រដ្ឋាភិបាល និងវិស័យឯកជន ជជែក​​ពីការកែលំអនិងដំណោះស្រាយបញ្ហា​ស្ទះចរាចរណ៍ និង សុវត្ថិភាពផ្លូវថ្នល់

310
ចែករម្លែក

ដោយៈសុផល/ភ្នំពេញ ៖ រាជរដ្ឋាភិបាលកម្ពុជា អង្គការកម្មវិធីអភិវឌ្ឍសហប្រជាជាតិ (UNDP) និងក្រុមហ៊ុន Grab តាមរយៈគម្រោងចល័តភាពក្នុងទីប្រជុំជនប្រកបដោយនិរន្តរភាព Sustainable Urban Mobility for All Initiative (SUMAI) បានរៀបចំ វេទិកាពិភាក្សាមួយដោយផ្តោតលើការកែប្រែ និងដំណោះស្រាយចំពោះបញ្ហាបរិស្ថាន ការស្ទះចរាចរណ៍និងសុវត្ថិភាពផ្លូវថ្នល់​ជាពិសេសការវិនិ​យោគលើចរាចរណ៍និងការដឹកជញ្ជូនក្នុងទីប្រជុំជន។

គួរកត់សម្គាល់ថានគរូបនីយកម្មដ៏ឆាប់រហ័សបាននាំមកនូវឱកាសដ៏ធំធេងយ៉ាងពិតប្រាកដ​សម្រាប់កម្ពុជា ប៉ុន្តែវាក៏មានបញ្ហាប្រឈមមួយចំនួនគួរឱ្យកត់សម្គាល់ និង បង្កការគំរាមកំហែងដែលធ្វើឱ្យគេមិនអាចជំនះបញ្ហានេះបានប្រសិនបើ​មិនដោះស្រាយប្រកបដោយប្រសិទ្ធភាពដោ​យ​ក្នុងនោះរួមមានបញ្ហាការបំពុលខ្យល់អាកាស ការកកស្ទះចរាចរណ៍ និង សុវត្ថិភាពផ្លូវថ្នល់។

វេទិកាស្តីពីការចល័តនៅតំបន់ទីក្រុងនេះ ផ្តល់នូវឱកាសដ៏ពិសេសមួយដើម្បីស្វែងយល់អំពីគំនិតយោបល់ និងសម្លេងថ្មីៗពីវាគ្មិនដែលផ្តល់ការជម្រុញលើកទឹកចិត្ត តាមរយៈការបន្តទទួលបានបច្ចុប្បន្នភាពអំពីការ អនុវត្តនិងបច្ចេកវិទ្យាចុងក្រោយដែលគេប្រើប្រាស់នៅក្នុងការចល័​​តនៅតំបន់ទីក្រុង ក្នុងគោលបំណងធ្វើឱ្យ កាន់តែមានសុវត្ថិភាព កាន់តែមិនប៉ះពាល់បរិស្ថាន និង កាន់តែប្រកបដោយបរិយាប័ន។

វេទិកាសំណេះសំណាលស្តីពីចល័តភាពក្នុងទីប្រជុំជន៖ ចូលរួមកែប្រែ និងវិនិយោគលើចរាចរណ៍និងការដឹកជញ្ជូនក្នុងទីប្រជុំជន នាព្រឹកថ្ងៃទី៥ខែធ្នូឆ្នាំ២០១៩នៅសណ្ឋាគាររ៉ាហ្វលឡឺរ៉ូយ៉ាល់ រាជធានីភ្នំពេញ នេះ មានការអញ្ជើញចូលរួមពីលោក ស៊ុន ចាន់ថុល ទេសរដ្ឋមន្ត្រី និង រដ្ឋមន្ត្រីក្រសួងសាធារណការ និងដឹកជញ្ជូន, តំណាង UNDP,តំណាងក្រុមហ៊ុន Grab និង អតីតសមាជិករដ្ឋសភានៃប្រទេសសិង្ហបុរី។

