​អតីតមន្ត្រី​ជាន់ខ្ពស់​គ​ណ​បក្សប្រឆាំង​នឹងដាក់​ពាក្យស្នើសុំ​បង្កើត​គណបក្ស “​ខ្មែរ​ស្រឡាញ់​ជាតិ​”

559
ចែករម្លែក

ដោយ​: មុនី​រ័ត្ន / ភ្នំពេញ​: ក្រុម​អតីត​តំណាងរាស្ត្រ និង​អតីតមន្ត្រី​ជាន់ខ្ពស់​មួយចំនួន នៃ​គណបក្ស​សង្គ្រោះ​ជាតិ រួមទាំង​អ្នកប្រជាធិបតេយ្យ នឹងដាក់​ពាក្យស្នើសុំ​បង្កើត​គណបក្ស​ថ្មី​មួយ​ទៅ​ក្រសួងមហាផ្ទៃ​នៅ​ព្រឹក​ថ្ងៃទី​២ ខែមករា ឆ្នាំ​២០២០ ស្អែក​នេះ ដោយ​មិន​រង់ចាំ​ផ្ញើ​វាសនា​នយោបាយ​ជាមួយ​ទណ្ឌិត សម រង្ស៊ី ឡើយ​។​

​លោក​ខឺ​យ ស៊ី​នឿន តំណាង​ស្ថាបនិក​បង្កើត​គណបក្ស​ថ្មី​

​បន្ទាប់ពី​ដាក់ពាក្យ​ស្នើសុំ​បង្កើត​គណបក្សនយោបាយ​ទៅ​ក្រសួងមហាផ្ទៃ​រួចរាល់​ហើយ​នោះ គឺ​នៅពេល​រសៀល​ថ្ងៃទី​២​ខែមករា ឆ្នាំ​២០២០ អតីត​តំណាងរាស្ត្រ និង​អតីតមន្ត្រី​ជាន់ខ្ពស់​មួយចំនួន នៃ​គណបក្ស​សង្គ្រោះ​ជាតិ នឹងធ្វើ​ធ្វើ​សន្និសីទកាសែត​បញ្ជាក់​អំ​ពី​មូលហេតុ និង​គោលបំណង​នៃ​ការបង្កើត​គណបក្ស​ថ្មី​។​

​យោងតាម​សេចក្តីប្រកាស​ព័ត៌មាន​កាលពី​ថ្ងៃទី​៣១ ខែធ្នូ បាន​ឲ្យ​ដឹងថា ស្ថាបនិក​គណបក្ស​ថ្មី ផ្តួចផ្តើមឡើង​ដោយ​អតីត​ថ្នាក់ដឹកនាំ សកម្មជន​អតីត​គណបក្ស​សង្គ្រោះ​ជាតិ នឹង​អ្នកប្រជាធិបតេយ្យ នឹង​រៀបចំ​ធ្វើ​សន្និសីទ​សារព័ត៌មាន​មួយ​ស្តីពី​ការដាក់​ពាក្យសុំ​បង្កើត​គណបក្ស​នៅ​ក្រសួងមហាផ្ទៃ​នា​ថ្ងៃទី​២​ខែមករា ឆ្នាំ​២០២០​។ សន្និសីទកាសែត​នឹងធ្វើ​នៅវេលា​ម៉ោង​២​រសៀល ថ្ងៃទី​២ ខែមករា នៅ​សណ្ឋាគារ​សាន់វ៉េ​។​

​លោក កង គឹម​ហាក់​

​អតីត​សមាជិក​គណៈកម្មាធិការ​នាយក​នៃ​អតីត​គណបក្ស​សង្គ្រោះ​ជាតិ​លោក​ស៊ឹម សុវណ្ណនី បាន​ថ្លែងថា ឈ្មោះ​របស់​គណបក្ស​ថ្មី​នឹងត្រូវ​បញ្ជាក់​នា​រសៀល​ថ្ងៃទី​២ ខែមករា ក្នុង​សន្និសីទកាសែត​មួយ បន្ទាប់ពី​ការដាក់​សំណើសុំ​បង្កើត​គណបក្ស​ថ្មី​ទៅ​ជួន​ក្រសួងមហាផ្ទៃ​រួចរាល់​នៅ​ព្រឹក​ថ្ងៃទី​២ ខែមករា​។​

​ចំណែក​លោក​ខឺ​យ ស៊ី​នឿន តំណាង​ស្ថាបនិក​បង្កើត​គណបក្ស​ថ្មី​បាន​ថ្លែងប្រាប់​រស្មី​កម្ពុជា​កាលពី​រសៀល​ថ្ងៃទី​៣១ ខែធ្នូ ថា ការសម្រេច​បង្កើត​គណ​បក្ស​ថ្មី​នេះ គឺ​តាម​សំណូមពរ​របស់​ប្រជាពលរដ្ឋ អតីត​សកម្មជន​គណបក្ស​សង្គ្រោះ​ជាតិ អ្នកប្រជាធិបតេយ្យ និង​អ្នកស្នេហាជាតិ ។​លោក​បញ្ជាក់ថា “​ស្ថានភាព​បច្ចុប្បន្ន​មានការ​ធ្លាក់ចុះ​នូវ​សំឡេង​ដែលមាន​និន្នាការ​ប្រឆាំង​ជាមួយ​គណបក្សកាន់អំណាច និង​ការ​បែប​បាក់​អ្នក​កាន់​លទ្ធិប្រជាធិបតេយ្យ ជាហេតុ​ធ្វើ​ឲ្យ​មានការ​ព្រួយបារម្ភ​”​។​

