​ស្លាកស្នាម​នៃ​សោកនាដកម្ម​

1564

ដោយ​: អ៊​ន វណ្ណា​រ៉ា / ភ្នំពេញ​: នៅក្នុង​ដំណើរការ​សិក្សា​ស្រាវជ្រាវ ដែលមាន​ការសហការ​វាង​មជ្ឈមណ្ឌល​ឯកសារ​កម្ពុជា ជាមួយ​ក្រុមនិស្សិត​មក​ពី​សាកលវិទ្យាល័យ​ភូមិន្ទ​នីតិសាស្ត្រ និង​វិទ្យាសាស្ត្រ​សេដ្ឋកិច្ច យើង​នឹង​ផ្តោតទៅលើ​បំណែក​តូច​នៃ​ការពិត​ចេញពី​ប្រវត្តិសាស្ត្រ​ដ៏​ស្មុគស្មាញ​នៃ​របប​កម្ពុជា​ប្រជាធិបតេយ្យ ដែល​ប្រជាជន​ទូទៅ ហៅថា របប ប៉ុល ពត ឬ របប​ខ្មែរក្រហម រវាង​ពី​ឆ្នាំ​១៩៧៥ ដល់​១៩៧៩ ដែល​បានសម្លាប់​ប្រជាជន​កម្ពុជា​ស្លូតត្រង់​ប្រមាណ​ជាង​២​លាន​នាក់​។

​ដំបូង​មាន​និស្សិត​ចំនួន​១៤​ក្រុម បានជ្រើសរើស និង​សិក្សា​ស្រាវជ្រាវ​ពី​ប្រធានបទ​ផ្សេងៗ​គ្នា​។ នៅ​ដំណាក់កាល​ចុងក្រោយ មាន​ក្រុមនិស្សិត​ចំនួន​៦​ក្រុម​ប៉ុណ្ណោះ​ក្នុងចំណោម​១៤​ក្រុម ត្រូវបាន​ជ្រើសរើស​ដើម្បី​ធ្វើ​កិច្ច​ការសិក្សា​ស្រាវជ្រាវ ក្នុង​ខេត្ត​ចំនួន​ប្រាំមួយ​ជុំវិញ​ប្រទេស​កម្ពុជា​។ នៅក្នុង​ដំណើរការ​សិក្សា​ស្រាវជ្រាវ​ក្រុមនិស្សិត ត្រូវ​ស្វែងយល់​នូវ​រឿងរ៉ាវ​ប្រវត្តិសាស្ត្រ​ផ្សេងៗ​គ្នា ដើម្បី​ឆ្លើយ​ទៅនឹង​សំណួរ​ជាច្រើន​ទាក់ទង​របប​ខ្មែរក្រហម ដែល​បាន​បន្សល់ទុក​នូវ​សង្គម​មួយ​ដែល​បែកបាក់ ព្រមទាំង​បាន​បំផ្លាញ​នូវ​ហេដ្ឋារចនាសម្ព័ន្ធ​រូបវន្ត អាគារ និង​ធនធានមនុស្ស​ស្ទើរតែ​ទាំងស្រុង​។
​ទាំងអស់នេះ ជា​ស្លាកស្នាម​នៃ​របប​ខ្មែរក្រហម​ដែល​បាន​បន្សល់ទុក​ឲ្យ​ក្មេងជំនាន់ក្រោយ​។

