​ក្រសួងការបរទេស​ក​ម្ពុ​ជា​សោកស្តាយ ​ដែល​សភា តំណាងរាស្ត្រ​អាម៉េរិក​អនុម័ត​ច្បាប់​ប្រជាធិបតេយ្យ​កម្ពុជា​ឆ្នាំ​២០១៩

764
ចែករម្លែក

ដោយ​: មុនី​រ័ត្ន​/​ភ្នំពេញៈ ក្រសួងការបរទេស​និង​សហប្រតិបត្តិការ​អន្តរជាតិ មានការ​សោកស្តាយ​យ៉ាងខ្លាំង ពេល​បានទទួល​ព័ត៌មាន​ថា សភាតំណាងរាស្ដ្រ​សហរដ្ឋ​អាម៉េរិក ទើបបាន​អនុម័ត «​ច្បាប់​ប្រជាធិបតេយ្យ​កម្ពុជា​ឆ្នាំ ២០១៩ – Cambodia Democracy Act of 2019»​ហើយ​សូម​ធ្វើការ​បដិសេធ​យ៉ាង​ដាច់អហង្កា​រនូវ​ការចោទប្រកាន់ដោយ​គ្មាន​មូលដ្ឋាន​ប្រឆាំងនឹង​រាជរដ្ឋាភិបាល​កម្ពុជា ដោយ​ផ្អែកទៅលើ​ព័ត៌មាន​បំភ្លៃ លំអៀង និង​ព័ត៌មាន​ចាស់​ហួស​សម័យ ដោយសារតែ​ហេតុផល​នយោបាយ និង​ស្តង់ដារ​ពីរ​។​សេចក្តីថ្លែងការណ៍​រប​ស់​អ្នកនាំពាក្យ​ក្រសួងការបរទេស​និង​សហប្រតិបត្តិការ​អន្តរជាតិ ដែលមាន​ខ្លឹមសារ​ដូចតទៅ​:

១. ក្រសួងការបរទេស​និង​សហប្រតិបត្តិការ​អន្តរជាតិ មានការ​សោកស្តាយ​យ៉ាងខ្លាំង ពេល​បានទទួល​ព័ត៌មាន​ថា សភាតំណាងរាស្ដ្រ​សហរដ្ឋ​អាម៉េរិក ទើបបាន​អនុម័ត «​ច្បាប់​ប្រជាធិបតេយ្យ​កម្ពុជា​ឆ្នាំ ២០១៩ – Cambodia Democracy Act of 2019» ។​
២.​អ្នកនាំពាក្យ​ក្រសួងការបរទេស​និង​សហប្រតិបត្តិការ​អន្តរជាតិ​សម្តែង​ការ​ខកចិត្ត​យ៉ាងខ្លាំង​ចំពោះ​ខ្លឹមសារ​នៃ​សេចក្តីព្រាងច្បាប់​នេះ ហើយ​សូម​ធ្វើការ​បដិសេធ​យ៉ាង​ដាច់អហង្ការ​នូវ​ការចោទប្រកាន់​ដោយ​គ្មាន​មូលដ្ឋាន​ប្រឆាំងនឹង​រាជរដ្ឋាភិបាល​កម្ពុជា ដោយ​ផ្អែកទៅលើ​ព័ត៌មាន​បំភ្លៃ លំអៀង​និង​ព័ត៌មាន​ចាស់​ហួស​សម័យ​ដោយសារតែ​ហេតុផល​នយោបាយ និង​ស្តង់ដារ​ពីរ​។ ក្នុងន័យនេះ អ្នកនាំពាក្យ​ក្រសួង​មាន​កាតព្វកិច្ច​ផ្តល់នូវ​ការបកស្រាយ​បំភ្លឺ​ដូចតទៅ​៖

