​សមត្ថកិច្ច​ឃាត់ខ្លួន​ជនសង្ស័យ​ម្នាក់​រឹបអូស​គ្រឿងញៀន​៥៥​កញ្ចប់​តូច​នៅ​ស្រុក​ស្អាង​

203

(​កណ្តាល​)៖​កម្លាំង​សមត្ថកិច្ច​បាន​ចុះ​ឆែកឆេរ​លំនៅស្ថាន​មួយកន្លែង​បាន​ឃាត់ខ្លួន​ជនសង្ស័យ​ម្នាក់​និង​រឹបអូស​គ្រឿងញៀន​ប្រភេទ​ម៉ា​ទឹកកក ចំនួន​៥៥​កញ្ចប់​តូច​។​ប្រតិបត្តិការ​នេះ​ធ្វើឡើង​នៅក្នុង​ភូមិ​ព្រែក​តា​ឯក ឃុំ​ត្រើយ​ស្លា ស្រុក​ស្អាង ខេត្តកណ្តាល​កាលពី​វេលា​ម៉ោង ១២ និង ៣០​នាទី ថ្ងៃត្រង់ ថ្ងៃទី​១៩ ខែវិច្ឆិកា ឆ្នាំ​២០១៧ ។​

សមត្ថកិច្ច​បានឱ្យដឹង​ថា​ជន​ដែល​បាន​ឃាត់ខ្លួន​ម្នាក់​ឈ្មោះ មួយ ហ៊ុយ ហៅ អា​កំពិត ភេទ​ប្រុស អាយុ ៤៣​ឆ្នាំ ជនជាតិខ្មែរ មុខរបរ កសិករ​ទីលំនៅ​បច្ចុប្បន្ន​ភូមិ​ព្រែ​កតា​ឯក​ឃុំ​ត្រើយ​ស្លា​ស្រុក​ស្អាង​ខេត្តកណ្តាល​។​វត្ថុតាង​ចាប់យក​រួមមាន​ម្សៅ​ក្រាម​ពណ៌​ស​សង្ស័យថា​ជា​សារធាតុ​ញៀន​ម៉ា​ទឹកកក​ចំនួន ៥៥ កញ្ចប់​តូច និង​ឧបករណ៍​សំរាប់​ប្រើប្រាស់​វេច​ខ្ចប់​គ្រឿងញៀន​មួយចំនួន​។​

​ប្រភព​ដដែល​បាន​បន្តថា​នៅ​ចំពោះមុខ​សមត្ថកិច្ច​នគរបាល ជនសង្ស័យ​បាន​សារភាពថា ខ្លួន​បាន​ទិញ​គ្រឿងញៀន ម៉ា​ទឹកកក​ចំនួន មួយកញ្ចប់​ធំ តម្លៃ ១.២០០.០០០​រៀល​ពី​បុរស​ម្នាក់​មិន​ស្គាល់ឈ្មោះ នៅ​ចំណុច​វាល​ខ្សាច់ រាជធានី​ភ្នំពេញ ដើម្បី​យកមក​វេច​ខ្ចប់​លក់​ក្នុង មួយកញ្ចប់​តូចៗ តម្លៃ ៤០.០០០​រៀល​។ បច្ចុប្បន្ន ជនសង្ស័យ​បាន​ឃាត់ខ្លួន​នៅ​អធិការដ្ឋាន​នគរបាល​ស្រុក​ស្អាង ដើម្បី​កសាង​សំណុំរឿង​តាម​នីតិវិធី​៕S/​ដោយ​៖​ហូ​សាន់​

​សមត្ថកិច្ច​ឃាត់ខ្លួន​ជនសង្ស័យ​ម្នាក់​រឹបអូស​គ្រឿងញៀន​៥៥​កញ្ចប់​តូច​នៅ​ស្រុក​ស្អាង​(រូប៖វ៉េបសាយ)