​សម្តេច​ប្រធានព្រឹទ្ធសភា​ទទួល​ជួប​អនុ​ប្រធានាធិបតី​មី​យ៉ាន់​ម៉ា​

224
ចែករម្លែក

ដោយៈ​សុផល​/​ភ្នំពេញ​៖​កាលពី​រសៀល​ថ្ងៃទី​១៩​ខែវិច្ឆិកា​ឆ្នាំ​២០១៩​នៅ​វិមាន​ព្រឹទ្ធសភា​សម្តេច​វិបុល​សេនា​ភក្តី​សាយឈុំ​ប្រធានព្រឹទ្ធសភា​នៃ​ព្រះរាជាណាចក្រ​កម្ពុជា​បានទទួល​ជួប​សវនាការ​ជាមួយនឹង​លោក​ហេន​រី​វ៉ាន់​ធៀ​(HenryVanThio)​អនុ​ប្រធានាធិបតី​នៃ​សាធារណរដ្ឋ​សហភាព​មី​យ៉ាន់​ម៉ា​ក្នុងឱកាស​ដែល​លោក​អញ្ជើញ​មក​ចូលរួម​កិច្ចប្រជុំ​កំពូល​អាស៊ី​ប៉ាស៊ីហ្វិក​នៅ​ព្រះរាជាណាចក្រ​កម្ពុជា​។​

​ក្នុងនាម​ព្រឹទ្ធសភា​និង​ក្នុងនាម​សម្តេច​ផ្ទាល់​សម្តេច​វិបុល​សេនា​ភក្តី​សាយឈុំ​បាន​សម្តែង​នូវ​ការស្វាគមន៍​ចំពោះ​លោក​អនុ​ប្រធានាធិបតី​ដែល​បាន​អញ្ជើញ​ចូលរួម​កិច្ចប្រជុំ​កំពូល​អាស៊ី​ប៉ាស៊ីហ្វិក​នៅ​ព្រះរាជាណាចក្រ​កម្ពុជា​។ សម្តេច​បាន​បញ្ជាក់ថា កិច្ចប្រជុំ​កំពូល​អាស៊ី​ប៉ាស៊ីហ្វិក ឆ្នាំ​២០១៩-​នៅ​កម្ពុជា ត្រូវបាន​សហការ​រៀប​ចំ​រវាង​រាជរដ្ឋាភិបាល​កម្ពុជា​ជាមួយ​សហព័ន្ធ​សន្តិភាព​សកល​ដែល​ប្រព្រឹត្តទៅ​ចាប់ពី​ថ្ងៃទី​១៨ ដល់​ថ្ងៃទី​២១ ខែធ្នូ ឆ្នាំ​២០១៩​។

​ដូចដែល​លោក​បាន​ជ្រាប​ស្រាប់​ហើយ​ថា ប្រធានបទ​នៃ​កិច្ចប្រជុំ​កំពូល​អាស៊ី​ប៉ាស៊ីហ្វិក​ឆ្នាំ​២០១៩​នេះ គឺ​ពិត​ជាមាន​សារៈសំខាន់​និង​ឆ្លើយតប​ចំពោះ​ស្ថានភាព​សកលលោក​ដែល​កំពុងមាន​ការវិវត្ត​ប្រែប្រួល ដ៏​ឆាប់រហ័ស និង​ប្រកបដោយ​គ្រោះថ្នាក់​។ ហេតុនេះ​ទាមទារ​ឱ្យ​យើងទាំងអស់គ្នា​ចូលរួម​លើកកម្ពស់ កិច្ចសហប្រតិបត្តិការ​ពហុភាគី​និយម​និង​គោរព​នូវ​គោលការណ៍​ច្បាប់​អន្តរជាតិ​ដើម្បី​នាំមក​នូវ​សុខដុម​នីយកម្ម​និង​ការអភិវឌ្ឍ​ប្រកបដោយ​ចីរភាព​។​