  • សេចក្តីព្រាងច្បាប់​នេះ​ចាប់ផ្តើម​ដោយ​លើកឡើងថា​ សម្តេច​តេ​ជោ​ហ៊ុនសែន​គឺជា​មេដឹកនាំ​ដែល​បាន​កាន់តំណែង​យូរ​ជាងគេ​បំផុត​នៅ​អាស៊ីអាគ្នេយ៍​។ ការ​កាន់តំណែង​យូរ​ដូច្នេះ មិនមែន​មិនដែល​មាននៅ​ក្នុង​បណ្តា​ប្រទេស ដែល​ប្រកាន់យក​នូវ​ប្រព័ន្ធ​នយោបាយ​បែប​សភានិយម នៅតាម​តំបន់​នានា​នោះឡើយ​។ ទាំង​រដ្ឋធម្មនុញ្ញ និង​ច្បាប់​ពាក់ព័ន្ធ​នៃ​ព្រះរាជាណាចក្រ​កម្ពុជា មិនបាន​កំណត់​អាណត្តិ​របស់​នាយករដ្ឋមន្ត្រី​នោះទេ ដរាបណា​គណបក្ស​រប​ស់គា​ត់​ទទួលបាន​ការគាំទ្រ​ភាគច្រើន​ពី​អ្នកបោះឆ្នោត ដែលអនុវត្តន៍សិទ្ធិ​នយោបាយ​របស់ខ្លួន​ដោយ​សេរី នៅក្នុង​ការបោះឆ្នោត​ជា​ទៀងទាត់ ដែល​ត្រូវបាន​ឃ្លាំមើល​ដោយ​អ្នកសង្កេតការណ៍​ជាតិ​និង​អន្តរជាតិ​។ អាស្រ័យហេតុនេះ ការជាប់ឆ្នោត​សាជាថ្មី​ឡើងវិញ ពុំមែន​មានន័យថា​គ្មាន​ប្រជាធិបតេយ្យ​នោះទេ ហើយក៏​មិនមែនជា​បទល្មើសនោះដែរ​។​
  • ការបដិសេធ​មិន​ទទួលស្គាល់​ភាពស្របច្បាប់​នៃ​ការបោះឆ្នោត​កន្លងមក​នៅ​ក្នុងប្រទេស​កម្ពុជា គឺជា​ការ​មើលងាយ​ទាំងស្រុង​ចំពោះ​ឆន្ទៈ​របស់​អ្នកបោះឆ្នោត​កម្ពុជា និង​ជាការ​បដិសេធ​
    ​នូវ​ការពិត​។ ការបោះឆ្នោត​លើកទីមួយ​នៅ​ឆ្នាំ​១៩៩៣ ត្រូវបាន​ផ្តួចផ្តើម​និង​រៀបចំ​ដោយ​​អង្គការសហប្រជាជាតិ​។ ការបោះឆ្នោត​នៅ​ឆ្នាំ​១៩៩៨ ត្រូវបាន​ប្រធាន​ក្រុម​អ្នកសង្កេតការណ៍អាមេរិក ចាត់ទុកថា​ជា «​អព្ភូតហេតុ​ដ៏​អស្ចារ្យ​នៃ​ដង​ទន្លេមេគង្គ​» ។ ការបោះឆ្នោត​នៅ​ឆ្នាំ​២០១៣ ត្រូវបាន​ចាត់ទុកថា​មាន​លក្ខណៈ​សេរី​និង​យុត្តិធម៌​ណាស់ ដោយ​គណបក្សប្រឆាំង​បាន​កើន​២៦​អាសនៈ ហើយ​គណបក្សកាន់អំណាច​បាន​បាត់បង់​២៣​អាសនៈ​។ ស្ថានទូត​អាមេរិក​ប្រចាំ​នៅ​ទីក្រុង​ភ្នំពេញ បាន​អំពាវនាវ​ឱ្យ​គ្រប់​គណបក្សនយោបាយ​ទាំងអស់​ទទួលយក​លទ្ធ​ផល​នៃ​ការបោះឆ្នោត​ឃុំ​-​សង្កាត់​ឆ្នាំ​២០១៧ ដោយ​រៀបរាប់ថា​ការបោះឆ្នោត​មាន​សណ្ដាប់ធ្នាប់​និង​ពុំមាន​អំពើហិង្សា​និង​ជា​ព្រឹត្តិការណ៍​ដ៏​សំខាន់​មួយ​ក្នុង​ការបន្ត​អភិវឌ្ឍ​តាមបែប​លទ្ធិប្រជាធិបតេយ្យនៅ​កម្ពុជា​។ ការបោះឆ្នោត​នៅ​ឆ្នាំ​២០១៨ បាន​ប្រព្រឹត្ត​ទៅដោយ​ពុំមាន​អំពើហិង្សា មាន​សណ្តាប់ធ្នាប់ សេរី​និង​យុត្តិធម៌ ដោយមាន​អ្នកចូលរួម​បោះឆ្នោត​រហូតដល់ ៨៣,០២% ទោះបីជា​មានការ​អំពាវនាវ​របស់​ក្រុម​ក្រៅច្បាប់​ឱ្យធ្វើ​ពហិការ​មិន​ចូលរួម​ក៏ដោយ​។ តួលេខ​នេះ​មិន​ត្រឹមតែ​បង្ហាញ​ពី​បំណងប្រាថ្នា​របស់​ប្រជាជន​កម្ពុជា​ចង់ឃើញ​ការបន្ត​និរន្តរភាព ក្នុង​មាគ៌ា​ប្រកបដោយ​សន្តិភាព​ស្ថិរភាព​ប្រជាធិបតេយ្យ​និង​នីតិរដ្ឋ​ប៉ុណ្ណោះ​ទេ ​ប៉ុន្តែ​ថែមទាំង​បង្ហាញ​ពី​ទំនុកចិត្ត​ជាថ្មី​របស់​ពួកគេ​ចំពោះ​ការដឹកនាំ​របស់​គណបក្ស​កាន់អំណាច​ក្នុង​កិច្ចខិតខំ​ប្រឹងប្រែង​រប​ស់​ខ្លួន​ដើម្បី​សម្រេច​ឱ្យបាន​គោលដៅ​ទាំងនេះ​។​
  • ការចាប់ខ្លួន​លោក កឹម សុខា អតីត​ប្រធាន​គណបក្ស​សង្គ្រោះ​ជាតិ (CNRP) និង​ការរំលាយ គណបក្ស​របស់គាត់​ដោយ​តុលាការ​កំពូល គឺ​ត្រូវបាន​ធ្វើឡើង​ដោយ​អនុលោម​ទាំងស្រុង​ទៅតាម ច្បាប់​ជា​ធរមាន​របស់​រដ្ឋ​អធិបតេយ្យ​មួយ ក្នុង​ស្មារតី​ថែរក្សា​សន្តិភាព និង​ស្ថិរភាព ព្រមទាំង ការការពារ​អធិបតេយ្យភាព និង​ឯករាជ្យភាព​របស់​កម្ពុ​ជា​។ គាត់​ត្រូវបាន​ចោទប្រកាន់​ពីបទ សន្ទិដ្ឋិភាពជា មួយ បរទេស ដែល​ត្រូវ​ផ្តន្ទាទោស​តាម​ក្រមព្រហ្មទណ្ឌ​កម្ពុជា​(​មាត្រា​៤៤៣)​។​
  • សេចក្តីព្រាង​នៃ «​ច្បាប់​ប្រជាធិបតេយ្យ​កម្ពុជា​ឆ្នាំ ២០១៩» នេះ បាន​ទំលាក់កំហុស​ទៅលើ​បទ​ប្បញ្ញត្តិ​ទាំងឡាយ​នៃ​ច្បាប់​ស្តីពី​សមាគម និង​អង្គការ​មិនមែន​រដ្ឋាភិបាល (LANGO) ដែល​តាមពិតទៅ ច្បាប់​នេះ​មាន​ដូចគ្នា​នៅក្នុង​ប្រទេស​លោកខាងលិច​ជាច្រើន ដើម្បី​ធានា​តម្លាភាព​និង​គណនេយ្យភាព​របស់​ស​មា​គម និង​អង្គការ​មិនមែន​រដ្ឋាភិបាល​ទាំងនោះ​។ ជាការ​ពិតណាស់ ច្បាប់ LANGO នេះ ត្រូវបាន​តាក់តែងឡើង ដោយ​ដកស្រង់​បទពិសោធន៍​ល្អៗ​ជាច្រើន​ចេញពី​ច្បាប់​ស្តីពី​អង្គការ​មិនមែន​រដ្ឋាភិបាល​របស់​ប្រទេស​នានា​ដែលមាន​ភាពចាស់ទុំ​ខាង​ប្រជាធិបតេយ្យ រួមមាន សហរដ្ឋអាមេរិក​ផងដែរ​។ ច្បាប់​នេះ​ក៏មាន​អត្ថន័យ​ស្របតាម​មាត្រា​៤២​នៃ​រដ្ឋធម្មនុញ្ញ​កម្ពុជា មាត្រា​២០​នៃ​សេចក្តីថ្លែងការណ៍​សកល​ស្តីពី​សិទ្ធិមនុស្ស និង​មាត្រា​២២​នៃ​អនុសញ្ញា​អន្តរជាតិ​ស្តីពី​សិទ្ធិ​ស៊ីវិល​និង​