​ទោះបី​ការងារ​ស្រាវជ្រាវ​ទាំងនេះ​ជួប​ការលំបាក ដែល​ត្រូវ​ប្រឈម​ជាមួយនឹង​សោកនាដកម្ម​អំពើ នៃ​ប្រល័យពូជសាសន៍​ដែល​បាន​ដិតដាម​ជាមួយ​ជនរងគ្រោះ និង​សាច់ញាតិ​របស់​ជនរងគ្រោះ​ដែល​ក្រុមនិស្សិត​ត្រូវ​ចុះទៅ​ជួប​ក៏ដោយ ក៏​លទ្ធផល​រំពឹងទុក​នៃ​កិច្ចការ​ស្រាវជ្រាវ​ទាំងនេះ​នឹង​ជួយ​ដល់​ដំណើរការ​ផ្សះផ្សា​ផ្លូវចិត្ត​របស់​ជនរងគ្រោះ និង​ជំរុញ​ឲ្យ​មាន​សន្តិភាព​នៅក្នុង​ប្រទេស​កម្ពុជា​ដែរ​។ ក្រៅពី​ប្រទេស​កម្ពុជា ក៏មាន​ប្រទេស​មួយចំនួន​ដែល​ធ្លាប់មាន​ការសម្លាប់​រង្គាល ការប្រកាន់​ពូជសាសន៍ ទទួលរង​ឥទ្ធិពល​មនោគមន៍វិជ្ជា​សេរី និង​កុម្មុយនីស្ត​ដែរ ដូចជា ប្រទេស​សេ​រ៉ា​ឡេ​អូន រ្វ៉ា​ន់​ដា និង​អាល្លឺម៉ង់ ដែល​ទាមទារ​ឲ្យ​មានការ​សិក្សា​ស្រាវជ្រាវ​ដែរ​។ ការសិក្សា​ស្រាវជ្រាវ​ពី​របប​ប្រល័យពូជសាសន៍ នឹង​ជំរុញ​ឲ្យ​មានការ​ពិភាក្សាគ្នា​រវាង​មនុស្ស​ពី​ជំនាន់​មួយ​ទៅ​ជំនាន់​មួយ​ដើម្បី​ទប់ស្កាត់​កុំ​ឲ្យ​កើតមាន​ការសម្លាប់​រង្គាល​ម្តងទៀត​។ យើង​មិនអាច​ត្រឡប់​ទៅ​អតីតកាល ដើម្បី​ដោះស្រាយ​បញ្ហា​ដ៏​ជូរចត់​នោះ ដូច្នេះ​ការអប់រំ​ប្រជាពលរដ្ឋ​អំពី​ការសិក្សា​ប្រវត្តិសាស្ត្រ​របស់ខ្លួន​មាន​សារសំខាន់​ណាស់ ពីព្រោះ​វា​ជា​ផ្នែក​មួយ​នៃ​ការ​សះស្បើយ​។ នៅ​ពីក្រោយ​នៃ​ស្នាមញញឹម​របស់​ប្រជាជន​ខ្មែរ គឺមាន​ស្លាកស្នាម​នៃ​សោកនាដកម្ម​កើត​លើ​ប្រជាជន​គ្រប់រូប​ដែល​បាន​បាត់បង់​សមាជិកគ្រួសារ​របស់ខ្លួន​។ ការបាត់បង់​ទាំងអស់នេះ​គួរ​ត្រូវបាន​និយាយ​ពិភាក្សាគ្នា​ពី​ជំនាន់​មនុស្ស​មួយ​ទៅ​មនុស្ស​មួយ​ជំនាន់​ទៀត ហើយ​សំណួរ​ដដែលៗ​ក៏ត្រូវ​លើកឡើង​ដែរ​ដូចជា​ហេតុអ្វី​មេដឹកនាំ​ខ្មែរក្រហម​សម្លាប់​ជនជាតិខ្មែរ​គ្នាឯង​? តើ​មេដឹកនាំ​ខ្មែរក្រហម​ឡើងកាន់​អំណាច​ដោយ​របៀប​ណា​? គ្រប់​មេដឹកនាំ​ប្រទេស តែង​នឹក​ស្រមៃ​ដល់​សង្គម​មួយ​ដ៏​ល្អឥតខ្ចោះ គ្មាន​ការជិះជាន់ គ្មាន​វណ្ណៈ ប៉ុន្តែ​ទាំងអស់នេះ​គ្រាន់តែ​ជាការ​នឹក​ស្រមៃ​មួយ​ប៉ុណ្ណោះ​ពីព្រោះ​មនុស្ស​តែងតែមាន​ម​ហិ​ច្ឆិ​តា និង​ក្តី​ស្រមៃ​រៀងៗ​ខ្លួន​។ ឧទាហរណ៍​ទៅក្នុង​សៀវភៅ​មួយ​របស់ ច​ច អូវែ​ល បោះពុម្ព​ក្នុង​ឆ្នាំ​១៩៤៥ បាន​សរសេរ​ពី “​ក​សិ​ដ្នា​នស​ត្វ​” មួយ​ដែល​សត្វ​ទាំងអស់​ធ្វើការ​ប្រឆាំង និង​ឡើងកាន់​អំណាច​ដោយ​ខ្លួនឯង ដោយសារ​មានការ​ជិះជាន់​ពី​មនុស្ស​ដែលជា​ម្ចាស់​របស់ខ្លួន​។ សត្វ​ទាំងនោះ ស្រមៃ​ឃើញ​ការបង្កើត​នៅ​សង្គម​ថ្មី​ដែល​សត្វ​ទាំងអស់​មាន​សិ​ទិ្ធ​សេរីភាព​ស្មើគ្នា​។ សត្វ​ទាំងនោះ​ក៏បាន​ធ្វើការ​បះបោរ ដេញ​ម្ចាស់​ចេញពី​កសិដ្ឋាន​ហើយ​សត្វ​ក៏បាន​ធើ្វ​ជា​ម្ចាស់​លើ​ខ្លួនឯង​។ មិនយូរប៉ុន្មាន​សត្វ​ជ្រូក​ក៏​គ្រប់​គ្រង់ និង​ដឹកនាំ​នៅ​រក​អំណាច​ផ្តាច់ការ ហើយ​បាន​បង្ខំ​សត្វ​ទាំងអស់​ធ្វើការ​ដោយ​មិនមាន​អាហារ​គ្រប់គ្រាន់​។​