​នៅក្នុង​ឱកាស​នោះ​លោក​ហេន​រី​វ៉ាន់​ធៀ​បាន​ថ្លែងអំណរគុណ​ចំពោះ​សម្តេច​ប្រធានព្រឹទ្ធសភា​ដែល​បាន​ចំណាយពេល​ដ៏​មានតម្លៃ​ទទួល​ជួប​នាឱកាស​នេះ​។​លោក​បាន​សម្តែង​នូវ​ការអបអរសាទរ​ចំពោះ​ព្រះរាជាណាចក្រ​កម្ពុជា​ដែល​រៀបចំ​កិច្ចប្រជុំ​កំពូល​អាស៊ី​ប៉ាស៊ីហ្វិក​ឆ្នាំ​២០១៩​នេះ​ប្រកបដោយ​ជោគជ័យ​។​លោក​ហេន​រី​វ៉ាន់​ធៀ​បាន​ជម្រាបជូន​សម្តេច​ព្រឹទ្ធសភា​ថា​សហភាព​មី​យ៉ាន់​ម៉ា​នឹង​រៀបចំ​កិច្ចប្រជុំ​កំពូល​អាស៊ី​ប៉ាស៊ីហ្វិក​លើក​ទី​៣ នៅ​ឆ្នាំ​២០២០​ខាងមុខនេះ​។

​ក្នុងឱកាស​នោះ​លោក​ក៏បាន​រំលឹក​អំពី​ទំនាក់​ទំ​ន​ការទូត​រវាង​សហភាព​មី​យ៉ាន់​ម៉ា​និង​ព្រះរាជាណាចក្រ​កម្ពុជា​ដែល​ត្រូវបាន​បង្កើត​តាំងពី​ឆ្នាំ​១៩៥៥​ហើយ​ទំនាក់ទំនង​មិត្តភាព​សាមគ្គីភាព​និង​កិច្ចសហប្រតិបត្តិការ​រ​វាង​ប្រទេស​ទាំងពីរ​មាន​ភាព​ស្អិតរ​មួ​ត​ពី​តាំងពី​ពេល​បង្កើត​រហូត​ដល់ពេល​បច្ចុប្បន្ន​ជាពិសេស​ការគាំទ្រ​គ្នា​ក្នុង​ក្របខណ្ឌ​តំបន់​និង​អន្តរជាតិ​ដូចជា​ក្នុង​ក្របខណ្ឌ​អាស៊ាន​មហា​អនុតំបន់​ទន្លេមេគង្គ​CLMV​និង​ក្នុង​ក្របខណ្ឌ​អង្គការសហប្រជាជាតិ​។

​លោក​អនុប្រធាន​ធិបតី​បាន​បញ្ជាក់ថា​រដ្ឋាភិបាល​ថ្មី​របស់​ប្រទេស​មី​យ៉ាន់​ម៉ា​មាន​ទំនាក់ទំនង​និង​កិច្ចសហប្រតិបត្តិកា​រយ៉ា​ង​ស្អិតរ​មួ​ត​ជាមួយនឹង​ប្រទេស​កម្ពុជា​ជាពិសេស​ទំនាក់ទំនង​និង​កិច្ចសហប្រតិបត្តិការ​រ​វាង​រដ្ឋាភិបាល និង​ភាគី​ពាក់ព័ន្ធ​នៃ​ប្រទេស​ទាំងពីរ​។ ជាមួយគ្នានេះ សភា​នៃ​ប្រទេស​មី​យ៉ាន់​ម៉ា បាន​ចូល​ជា​សមាជិក​មហាសន្និបាត​អន្តរ​សភា​អាស៊ាន ក្នុង​កិច្ចប្រជុំ​មហាសន្និបាត​អន្តរ​សភា​អាស៊ាន (AIPA)​លើក​ទី​២១​។​ប្រទេស​មី​យ៉ាន់​ម៉ា​និង​កម្ពុជា​បាន​ធ្វើជា​ម្ចាស់ផ្ទះ​រៀបចំ​កិច្ចប្រជុំ​កំពូល​អាស៊ាន​ក្នុង​ឆ្នាំ​២០១៤ និង​ឆ្នាំ​២០១៥​។