    ​នយោបាយ​។ ករណី​វិទ្យាស្ថានជាតិប្រជាធិបតេយ្យ​(NDI) គឺពាក់ព័ន្ធ​នឹង​ការខកខាន​មិនបាន​អនុវត្តតាម​មាត្រា​៣៤ នៃ​ច្បាប់​ស្តីពី​សមាគម​និង​អង្គការ​មិនមែន​រដ្ឋាភិបាល​។​
  • សេចក្តីព្រាងច្បាប់​នេះ រិះគន់​ខុស​អំពី​ការ​រឹតត្បិត​សេរីភាព​សារព័ត៌មាន និង​ប្រាសចាក​ឆ្ងាយ​ពី​ការពិត​។ ការពិត​នោះ​គឺ កាសែត​និង​បណ្តាញសារព័ត៌មាន​មួយចំនួន​តូច​ប៉ុណ្ណោះ ដែលបានជ្រើសរើស​តាម​ឆន្ទៈ​របស់ខ្លួន ក្នុងការ​បញ្ឈប់​ប្រតិបត្តិការ​របស់​ពួកគេ​នៅពេល​ប្រឈម​នឹង​កាតព្វកិច្ច​សារពើពន្ធ​និង​ការរំលោភបំពាន​ច្បាប់សារព័ត៌មាន​របស់​កម្ពុជា​។ កម្ពុជា​លើកកម្ពស់​យ៉ាងខ្លាំង​នូវ​សេរីភាព​សារព័ត៌មាន​និង​ការបញ្ចេញមតិ ដោយ​ឈរលើ​មូល​ដ្ឋា​ន​នីតិរដ្ឋ ដូច​បានបង្ហាញ​តាមរយៈ​បរិយាកាស​ប្រព័ន្ធ​ផ្សព្វផ្សាយ​យ៉ាង​រស់​រវើក​នៃ​អង្គការ កាសែត ទូរទស្សន៍ និង​វិទ្យុ ដែល​បាន​ចុះបញ្ជី​ជាង​១០០០​ស្ថាប័ន កំពុងដំណើរការ ហើយ​មានការ​រិះគន់​ចំពោះ​រាជ រដ្ឋាភិបាល​។ ជាងនេះទៅទៀត ជាមួយនឹង​ទូរស័ព្ទ​ចល័ត​ដែល​ភ្ជាប់អ៊ីនធឺណិត ជាង​១៣​លាន​៦​សែន​គ្រឿង នៅ​ឆ្នាំ​២០១៨ ប្រជាជន​កម្ពុជា​រីករាយ​នឹង​លទ្ធភាព​ទទួលបាន​ព័ត៌មាន​គ្មាន ដែន​កំណត់ ឆាប់រហ័ស និង​គ្មាន​ការ​រឹតត្បិត ដែល​រួមមាន​ទាំង​វិទ្យុ​អាស៊ីសេរី វិទ្យុ​សម្លេង​សហរដ្ឋអាមេរិក (VOA) និង​កាសែត​ឌឹ​ខេ​ម​បូ​ឌា​ដេលី ព្រមទាំង​ការចែករំលែក​ព័ត៌មាន​ផ្ទាល់ខ្លួន​តាម​អ៊ិន​ធឺ​ណិ​ត និង​លើ​បណ្តាញ​សង្គម​ផ្សេងៗ​ទៀតផង​ដែរ​។​
  • សមាជិកសភា​ដែល​ស្នើច្បាប់​នេះ ហាក់ដូចជា​មើលរំលង​ការពិត​ជាក់ស្តែង ដែល​រាជ​រដ្ឋា ភិ​បាល​កម្ពុជា​បាន​ឯកភាព​តាម​សំណើ​របស់​ស្ថានទូត​អាមេរិក​នៅ​ភ្នំពេញ ចំពោះ​ការផ្តល់​ទិដ្ឋាការ ចូល​និង​ស្នាក់នៅ​ក្នុងប្រទេស​កម្ពុជា​រយៈពេល​១២​ខែ ដល់​អ្នកស្ម័គ្រចិត្ត Peace Corps