ក្នុងវេទិកាពិភាក្សាគ្នានោះ  លោក Nick Beresford ប្រធាន​និវាសដ្ឋានប្រចាំប្រទេសរបស់ UNDP បានមានប្រសា​សន៍​ឱ្យដឹងថា “ដោយទទួលស្គាល់តួនាទីជាមូលដ្ឋាននៃការដឹកជញ្ជូនប្រកប​ដោយចីរភាព ដើម្បីសម្រេចឱ្យបាននូវអនាគតដែលយើងចង់បាន គម្រោង SUMAI (សម័យ) មានគោលបំណងគាំទ្រដល់បច្ចេកវិទ្យាដឹកជញ្ជូននៅតំបន់ទីក្រុង ប្រកបដោយចីរភាពដែលមានលក្ខណៈរួមបញ្ចូលគ្នា តាមរយៈការពង្រឹងសមត្ថភាពជាតិ និង ការពង្រឹងប្រព័ន្ធ ហើយស្របពេលជាមួយគ្នានោះ ក៏ជម្រុញឱ្យមាននវានុវត្តន៍នៅក្នុងបច្ចេកវិទ្យាដឹកជញ្ជូនវ័យឆ្លាត សំដៅពន្លឿនវឌ្ឍនភាពលើបញ្ហាសុវត្ថិភាព និង ការចល័តសម្រាប់ទាំងអស់គ្នាផងដែរ”។

កិច្ចសហការរវាងរាជរដ្ឋាភិបាលកម្ពុជា និង UNDP បង្ហាញឱ្យឃើញនូវថាមវ័ន្តពហុវិស័យ ចំពោះការដោះស្រាយបញ្ហាប្រឈមទាក់ទងនឹងការអភិវឌ្ឍ ដូចជាបញ្ហាការចល័តនេះជាដើម។

លោក ស៊ុន ចាន់ថុល ទេសរដ្ឋមន្ត្រី និង រដ្ឋមន្ត្រីក្រសួងសាធារណការ និងដឹកជញ្ជូន បានមាន​ប្រសាសន៍ឱ្យដឹងថា៖“ក្រសួងសាធារណការ និង ដឹកជញ្ជូនមានសេចក្តីរីករាយក្នុងការរៀបចំ  វេ​ទិ​​​កាស្តីពីការចល័តនៅតំបន់ទីក្រុងដំបូងគេបង្អស់ក្នុងប្រទេសកម្ពុជា។​ ព្រឹត្តិការណ៍នេះគឺជាឱកាសមួ​យដ៏វិសេសវិសាលដើម្បីបង្ហាញអំពីវឌ្ឍនភាពរបស់កម្ពុជារៀនសូត្រពីប្រទេសជិតខាងរបស់យើ​​ងនិងពាំនាំអ្នកដែលមានគំនិតដូចគ្នាដើម្បីធ្វើដំណើរឆ្ពោះទៅរកគោលដៅរួមមួយ ដែលសំដៅ​​​ធានាឱ្យបាននូវសុវត្ថិភាពផ្លូវថ្នល់ព្រមទាំងការចល័តនិងការធ្វើដំណើរកាន់តែប្រសើរសម្រាប់ទាំងអស់គ្នា”។