​លោក​ហេន​រី​វ៉ាន់​ធៀ​បាន​ថ្លែងអំណរគុណ​ចំពោះ​ប្រទេស​កម្ពុជា​ដែល​បោះឆ្នោត​គាំទ្រ​នូវ​ជំហរ​របស់​សហភាព​មី​យ៉ាន់​ម៉ា​នៅក្នុង​មហាសន្និបាត​អង្គកា​សហប្រជាជាតិ​លើក​ទី​២៤​និង​បាន​ជួយឧបត្ថម្ភ​ជា​ថវិកា​មួយចំនួន​សម្រាប់​ការអភិវឌ្ឍ​នៅ​រដ្ឋ​រ៉ា​ក់​ខា​ញ​នៃ​ប្រទេស​មី​យ៉ាន់​ម៉ា​។​ជាមួយគ្នានេះ​ឯកឧត្តម​បាន​ថ្លែងអំណរគុណ​ចំពោះ​ព្រឹទ្ធសភា​កម្ពុជា​ដែល​បានផ្តល់​អាហារ​រូបករណ៍​ដល់​មន្ត្រីសភា​នៃ​ប្រទេស​មី​យ៉ាន់​ម៉ា​បានមក​បណ្តុះបណ្តាល​នៅ​ព្រឹទ្ធសភា​កម្ពុជា​។​មានសង្ឃឹម​យ៉ាង​មុតមាំ​ថា​ប្រទេស​កម្ពុជា​នឹង​បន្ត​គាំទ្រ​ដល់​ដំណើរការ​សន្តិភាព​និង​ការបង្រួបបង្រួម​ជាតិ​របស់​ប្រទេស​មី​យ៉ាន់​ម៉ា​។

​សម្តេច​ប្រធានព្រឹទ្ធសភា​បាន​ថ្លែងអំណរគុណ​ចំពោះ​ប្រសាសន៍​ដ៏​ថ្លៃថ្លា​របស់​ឯកឧត្តម​អនុ​ប្រធានាធិបតី​ដែល​បានលើកឡើង​អំពី​ទំនាក់ទំនង​ការទូត​រវាង​ប្រទេស​ទាំងពីរ​ត្រូវបាន​បង្កើតឡើង​ក្នុង​រយៈពេល​៦៤​ឆ្នាំកន្លងមក​។​សម្តេច​បាន​បញ្ជាក់ថា ប្រទេស​ទាំងពីរ​គោរព​ប្រតិបត្តិ​ព្រះពុទ្ធសាសនា​ដូចគ្នា និង​ប្រើប្រាស់​ទឹកទន្លេ​មេគង្គ​ដូចគ្នា​ហើយ​ប្រជាជន​នៃ​ប្រទេស​ទាំងពីរ​មាន​ប្រវត្តិ​ស្រឡាញ់​រាប់អាន​គ្នា​ទៅវិញទៅមក​ប្រកបដោយ​មនោសញ្ចេតនា​ដ៏​ជ្រាលជ្រៅ​ជា​យូរលង់​មកហើយ​។​

​សម្តេច​ប្រធានព្រឹទ្ធសភា​បាន​សម្តែង​នូវ​សេចក្តី​រីករាយ​ដោយ​មើលឃើញ​អំពី​ការរីកចម្រើន​ប្រកបដោយ​លទ្ធផល​ជា​ផ្លែផ្កា​នៃ​ចំណងមិត្តភាព និង​កិច្ចសហប្រតិបត្តិការ​រ​វាង​ប្រជាជន និង​ប្រទេស​ទាំងពីរ បន្ទាប់ពី​ដំណើរ​ទស្សនកិច្ច​របស់​លោកជំទាវ ទីប្រឹក្សា​រដ្ឋ​នៃ​សាធារណរដ្ឋ​សហភាព​មី​យ៉ាន់​ម៉ា កាលពី​ខែមេសា​កន្លងទៅនេះ​រដ្ឋាភិបាល​ទាំងពីរ​បាន​ប្តេជ្ញា​ជំរុញ​បន្ថែមទៀត​លើ​កិច្ច​សហប្រតិបត្តិ​គ្រប់​វិស័យ រួមទាំង​ការផ្លាស់ប្តូរ​រវាង​ប្រជាជន និង​ប្រជាជន​។