នៅ​ខែមករា​កន្លងមកនេះ និង​ការអនុញ្ញាតឱ្យ​បើក​ការិយាល័យ​តំណាង​របស់​វិទ្យុ​VOA នៅ​កម្ពុជា​ឡើងវិញ នៅ​ខែឧសភា ឆ្នាំ​២០១៩​។ នេះ​ជា​ឧទាហរណ៍​ពីរ ក្នុងចំណោម​ឧទាហរណ៍​ជាច្រើន​ដែល​បានបង្ហាញ​ឲ្យ​ឃើញថា សេចក្តីព្រាងច្បាប់​នេះ បាន​ពឹង​ផ្អែកលើ​ព័ត៌មាន​ចាស់ៗ​ដែល​ហួសសម័យកាល​។​
  • ដោយសារ​មាន​ចេតនា​អាក្រក់ ទើប​សេចក្តីព្រាងច្បាប់​នេះ មិនមាន​លើក​ចំណុច​យោង​ណាមួយ​ទាក់ទង​ទៅដល់​វោហា​រសាស្ត្រ​ប្រជា​និយម​ដ៏​គ្រោះថ្នាក់​របស់​ក្រុមប្រឆាំង​មួយចំនួន​នៅ​កម្ពុជា ដែល​ប្រើប្រាស់​វិធីសាស្ត្រ​ប្រមាថ និង​បង្កាច់បង្ខូច​មិន​រើសមុខ អុចអាល បង្ក​ការ​ស្អប់​ជាតិ​សាសន៍ និង​ការ​ស្អប់​ជនបរទេស បំផុស​ជាតិនិយម​ជ្រុល អំពាវនាវ ឱ្យ​យោធា​ប្រឆាំងនឹង​រដ្ឋាភិបាល និង​បំផ្លិចបំផ្លាញ​ការបោះឆ្នោត​តាមបែប​ប្រជាធិបតេយ្យ ដែល​ទាំងអស់នេះ ត្រូវបាន​ទទួល​ការ​ស្អប់ខ្ពើម​យ៉ាងខ្លាំង​នៅក្នុង​គ្រប់​សង្គម​ប្រជាធិបតេយ្យ​នានា​។ ការវាយតម្លៃ​ដោយ​យុត្តិធម៌​និង​សត្យានុម័ត អំពី​សេរីភាព​នយោបាយ​និង​សិទ្ធិមនុស្ស មិនត្រូវ​ភ្លេច​ពី​ធាតុពិត​នៃ​គណបក្សប្រឆាំង​មួយ​ដែល​គ្មាន​លក្ខណៈ​គ្រប់គ្រាន់​នោះទេ​។ ជាងនេះទៅទៀត ប្រតិកម្ម​របស់​សហរ​ដ្ឋ​អា​ម៉​រិ​ក​ចំពោះ​ការវិវត្ត​នយោបាយ​ថ្មីៗ​នៅ​កម្ពុជា ហាក់ដូចជា​មិនបាន​ស្តែងចេញ​តាមរយៈ​គុណ​តម្លៃ​ប្រជាធិបតេយ្យ​នោះទេ បើ​ពិនិត្យ​ទៅលើ​ភាពខុសគ្នា​នៃ​នយោបាយ​របស់​សហរដ្ឋ​អាមេរិក​ជាមួយ​ប្រទេស​ផ្សេងៗ​ទៀត ពាក់ព័ន្ធ​នឹង​បញ្ហា​ប្រជា​ធិ​ប​-​តេ​យ្យ​និង​ការគោរព​សិទ្ធិមនុស្ស​។​
    ៣. ខ្លឹមសារ​នៃ​សេចក្តីព្រាងច្បាប់​នេះ កាន់តែ​បង្ក​ការរំខាន​ថែមទៀត នៅពេលដែល​បុគ្គល​សាធារណៈ​របស់​រដ្ឋ​អធិបតេយ្យ​មួយ បាន​ក្លាយជា​កម្មវត្ថុ​នៃ​វិធានការ​ដាក់ទណ្ឌកម្ម​ពី​សំណាក់​រដ្ឋ​មួយ​ផ្សេងទៀត ដោយ​ផ្អែកលើ​ការចោទប្រកាន់​គ្មាន​មូលដ្ឋាន​។ នេះ​គឺជា​ការរំលោភបំពាន​យ៉ាង​ជាក់ស្តែង​ចំពោះ​គោលការណ៍​អន្តរជាតិ​ស្តីពី​អធិបតេយ្យភាព សមភាព និង​ការមិន​ជ្រៀត​ជ្រែកចូល​កិច្ចការ​ផ្ទៃក្នុង ដូច​មានចែង​ក្នុង​មាត្រា​២​នៃ​ធម្មនុញ្ញ​អង្គការសហប្រជាជាតិ​។​
