​អាជ្ញាធរខេត្ត​ព្រះវិហារ​យក​អំណោយ​ចែកជូន​កងកម្លាំង​ការពារ​ព្រំដែន​មុន​បុណ្យចូលឆ្នាំ​

693

​ដោយៈ​សៅ​វ៉ាន់ឌី​/​ព្រះវិហារ​៖​អាជ្ញាធរខេត្ត​ព្រះវិហារ​កាលពី​ព្រឹក​ថ្ងៃទី​២៦ ខែ​មិនា ឆ្នាំ​២០១៨​នេះ​បាន​ដឹកនាំ​មន្ត្រីរាជការ​អញ្ជើញ​ចុះសួរសុខទុក្ខ សំណេះសំណាល​និង​បាន​នាំ​ថវិកា​សម្ភារៈ​គ្រឿងឧបភោគ​បរិភោគ​ជាច្រើន​ទៀត​យកទៅ​ប្រគល់ជូន​ដល់​អង្គភាព​នានា​ដែល​កំពុង​ឈរជើង​តាម​ខ្សែរ​បន្ទាត់​ព្រំដែន ក្នុង​សមរភូមិ​ទិស​ទី​១​នៅ​ប្រាសាទព្រះវិហារ​។​

ពិធី​នេះ​ត្រូវបាន​ប្រារព្ធ​ធ្វើឡើង​ក្នុង​ទីបញ្ជាការ​កងពលតូច​អន្តរាគមន៍​លេខ​៩ ក្រោម​ការចូលរួម​ពី​លោក​អភិបាលខេត្ត​ព្រះវិហារ និង​កងទ័ព​ដែល​កំពុង​ឈរជើង​តាម​ខ្សែរ​បន្ទាត់​ព្រំដែន ក្នុង​សមរភូមិ​ទិស​ទី​១ ស្ថិតក្នុង​ភូមិ​តេ​ជោ​មរតក ឃុំ​ទឹក​ក្រហម ស្រុក​ជាំ​ក្សាន្ត ខេត្តព្រះវិហារ​។​

​លោក អ៊ុន ចាន់​ដា​អភិបាលខេត្ត​ព្រះវិហារ បានឱ្យដឹងថា អ្វីដែល​ជាការ​ជួបជុំគ្នា​នៅថ្ងៃនេះ គឺ​សំដែង​នូវ​ការសួរសុខទុក្ខ សំណេះសំណាល និង​ការ​ជូនពរ​ដល់​កងកំលាំង​ប្រដាប់អាវុធ​ទាំងអស់។ក្នុងនោះជា​នាយ​ទា​ហ៊ាន​នាយ​ទា​ហ៊ាន​រង​និង​ពល​ទា​ហ៊ាន​ទាំងអស់​ដែល​កំពុងតែ​បំពេញបេសកកម្ម​នៅក្នុង​ទិស​ប្រាសាទព្រះវិហារ​ក្នុង​បុព្វហេតុ​ការពារ​បូរណៈភាព​ទឹកដី​ដែល​បាន​ឆ្លងកាត់​នូវ​ការលំបាក​ការតស៊ូ​យ៉ាង​ស្វិតស្វាញ​ជាច្រើន​ឆ្នាំ​មកហើយ​តាម​ខ្សែរ​បន្ទាត់​ព្រំដែន​នេះ​។​

​លោក​បញ្ជាក់ថា​”​មកដល់ពេលនេះ​ទើប​យើង​ដឹងថា​ការអភិវឌ្ឍ​តាម​បណ្តា​អង្គភាព​និ​មួយៗ​មានការ​រីកចំរើន​ច្រើន​បន្ទាប់ពី​ការការពារ​នៅតាម​ខ្សែរ​បន្ទាត់​ព្រំដែន​កម្ពុជា​-​ថៃ​ក្នុងភូមិ​សាស្ត្រ​ខេត្តព្រះវិហារ​។​កងកម្លាំង​របស់​យើង​មួយចំនួន​បាន​ទៅ​ចូលរួម​ការពារ​តាម​ខ្សែរ​បន្ទាត់​ព្រំដែន​កម្ពុជា​-​ឡាវ ក្នុង​ខេត្តស្ទឹងត្រែង​”​។​

លោក​ក៏បាន​ផ្តាំផ្ញើ​រថា​”​នាយ​និង​ពល​ទា​ហ៊ាន​ទាំងអស់​ត្រូវ​យកចិត្តទុកដាក់​បន្ថែម​ទៅលើ​អ្វី​ដែលជា​កាតព្វកិច្ច​រប​ស់​កងយោធពល​ខេមរៈភូមិន្ទ គឺ​ត្រូវខិតខំ​បង្កើន​ថែមទៀត​នូវ​ការការពារ​នូវ​បូរណៈភាព​ទឹកដី​របស់​យើង​ទោះជា​ប្រទេស​យើង​ស្ថិតក្នុង​ស្ថានភាព​សុខសន្តិភាព​យ៉ាងណាក៏ដោយ ប៉ុន្តែ​យើង​មិនត្រូវ​មានការ​ទ្វេ​ស​ប្រហែស​ក្នុងការ​ការពារ​បូរណៈភាព​ទឹកដី​របស់​យើង​ឡើយ​។

​ជាមួយគ្នានេះដែរ លោក​ក៏បាន​ប្រគល់​ថវិកា​រដ​ល់​អង្គភាព​ទាំង​៨ សរុប​ចំនួន​៧២​លាន​រៀន ក៏ដូចជា​គ្រួសារ​កង​ទ​ព័​ដែល​បាន​ចូលរួម ព្រមទាំង​បាន​រាំលេង និង​លេងល្បែង​ប្រជាប្រិយ​ផ្សេងៗ បង្ក​ការសប្បាយ​ដល់​កង​ទ​ព័​និង​គ្រួសារ​កង​ទ​ព័​ក្នុងឱកាស​បុណ្យចូលឆ្នាំថ្មី​ផងដែរ​៕S/

​អាជ្ញាធរខេត្ត​ព្រះវិហារ​យក​អំណោយ​ចែកជូន​កងកម្លាំង​ការពារ​ព្រំដែន​មុន​បុណ្យចូលឆ្នាំ​