​សម្តេច​ប្រធានព្រឹទ្ធសភា​បាន​សម្តែង​ការអបអរសាទរ​ចំពោះ​វឌ្ឍនភាព​ផ្នែក​សេដ្ឋកិច្ច​-​សង្គម​របស់​មី​យ៉ាន់​ម៉ា​។​ក្រោម​ការដឹកនាំ​ដ៏​ឈ្លាសវៃ​របស់​ថ្នាក់ដឹកនាំ​ជាន់ខ្ពស់​មី​យ៉ាន់​ម៉ា​និង​ក្រោម​ការដឹកនាំ​របស់​ឯក​ឧ​ត្ត​ម​សម្តេច​មាន​ជំនឿ​ជាក់​ថា​ប្រទេស​មី​យ៉ាន់​ម៉ា​និង​ប្រជាជន​មី​យ៉ាន់​ម៉ាប​ន្ត​រីកចម្រើន​ប្រកបដោយ​វឌ្ឍនភាព និង​វិបុលភាព​។

​តាមរយៈ​លោក​អនុ​ប្រធានាធិបតី​សម្តេច​ប្រធានព្រឹទ្ធសភា​បាន​ផ្តាំផ្ញើ​សួរសុខទុក្ខ​ដោយ​សេចក្តី​គោរព​រាប់អាន​អំពី​សម្តេច​ជូន​ចំពោះ​ឯកឧត្តម​ប្រធានព្រឹទ្ធសភា​មី​យ៉ាន់​ម៉ា​។​ជាមួយគ្នានេះ​សម្តេច​បានបង្ហាញ​អំពី​បំណង​ធ្វើ​កិច្ចសហប្រតិបត្តិការ​ឱ្យ​កាន់តែ​ជិតស្និទ្ធ​រវាង​ព្រឹទ្ធសភា​កម្ពុជា​និង​ព្រឹទ្ធសភា​មី​យ៉ាន់​ម៉ា​ដោយហេតុថា​ឆ្នាំ​២០២០​ខាងមុខនេះ​គឺជា​ខួប​លើក​ទី​៦៥​ឆ្នាំ​នៃ​ការបង្កើត​ទំនាក់ទំនង​ការទូត​រវាង​ប្រទេស​ទាំងពីរ​។​សម្តេច​បានស្នើ​ឱ្យ​សភា​នៃ​ប្រទេស​ទាំងពីរ​ធ្វើការ​ផ្លាស់ប្តូរ​គណៈប្រតិភូ​គ្នា​ទៅវិញទៅមក​។​

​សម្តេច​ប្រធានព្រឹទ្ធសភា បាន​ជម្រាបជូន​លោក ហេន​រី វ៉ាន់ ធៀ ថា ព្រឹទ្ធសភា​កម្ពុជា​នីតិកាល​ទី​៤​នេះ បាន​បង្កើត​ក្រុម​មិត្តភាព​ព្រឹទ្ធសភា ជាមួយនឹង​សភា​សហភាព​មី​យ៉ាន់​ម៉ា​។ តាមរយៈ​ក្រុម​មិត្តភាព​នេះ សម្តេច​សង្ឃឹមថា​សភា​នៃ​ប្រទេស​ទាំងពីរ​នឹង​ខិតខំ​ជំរុញឱ្យមាន​ការផ្លាស់ប្តូ​រ​ទស្សនកិច្ច​ដើម្បី​ស្វែងយល់ និង​ផ្លាស់ប្តូរ​បទពិសោធន៍​គ្នា​ទៅវិញទៅមក​។

ជាមួយគ្នានេះ​សម្តេច​ក៏បាន​បញ្ជាក់ថា​ក្រោម​កិច្ចសហប្រតិបត្តិការ​រ​វាង​អគ្គលេខាធិការដ្ឋាន​ព្រឹទ្ធសភា ជាមួយ​វិទ្យាស្ថាន​សភា​កម្ពុជា​បានទទួល​មន្ត្រី​ពីស​ភា​មី​យ៉ាន់​ម៉ា​មក​ចូលរួម​វគ្គ​បណ្តុះបណ្តាល​ថ្នាក់​តំបន់​នៅក្នុង​ព្រឹទ្ធសភា​កម្ពុជា​លើ​ផ្នែក​ស្រាវជ្រាវ​ចំនួន​២៨​នាក់​ផ្នែក​ការទូត​សភា​ចំនួន​០៥​នាក់​និង​ចូលរួម​វគ្គ​បណ្តុះបណ្តាល​ស្តីពី​ការទទួលខុសត្រូវ​រប​ស់​សភា​លើក​ទី​១​ចំនួន​១០​នាក់​និង​លើក​ទី​២​ចំនួន​០៩​នាក់ ។​