​លោក ជីវ កត្តា​

​លោក​បាន​បន្តថា ស្ថាបនិក​គណបក្ស​ថ្មី​នេះ មានដូចជា លោក​កង គឹម​ហាក់ លោក​ជីវ កត្តា ដែលជា​អតីត​តំណាងរាស្ត្រ លោក​ស៊ឹម សុវណ្ណនី អតីត​សមាជិក​គណៈកម្មាធិការ​នាយក​នៃ​អតីត​គណបក្ស​សង្គ្រោះ​ជាតិ និង​រូបលោក (​ខឺ​យ ស៊ី​នឿន​) អតីត​បេក្ខជន​តំណាងរាស្ត្រ​មណ្ឌល​ខេត្តបាត់ដំបង រួមទាំង​អតីតមន្ត្រី​មួយចំនួនទៀត​។​

​ប្រភព​ច្បាស់​ការណ៍​បាន​បង្ហើប​ប្រាប់​រស្មី​កម្ពុជា​កាលពី​យប់​ថ្ងៃទី​៣១ ខែធ្នូ ថា គណបក្ស​ថ្មី ដែល​គ្រោង​នឹងដាក់​ពាក្យស្នើសុំ​បង្កើត​គណបក្ស​ទៅ​ក្រសួងមហាផ្ទៃ នៅ​ថ្ងៃទី​២ ខែមករា ឆ្នាំ​២០២០ គឺមាន​ឈ្មោះ “​គណបក្ស​ខ្មែរ​ស្រឡាញ់​ជាតិ​”
​សូមជម្រាបថា ស្ថាបនិក​គណបក្ស​ថ្មី​នេះ មានដូចជា លោក​កង គឹម​ហាក់ លោក​ជីវ កត្តា ដែលជា​អតីត​តំណាងរាស្ត្រ លោក​ស៊ឹម សុវណ្ណនី អតីត​សមាជិក​គណៈកម្មាធិការ​នាយក​នៃ​អតីត​គណបក្ស​សង្គ្រោះ​ជាតិ បានដាក់​ពាក្យស្នើសុំ​សិទ្ធិ​ធ្វើ​នយោបាយ​ឡើងវិញ​ទៅ​ក្រសួងមហាផ្ទៃ កាលពី​ថ្ងៃទី​១៨ ខែមីនា ឆ្នាំ​២០១៩​។​

លោក ស៊ីម សុវណ្ណនី

​យោងតាម​សេចក្តីប្រកាស​ព័ត៌មាន​របស់​ស្ថាបនិក​គណបក្ស​ថ្មី កាលពី​ថ្ងៃទី​១២ ខែធ្នូ ឆ្នាំ​២០១៩ បាន​ឲ្យ​ដឹងថា ដោយសារ​មើលឃើញ​ស្ថានភាព​នយោបាយ​នាពេល​បច្ចុប្បន្ន មានការ​ធ្លាក់ចុះ​នូវ​សម្លេង​ដែលមាន​និន្នាការ​ប្រឆាំងនឹង​គណបក្ស​កាន់អំណាច និង​ការបែកបាក់​យ៉ាងខ្លាំង​រវាង​ក្រុម​អ្នក​ប្រកាន់​លទ្ធិប្រជាធិបតេយ្យ​នោះ ក្នុងនាម​ជា​អ្នកប្រជាធិបតេយ្យ​និយម និង​ជា​អ្នក​ដែលមាន​បំណង​ស្រោចស្រង់​ស្មារតី​នៃ​ការ​សាមគ្គី​គ្នា​ផ្ទៃក្នុង​របស់​ក្រុម​អ្នក​ដែលមាន​ទស្សនៈ​ប្រឆាំង​នៅ​កម្ពុជា សូម​ប្រកាស​ជម្រាបជូន​បងប្អូន​ជនរួមជាតិ​ទាំងអស់​មេត្តា​ជ្រាបថា បន្ទាប់ពី​បាន​ចុះ​ជួប​សកម្មជន​នៅតាម​ខេត្ត​ជាច្រើន​អស់​រយៈពេល​ជិត​មួយ​ឆ្នាំនេះ យើងខ្ញុំ​នឹង​ត្រៀម​រៀបចំ​បង្កើត​គណបក្ស​ថ្មី​មួយ​ដែលជា​គណបក្ស​បន្តវេន​ពី​គណបក្សប្រឆាំង​មុនៗ និង​ពី​អ្នក​ទាំងឡាយណា​ដែលមាន​ទស្សនៈ​មិន​ស្រប​នឹង​ការដឹកនាំ​របស់​គណបក្ស​គ្រប់គ្រង​អំណាច​បច្ចុប្បន្ន​។​

​ជាមួយគ្នានេះ ក្រុម​អតីត​តំណាងរាស្ត្រ នៃ​គណបក្ស​សង្គ្រោះ​ជាតិ បាន​អំពាវនាវ​ឱ្យ​អ្នកស្នេហាជាតិ​ទាំងអស់​ចូលមក​រួបរួម​កម្លាំង​គ្នា ក្នុង​បុព្វហេតុ​នៃ​ការបង្កើត​គណបក្ស​ថ្មី​នេះ ឱ្យ​ក្លាយជា​គណបក្សប្រឆាំង​ដែល​រឹងមាំ ដើម្បី​ការពារ​និង​បម្រើ​នូវ​ផលប្រយោជន៍​ជាតិ​និង​ផលប្រយោជន៍​ពិតប្រាកដ​របស់​អ្នក​ដែល​គាំទ្រ​កន្លងមក​៕ ល​

ទីតាំងផ្សាយពាណិជ្ជកម្ម