លោក Russell Cohen ប្រធានផ្នែកប្រតិបត្តិការថ្នាក់តំបន់របស់ក្រុមហ៊ុន Grab បានមានប្រសាសន៍ថា“សម្រាប់ក្រុមហ៊ុនGrab ការចល័តប្រកបដោយភាពវ័យឆ្លាត មានន័យថាជាការបោះជំហានហួសពីការដែលគ្រាន់តែប្រើប្រាស់បច្ចេកវិទ្យាកម្រិតខ្ពស់។វាមានសារៈសំខាន់ខ្លាំងណា​ស់​ដែលត្រូវយល់ឱ្យបានស៊ីជម្រៅអំពី​បរិបទក្នុងមូលដ្ឋាន និង ការលំបាកដែលអ្នកប្រើប្រាស់សេវារបស់យើងបានជួបប្រទះ។ ដូច្នេះ សម្រាប់យើងខ្ញុំ ការចល័តប្រកបដោយភាពវ័យឆ្លាត រមែងតែងមានន័យថាជាការដោះស្រាយបញ្ហាដែលមានទំនាក់ទំនងយ៉ាងជិតស្និទ្ធទៅនឹងការដឹកជញ្ជូនដូចជាការច្របាច់បញ្ចូលគ្នានូវប្រព័ន្ធទូទាត់ប្រាក់ជាដើម។យើងខ្ញុំជឿថាវេទិកានេះនឹងជួយពង្រឹងការផ្តួច​ផ្តើមនានាសំដៅជម្រុញនវានុវត្តន៍ និង ការកែលម្អបច្ចេកវិទ្យានៅក្នុងការចល័តនៅតំបន់ទីក្រុង”។

តាមរយៈការពាំនាំមកនូវអ្នកអនុវត្តការងារ អ្នកបង្កើតគោលនយោបាយ និង វិស័យឯកជនឱ្យជួបជុំគ្នា វេទិកានេះមានបំណងបង្ហាញអំពីរបៀបដែលបច្ចេកវិទ្យា និង នវានុវត្តន៍ បានបង្កើតឱ្យមានឱកាសអភិវឌ្ឍថ្មីៗដើម្បី ផ្លាស់ប្តូរការចល័តនៅតំបន់ទីក្រុង។

វេទិកាសំណេះសំណាលស្តីពីការចល័តភាពក្នុងទីប្រជុំជន នឹងធ្វើឡើងនៅថ្ងៃទី៥ និង ទី៦ ខែធ្នូ ឆ្នាំ២០១៩។ ថ្ងៃទី១ វេទិកាសំណេះសំណាលស្តីពីការចល័តភាពក្នុងទីប្រជុំជន នឹងប្រព្រឹត្តធ្វើឡើងនៅឯសណ្ឋាគារ Raffle Le Royal (ថ្ងៃទី៥ ខែធ្នូ ឆ្នាំ ២០១៩) ក្រោមកិច្ចសហការរៀបចំរវាង UNDP ក្រុមហ៊ុន Grab ដោយមានការគាំទ្រពីក្រសួងសាធារណការ និងដឹកជញ្ជូន ដែលវេទិកានេះនឹងរួមមានកិច្ចពិភាក្សាក្រុមវាគ្មិន ធ្វើឡើងដោយអ្នកបង្កើតគោលនយោបាយ អ្នកអភិវឌ្ឍ អ្នកអនុវត្តការងារ និង ជំនាញការ ពីវិស័យរដ្ឋ និងឯកជន នៅក្នុងវិស័យការងារនេះ លើប្រធានបទ​​ផ្សេងៗគ្នាទាក់ទងនឹងការចល័តនៅតំបន់ទីក្រុង។ ថ្ងៃទី២នៃព្រឹត្តិការណ៍នេះ (ថ្ងៃទី៦ ខែធ្នូ ឆ្នាំ២០១៩) ដែលជាការបង្ហាញអំពីការចល័តនៅតំបន់ទីក្រុង រៀបចំដោយ Energy Lab ក្រោមភាពជាដៃគូជាមួយ UNDP នឹងធ្វើឡើងនៅឯ The Factory Phnom Penh ដែលនៅក្នុងព្រឹត្តិការណ៍នេះ អាជីវកម្មថ្មីៗ ក្រុមហ៊ុនអង្គការមិនមែនរដ្ឋាភិបាល និង ទីភ្នាក់ងាររដ្ឋាភិបាលនានា នឹងដាក់តាំងបង្ហាញអំពីបច្ចេក​វិទ្យារបស់ពួកគេសម្រាប់បញ្ហាទាក់ទងនឹងការចល័តនៅតំបន់ទីក្រុង៕B/

ទីតាំងផ្សាយពាណិជ្ជកម្ម