​ទាំងនេះ​ជា​រឿងនិទាន​មួយ​ដែល​ឆ្លុះបញ្ចាំង​ពី​មេដឹកនាំ​ផ្តាច់ការ​ក្នុងសង្គម​មួយ​ឈានឡើង​កាន់អំណាច ដូច​នៅ​ប្រទេស​កម្ពុជា​ពី​ឆ្នាំ​១៩៧៥ ដល់​១៩៧៩ ដែល​ប្រជាជន​មិន​នឹកស្មានថា ឈានទៅដល់​ការសម្លាប់​រង្គាល​ប្រជាជន​ខ្មែរ​។ ដើម្បី​ទប់ស្កាត់​កុំ​ឲ្យ​មាន​របប​នេះ​កកើត​ឡើងវិញ ប្រជាជន​ខ្មែរ​គ្រប់រូប​ដែល​រង​ការឈឺចាប់​ទាំង​ផ្លូវកាយ និង​ផ្លូវចិត្ត គួរតែមាន​ការពិភាក្សា​គ្នា និង​ចូលរួម​ចែករំលែក​រឿងរ៉ាវ​ដែល​ខ្លួន​បាន​ឆ្លងកាត់​ទៅ​អ្នកជំនាន់ក្រោយ​។ រឿងរ៉ាវ​ទាំងនេះ គឺជា​ប្រភព​ចំណេះដឹង​ដ៏​ទូលំទូលាយ​ផ្នែក​ប្រវត្តិសាស្ត្រ​ដោយ​អាចនិយាយបាន​ថា​មេរៀន​ប្រវត្តិសាស្ត្រ គឺជា​កញ្ចក់​ឆ្លុះបញ្ចាំង​ពី​បច្ចុប្បន្ន ទៅដល់​អនាគត​៕