​សំរោង​សង្កាត់​តាខ្មៅ ក្រុង​តាខ្មៅ ខេត្តកណ្តាល មុខរបរ​មើល​កូន​ឱ្យ​ម្ចាស់​ផ្ទះជួល​។​

​មន្ត្រីនគរបាល​បានឱ្យដឹង​ទៀតថា​មុនពេល​កើតហេតុ​ជនរងគ្រោះ​កំពុងតែ​អង្គុយលេង​នៅមុខ​បន្ទប់​ដែល​ខ្លួន​ស្នាក់នៅ​។​ពេលនោះ​ស្រាប់តែ​ជនល្មើស​ដែល​ជួល​បន្ទប់​ស្នាក់នៅ​រំលង​បន្ទប់​ជនរងគ្រោះ​មួយ​បន្ទប់​ក៏បាន​ដើរមក​សុំ​លេខ​ទូរស័ព្ទ​ជនរងគ្រោះ​។​ពេលនោះ​ជនរងគ្រោះ​ក៏បាន​ឱ្យ​លេខ​ទូរស័ព្ទ​ទៅ​ជនល្មើស​ហើយ​ជនល្មើស​បាន​សួរ​ជនរងគ្រោះ​ថា​ក្នុង​បន្ទប់​មាន​ទូរទស្សន៍​មើល​អត់​?​ជនរងគ្រោះ​ឆ្លើយថា​អត់​មាន​ទេ​រួចហើយ ជនរងគ្រោះ​ក៏បាន​ដើរចូល​ទៅក្នុង​បន្ទប់​របស់​កូន​ម្ចាស់ផ្ទះ​ស្នាក់នៅ​ដើម្បី​មើល​ទូរទស្សន៍​។​

​ប្រភព​បាន​បន្តថា​ពេលនោះ​ជនល្មើស​បាន​ដើរចូល​តាម​ទៅហើយ​បាន​ចាប់​ឱប​និង​ខ្ទប់មាត់​ជនរងគ្រោះ​មិនឱ្យ​ស្រែក​និង​បាន​រួត​ខោ​បម្រុង​ចាប់រំលោភ​សេពសន្ថវៈ​តែ​ត្រូវ​ជនរងគ្រោះ​រើ​បម្រាស់​រួច​រត់​ចេញមក​ក្រៅ​ឱ្យគេ​ជួយ​ឃាត់ខ្លួន​ជនល្មើស​ប្រគល់ជូន​សមត្ថកិច្ច​តែម្តង​។​

នៅ​ចំពោះមុខ​សមត្ថកិច្ច​ជនល្មើស​បាន​ឆ្លើយ​សារភាពថា​ខ្លួន​ពិតជា​បាន​ចូលទៅ​ចាប់​ឱ្យ​ជនរងគ្រោះ​បំណង​សុំ​រួមភេទ​ប្រាកដ​មែន​។​តែ​ជនរងគ្រោះ​មិន​ព្រម​ក៏បាន​រត់​ចេញមកក្រៅ​បន្ទប់​ប្តឹង​សមត្ថកិច្ច​តែម្តង​។​សមត្ថកិច្ច​បានធ្វើការ​ឃាត់ខ្លួន​ជនសង្ស័យ​កស​សង​សំណុំរឿង​ទៅតាម​នីតិវិធី​ច្បាប់​៕S/​ដោយ​៖​ហូ​សាន់​