Samsung បង្ហាញ​ទូរស័ព្ទ Galaxy Note 9 ជាមួយ​អេក្រង់ ៦,៤ អ៊ី​ញ ថ្ម​កម្លាំង​យក្ស និង អាច​លេង​ហ្គេម​ខ្នាត​យក្ស Fortnite ជា​លើកដំបូង​លើ Android

417

​ក្រុមហ៊ុន Samsung បានបង្ហាញ​ទូរស័ព្ទ Galaxy Note 9 ថ្មី​របស់ខ្លួន​ខណៈដែល​ក្រុមហ៊ុន​បច្ចេកវិជ្ជា​យក្ស​មួយ​នេះ​កំពុង​ពង្រឹង​តួនាទី​របស់ខ្លួន​ជា​ក្រុមហ៊ុន​ផលិត​ស្មា​ត​ហ្វូ​ន​ធំ​បំផុត​របស់​ពិភពលោក​។​

​ឧបករណ៍​ថ្មី​របស់​ក្រុមហ៊ុន​នៅ​ទីក្រុង​សេ​អ៊ូ​ល​នេះ​ជាថ្មី​ម្តងទៀត​គឺមាន​ប៊ិក​ពិសេស S Pen ដដែល តែ​លើក​នេះ មកជា​ទម្រង់​ថ្មី​ភ្ជាប់​ជាមួយ​មុខងារ Bluetooth​។​

​លើក​នេះ​ក៏​មកជា​មួយ​អេក្រង់​ខ្នាត​យក្ស​ដែរ គឺ​អេក្រង់​ប្រភេទ Super AMOLED Infinity Display ទំហំ ៦,៤ អ៊ី​ញ​ដ៏​អស្ចារ្យ​។​

​ក្រុមហ៊ុន​បាន​អះអាងថា​ទូរស័ព្ទ​នេះ​នឹង “​លើកមុខ​មាត់​ផ្នែក​ល្បឿន​និង​ថាមពល​ម្តងទៀត​” ហើយ​មាន​ជម្រើស ៤ ពណ៌ គឺ ខ្មៅ ស្វាយ ផ្កាឈូក និង​ខៀវ​។

​ក្រុមហ៊ុន Samsung បាន​អះអាងថា Note 9 ត្រូវបាន​រចនា​ឡើង​ជាមួយនឹង​ផ្នត់គំនិត “​ហ្គេម​” ហើយ​បានប្រកាសថា ហ្គេម​អន​ឡាញ Fortnite នឹងមាន​នៅលើ​ទូរស័ព្ទ​ថ្មី​នេះ ដែលជា​ទូរស័ព្ទ​ដើរ​លើ​ប្រព័ន្ធ Android ដំបូង​គេ​បង្អស់​ដែលមាន​ហ្គេម​ប្រភេទ​នេះ​។​

​នាយក​ប្រតិបត្តិ​ផ្នែក​ហ្គេម​របស់​ក្រុមហ៊ុន លោក ធី​ម ស្វ៊ី​នី ក៏បាន​ប្រកាស​អំពី​រូបរាង​ពិសេស​ជា​លក្ខណៈ “Galaxy” ផងដែរ​សម្រាប់​ហ្គេម Fortnite ដើម្បីឱ្យ​ក្រុមអ្នកលេង​ហ្គេម​សម្រិតសម្រាំង​ចូល​ទៅលេង​ហ្គេម​នៅលើ​ឧបករណ៍​ថ្មី​នេះ​។​

Note 9 របស់​ក្រុមហ៊ុន Samsung នឹង​អាច​រក​ទិញ​បាន​ចាប់ពី​ថ្ងៃទី ២៤ ខែសីហា​នៅ​ចក្រភព​អង់គ្លេស​ជាមួយនឹង​តម្លៃ ៨៨៩ ផោន (៩៩៩ ដុល្លារ​) សម្រាប់​ស៊េរី ១២៨GB និង ១.០៩៩ ផោន (១.២៤៩ ដុល្លារ​) សម្រាប់​ស៊េរី ៥១២GB ។​

Samsung បានដាក់​បង្ហាញ Note 9 នៅ​ព្រឹត្តិការណ៍ Samsung Unboxed របស់ខ្លួន​នៅ​ទីក្រុង​ញូវយ៉ក​កាលពី​ថ្ងៃ​ព្រហស្បតិ៍ ទី​៩ សីហា ដែល​ផ្សាយ​ផ្ទាល់​តាម​អ៊ី​ន​ធឺ​ណេ​តទៅ​កាន់​មនុស្ស​ជាង​កន្លះ​លាន​នាក់​ទូទាំង​ពិភពលោក​។

​ចំណុច​គួរឱ្យ​ចាប់អារម្មណ៍​បំផុត​របស់ Note 9 គឺ​ប៊ិក S-pen (​មាន Bluetooth) ប្រព័ន្ធ​ដំណើរការ​ដ៏​ខ្លាំងក្លា (Qualcomm SnapDragon 845 ល្បឿន​លឿន​បំផុត និង​រ៉េ​ម ៨GB) និង ថាមពល​ថ្ម​ខ្នាត​យក្ស (៤០០០ មិ​ល្លី​អំពែរ​ម៉ោង​)​។

Note 9 មាន ២ ស៊េរី គឺ ១២៨GB និង ២៥៦GB ហើយ​អាច​បន្ថែម​មេ​ម​ម៉ូ​រី​ខាងក្រៅ​បាន​ដល់​ទៅ ១TB​ឯណោះ​។

​កាមេរ៉ា​ភ្លោះ​ខាងក្រោម​មាន ២ ប្រភេទ គឺ ប្រភេទ Wide-angle ទំហំ ១២ មេ​ហ្គា​ភិ​ច​សែ​ល និង ប្រភេទ Telephoto (​សម្រាប់​ពង្រីក​រូបភាព​ក្នុង​កម្រិត ១០ គុណ​ឯណោះ​) ទំហំ ១២ មេ​ហ្គា​ភិ​ច​សែ​ល​។ កាមេរ៉ា​ខាងមុខ​មាន​ទំហំ ៨ មេ​ហ្គា​ភិ​ច​សែ​ល​៕ ដោយ៖ កញ្ញាដាលីស

Note 9 បង្ហាញ​ជា​ផ្លូវការ​នៅ​ញូវយ៉ក​កាលពី​ថ្ងៃ​ព្រហស្បតិ៍