​សម្តេច​ប្រធានព្រឹទ្ធសភា​បាន​វាយតម្លៃ​ខ្ពស់​ចំពោះ​ខ្លឹមសារ​សុន្ទរកថា​ប្រកបដោយ​អត្ថន័យ​ដ៏​ជ្រាលជ្រៅ របស់​ឯកឧត្តម ដែល​រួមវិភាគទាន​ដ៏​ថ្លៃថ្លា​ក្នុង​ការផ្តល់​ទស្សនទាន​ដ៏​សំខាន់​ដល់​កិច្ចប្រជុំ ធ្វើការ ត្រិះរិះ​ពិចារណា និង​ដាក់បញ្ចូល​ក្នុង​សេចក្តីថ្លែងការណ៍​ទីក្រុង​ភ្នំពេញ បន្ទាប់ពី​បញ្ចប់​កិច្ចប្រជុំ​។​

​សម្តេច​ប្រធានព្រឹទ្ធសភា​បាន​បញ្ជាក់ថា​ព្រះរាជាណាចក្រ​កម្ពុជា​ធ្លាប់មាន​បទពិសោធន៍​ប្រកបដោយ​ជោគជ័យ​នៅក្នុង​ដំណើរការ​ផ្សះផ្សា​បង្រួបបង្រួម​ជាតិ​ពិសេស​ការដាក់ចេញ​នូវ​គោលនយោបាយ ឈ្នះ​ឈ្នះ របស់​សម្តេច​អគ្គមហាសេនាបតី​តេ​ជោ ហ៊ុនសែន​នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ដែល​នាំមក​នូវ​សន្តិភាព​ពេញលេញ​មានការ​ឯកភាព​ជាតិ​បូរណភាព​ទឹកដី​ជា​លើកដំបូង​ក្នុង​ប្រវត្តិសាស្ត្រ​របស់​កម្ពុជា ហើយ​កត្តា​សន្តិភាព​នេះ បានធ្វើឱ្យ​កម្ពុជា​មានការ​អភិវឌ្ឍ​រីកចម្រើន​ដ៏​ឆាប់រហ័ស ដែលមាន​កំណើនសេដ្ឋកិច្ច​ជា​មធ្យម ៧​ភាគរយ​ក្នុង​រយៈពេល​ពីរ​ទសវត្ស​រ៍​នេះ​។​

​សម្តេច​ប្រធានព្រឹទ្ធសភា​មាន​សេចក្តី​សង្ឃឹមថា ប្រទេស​មី​យ៉ាន់​ម៉ា​នឹង​សម្រេចបាន​នូវ​ការបង្រួបបង្រួម និង​ផ្សះផ្សារ​ជាតិ​នៅពេល​ខាងមុខនេះ​។​សម្តេច​បាន​ប្រសិទ្ធពរ​បវរ​មហាប្រសើរ​ជូន​ឯកឧត្តម​អនុ​ប្រធានាធិបតី​និង​គណៈប្រតិភូ​សូម​ទទួលបាន​សុខភាព​ល្អ​បរិបូរណ៍​ការស្នាក់អាស្រ័យ​ល្អប្រសើរ​និង​ជោគជ័យ​ត្រចះត្រចង់​ក្នុង​បេសកកម្ម​ដ៏​ខ្ពង់ខ្ពស់​នៅ​ព្រះរាជាណាចក្រ​កម្ពុជា​៕S/

​ចំណងជើង​រូបថត​៖​សម្តេច​ប្រធានព្រឹទ្ធសភា ទទួល​ជួប​អនុ​ប្រធានាធិបតី មី​យ៉ាន់​ម៉ា​