គណៈប្រតិភូទីក្រុងវៀងចន្ទ នៃ​ប្រទេស​ឡាវ មកស្វែងយល់អំពីការ​គ្រប់គ្រង ការអភិរក្ស និងការ​អភិវឌ្ឍក្នុងតំបន់អង្គរ

261
ចែករម្លែក

ដោយ:គូលែន/សៀមរាប ៖ នៅថ្ងៃទី១៧ ខែធ្នូ ឆ្នាំ២០១៩ នៅទីស្នាក់ការអាជ្ញាធរជាតិអប្សរា បានរៀបចំពិធីជួប ពិភាក្សាការងារ រវាងគណៈប្រតិភូទីក្រុងវៀងចន្ទ នៃប្រទេសឡាវ ដឹកនាំដោយលោក SIHOUN SITTHILRUXAY អភិបាលរងក្រុងរៀងច័ន្ទ បានដឹកនាំ គណៈប្រតិភូ អញ្ជើញជួប ពិភាក្សាការងារស្តីពី «ការស្វែងយល់ពីការគ្រប់គ្រង ការអភិរក្ស និងការអភិវឌ្ឍក្នុងតំបន់អង្គរ» ជាមួយ អាជ្ញាធរជាតិអប្សរា ដែលដឹកនាំដោយលោក សុខ សង្វារ អគ្គនាយករង អាជ្ញាធរជាតិអប្សរា។

លោក សុខ សង្វារ បានទទួលស្វាគមន៍យ៉ាងកក់ក្តៅចំពោះប្រតិភូ និងកោតសរសើរក្រុមប្រតិភូឡាវថា ជាការសម្រេចចិត្តដ៏ល្អប្រសើរ ដែលបានមកបំពេញទស្សនកិច្ចតំបន់អង្គរដោយនាំទាំងប្រតិភូរបស់រដ្ឋ និងវិស័យឯកជនមកជាមួយ។ លោកបានបញ្ជាក់ថា ដំណើរទស្សនកិច្ចនេះនឹងនាំមកនូវអត្ថប្រយោជន៍ច្រើនសម្រាប់ការយល់ដឹងពីវិស័យបេតិកភណ្ឌ និងអាចជាការបើកផ្លូវសម្រាប់កិច្ចសហការល្អរវាងរដ្ឋនិងឯកជនលើការវិនិយោគលើវិស័យទេសចរណ៍ជាដើម។

លោក សុខ សង្វារ បានធ្វើបទបង្ហាញជូនប្រតិភូស្ដីពី សាវតារនៃការដាក់អង្គរចូលជាបេតិកភណ្ឌពិភពលោក និងកិច្ចខិតខំប្រឹងប្រែងរបស់រាជរដ្ឋាភិបាលក្នុងការបំពេញលក្ខខណ្ឌចាំបាច់នានា រហូតអង្គរចេញផុតពីបញ្ជីបេតិកភណ្ឌពិភពលោកប្រឈមនឹងគ្រោះថ្នាក់ មកជាបញ្ជីបេតិកភណ្ឌពិភពលោកធម្មតាវិញក្នុងឆ្នាំ២០០៤។ ក្នុងបទបង្ហាញនេះដែរ លោកក៏បានបង្ហាញអំពីការគ្រប់គ្រងទេសចរណ៍តំបន់អង្គរ ទាំងក្នុងន័យផ្តល់បទពិសោធន៍ទស្សនាល្អដល់ភ្ញៀវទេសចរ និងក្នុងន័យថែរក្សាតម្លៃរបស់បេតិកភណ្ឌអង្គរ។

ក្រោយបញ្ចប់បទបង្ហាញ ប្រតិភូឡាវបានសម្តែងការពេញចិត្ត និងថ្លែងអំណរគុណចំពោះថ្នាក់ដឹកនាំអាជ្ញាធជាតិអប្សរា ដែលបានទទួលស្វាគមន៍និងចែករំលែកបទពិសោធន៍ល្អៗពីការគ្រប់គ្រងបេតិកភណ្ឌ។ ជាមួយគ្នានេះក៏មានការសួរនូវសំណួរផ្សេងៗ ជាពិសេស ពាក់ព័ន្ធនឹងការធ្វើការជាមួយវិស័យឯកជន ដែលអាចធ្វើជាដៃគូដ៏ល្អជាមួយរដ្ឋក្នុងការគ្រប់គ្រងតំបន់បេតិកភណ្ឌ និងការផ្សព្វផ្សាយអំពីវិស័យទេសចរណ៍៕B/

ទីតាំងផ្សាយពាណិជ្ជកម្ម