កម្មវិធី​សម្ដែង​សិល្បៈ «​រាត្រី​ចងចាំ​» ប្រព្រឹត្តទៅ​យ៉ាង​អ​ធឹ​ក​អធម នៅ​ព្រះ​លានជល់ដំរី​នៅលើ​ទឹកដី​អង្គរ​

483
ចែករម្លែក

ដោយ​: គូលែន / សៀមរាប​: កម្មវិធី​សម្ដែង​សិល្បៈ «​រាត្រី​ចងចាំ​» ដើម្បី​អបអរ​ខួប​មួយឆ្នាំ​ក្នុងការ​ចុះបញ្ជី​ល្ខោនខោល​ចូល​ជា​សម្បត្តិ​បេតិកភណ្ឌ​វប្បធម៌​អរូបី​នៃ​មនុស្សជាតិ ២៨ វិច្ឆិកា ឆ្នាំ​២០១៨-២៨ វិច្ឆិកា ឆ្នាំ​២០១៩ នា​ល្ងាច​ថ្ងៃទី​២៨ ខែវិច្ឆិកា ឆ្នាំ​២០១៩ នៅ ព្រះ​លានជល់ដំរី​នៅលើ​ទឹកដី​អង្គរ ដោយមាន​ការចូលរួម​ពី​លោកស្រី ភឿង ស​កុ​ណា រដ្ឋមន្ត្រីក្រសួង​វប្បធម៌ និង​វិចិត្រសិល្បៈ និង​ជា​ប្រធាន​អាជ្ញាធរ​ជាតិ​អប្សរា​។​

​លោកស្រី ភឿង ស​កុ​ណា បាន​ថ្លែងថា កម្មវិធី​នៅពេលនេះ​ផ្តោតលើ​សម្បត្តិ​បេតិកភណ្ឌ​អរូបី​របស់​មួយចំនួន ដែល​បាន​ចុះ​ក្នុង​បញ្ជី​បេតិកភណ្ឌ​វប្បធម៌​អរូបី​របស់​មនុស្សជាតិ រួមមាន​របាំ​ព្រះរាជ​ទ្រព្យ ល្ខោន​ស្រមោល​ស្បែក​ធំ និង​ចាប៉ីដងវែង​។ ដោយឡែក ការរៀបចំ​រាត្រី​ចងចាំ​នៅ​ព្រះ​លានជល់ដំរី​នៅលើ​ទឹកដី​អង្គរ អតីត​បេះដូង​នៃ​មហានគរ​ខ្មែរ ពិត​ជាមាន​សារសំខាន់​ណាស់​សម្រាប់​ប្រជាពលរដ្ឋ​ខ្មែរ​ដើម្បី​បំផុស​ឡើងវិញ​ឱ្យ​កូន​ខ្មែរ​ទាំងអស់​ដឹង​អំពី​ទេពកោសល្យ ការច្នៃប្រឌិត​ពី​បញ្ញាញាណ​របស់​ដូនតា​យើង​។​

​លោកស្រី​បាន បញ្ជាក់ថា ជាពិសេស​កម្មវិធី​នេះ​ក៏បាន​បង្ហាញ​ពី​កម្លាំង​រួបរួម​របស់​ជាតិខ្មែរ ហើយ​កាលណា​យើង​រួមគ្នា គឺ​យើង​អាចធ្វើ​បាន​។ លោកស្រី​ក៏បាន​អំពាវនាវ​ឱ្យ​បន្ត​ស្មារតី​ទៅមុខទៀត ហើយ​គ្មាន​អ្វីដែល​ថែ​បានល្អ​ជាង​ប្រជាជន​ខ្លួនឯង ហើយ​គ្មាន​អ្វីដែល​អាច​ថែ​បានល្អ​ជាង​យុវជន​ជំនាន់​ក្រោយ​ទេ ដើម្បី​ថែរក្សា​សម្បត្តិ​បេតិកភណ្ឌ​ដែល​ដូនតា​ប្រឹង​បង្កើតឡើង​ទុក​ទៅ​អ្នកជំនាន់ក្រោយៗ​ទៀត​។

​លោកស្រី ក៏បាន​បង្ហាញ​នូវ​បំណង​ក្នុងការ​ឲ្យ​មានការ​បំផុស​ចលនា​ចូលរួម​ផ្សព្វផ្សាយ​អំពី​សិល្បៈ​វប្បធម៌​របស់​ជាតិខ្មែរ​ឱ្យ​កាន់តែ​មាន​ភាព​ល្បី​រន្ទឺ​ក្នុង​កម្រិត​ជាតិ​និង​អន្តរជាតិ​។

​លោកស្រី​រដ្ឋមន្ត្រី​ក៏បាន​ថ្លែង​អរគុណ​ដល់​ក្រសួង​ស្ថាប័ន​មួយចំនួន​ដែល​សហការ​ចូលរួម​ក្នុង​កម្មវិធី​នេះ និង​បង្ហាញ​អារម្មណ៍​រីករាយ​ជា​ពន់ពេក​ពេល​ឃើញ​មហាជន​ចូលរួម​ទស្សនា​យ៉ាងច្រើន​កុះករ ដែល​ឆ្លុះបញ្ចាំង​នូវ​ស្មារតី​រួបរួម​ជាតិ ស្រឡាញ់​និង​មាន​មោទនភាព​ចំពោះ​បេតិកភណ្ឌ​វប្បធម៌​ជាតិ​របស់ខ្លួន​៕ ល​

ទីតាំងផ្សាយពាណិជ្ជកម្ម