    ៤. អ្នកនាំពាក្យ​ក្រសួងការបរទេស និង​សហប្រតិបត្តិការ​អន្តរជាតិ ចាត់ទុកថា​ការអនុម័ត​សេចក្តីព្រាងច្បាប់​ខាងលើ​របស់​សភា​សហរ​ដ្ឋ​អាមេរិក ដើរ​ផ្ទុយទៅនឹង​កិច្ចខិតខំ​ប្រឹងប្រែង​ដែល​ប្រទេស​ទាំងពីរ​កំពុងប្រកាន់យក ក្នុងការ​លើកកម្ពស់​ភា​ព​ជា​ដៃគូ​គ្រប់​វិស័យ ដោយ​ផ្អែកលើ​ផលប្រយោជន៍​រួម​និង​ការគោរព​គ្នា​ទៅវិញទៅមក​។ ថ្វីបើ​មាន​សម្ពាធ​ដ៏​អយុត្តិធម៌ និង​ការដាក់ទណ្ឌកម្ម​ជា​ឯកតោភាគី​ពី​សំណាក់​សហរដ្ឋអាមេរិក​ក្តី ក៏​រាជរដ្ឋាភិបាល​កម្ពុជា​បាន​ជ្រើស​យក​អភិក្រម​វិជ្ជមាន​ប្រកបដោយ ភាពស្មោះត្រង់ ក្នុង​ការបន្ត​កិច្ចសហប្រតិបត្តិការ​ជាមួយ​សហរដ្ឋអាមេរិក​លើ​វិស័យ​ជាច្រើន ដូចជា បេស​កកម្ម មនុស្សធម៌ «​ស្តង់ដារ​មាស​» MIA/POW កម្មវិធី​មាតុភូមិនិវត្តន៍ យ៉ាងសកម្ម ការចាប់ផ្តើម​ឡើងវិញ​នូវ​កិច្ចសន្ទនា​យោធា ការគាំទ្រ​ដល់​អ្នកស្ម័គ្រចិត្ត Peace Corps និង​ការប្រយុទ្ធ​រួមគ្នា​យ៉ាងសកម្ម​ប្រឆាំងនឹង​ការ​ប្រឈម​ផ្នែក​សន្តិសុខ​មិន​ប្រពៃណី (​ភេរវកម្ម និង​ការជួញដូរ ជាដើម​)​។​
    ៥. អ្នកនាំពាក្យ​ក្រសួងការបរទេស និង​សហប្រតិបត្តិការ​អន្តរជាតិ សូម​សំដែង​ជាថ្មី នូវ​ការប្តេជ្ញាចិត្ត​ឥត​ងាករេ​របស់​កម្ពុជា ក្នុងការ​ប្រកាន់យក​ល​ទ្ធិ​ប្រជាធិបតេយ្យ សេរី​ពហុបក្ស និង​លើកកម្ពស់​នីតិរដ្ឋ និង​ការគោរព​សេរី​ភាពជា​មូលដ្ឋាន ស្របទៅតាម​រដ្ឋធម្មនុញ្ញ​របស់​កម្ពុជា​។ លើសពីនេះ​ទៀត ​អ្នកនាំពាក្យ​ក្រសួងការបរទេស និង​សហប្រតិបត្តិការ​អន្តរជាតិ ទទូច​ដល់​អង្គនីតិប្បញ្ញត្តិ​បរទេស​ទាំងអស់ រក្សា​នូវ​ភាព​ឥត​លំអៀង​របស់ខ្លួន និង​ចៀសវាង​នូវ​សកម្មភាព​មិនចាំបាច់​នានា​ដែល​មិន​គោរព​ដល់​អធិបតេយ្យភាព និង​កិច្ចការ​ផ្ទៃក្នុង​របស់​កម្ពុជា​៕​សរន​/Ha

ទីតាំងផ្សាយពាណិជ្ជកម្ម