ដោយគូលែន/សៀមរាប: អាជ្ញាធរជាតិអប្សរាបានប្រកាសបិទចរាចរឡើង-ចុះ វង់ទស្សនាជាន់ទី៣ (ប្រាង្គកណ្តាល) នៃប្រាសាទបាយ័ន្ត នៅដើមឆ្នាំ២០២០។នេះជាការបញ្ជាក់របស់អាជ្ញាធរជាតិអប្សរា នាថ្ងៃទី១ ខែមករា ឆ្នាំ២០២០។
មន្ត្រីអាជ្ញាធរជាតិអប្សរាបាននិយាយថាបច្ចុប្បន្នដោយកត្តាអាយុកាលនិងកត្តាផ្សេងៗទៀតបានបង្កឱ្យជាន់ទី៣ប្រាង្គកណ្តាលនៃប្រាសាទបាយ័ន្តមានភាពសឹករេចរិលនិងកំពុងប្រឈមនឹងហានិភ័យយ៉ាងធ្ងន់ធ្ងរមួយចំនួន។ចំពោះទីតាំងទស្សនាសំខាន់ៗផ្នែកខាងក្រោមនៃប្រាសាទបាយ័នដែលមានចម្លាក់ក្បូរក្បាច់រចនាដ៏ល្អវិចិត្រ នៅបើកជាប្រក្រតីសម្រាប់ភ្ញៀវទេសចរជាតិ-អន្តរជាតិ។
មន្ត្រីអាជ្ញាធរជាតិអប្សាបានបន្តថាដោយក្នុងស្ថានភាពនេះអ្នកជំនាញការចំពោះកិច្ចផ្នែកអភិរក្សនៃគណៈកម្មាធិការអន្តរជាតិកិច្ចគាំពារអភិរក្សនិងអភិវឌ្ឍន៍រមណីយដ្ឋានប្រវត្តិសាស្ត្រអង្គរ (ហៅកាត់ថា អាយស៊ីស៊ី-អង្គរ)។បានផ្តល់អនុសាសន៍ឱ្យបិទការទស្សនានៅជាន់ទី៣នៃប្រាសាទបាយ័ន្តដើម្បីផ្តល់លទ្ធភាពដល់ក្រុមអ្នកជំនាញសិក្សាអំពីការខូចខាតនិងបញ្ហាប្រឈមនានា។ដើម្បីរៀបចំផែនទីហានីនិភ័យព្រមទាំងកំណត់ទីតាំងអាទិភាពក្នុងការពង្រឹងស្ថានភាពនិងជួសជុលផ្នែកដែលប្រឈមនឹងគ្រោះថ្នាក់ទាំងអស់នោះ។
មន្ត្រីអាជ្ញាធរជាតិអប្សរាបានបន្តទៀតថាដើម្បីថែទាំនិងការពារប្រាសាទក៏ដូចជាការគិតគូរយ៉ាងយកចិត្តទុកដាក់ដល់សុវត្ថិភាពភ្ញៀវទេសចរជាតិ-អន្តរជាតិ អាជ្ញាធរជាតិអប្សរា នឹងបិទចរាចរឡើង-ចុះ វង់ទស្សនាជាន់ទី៣នៃប្រាសាទបាយ័ន្តចាប់ពីថ្ងៃទី១ខែមករាឆ្នាំ២០២០នេះតទៅដោយទុកលទ្ធភាពឱ្យក្រុមការងារជំនាញផ្នែកអភិរក្សបំពេញការងាររបស់ខ្លួនរហូតបានរួចរាល់ជាស្ថាពរ៕S/
រូបភាព: អាជ្ញាធរជាតិអប្សរាប្រកាសបិទចរាចរណ៍ឡើង-ចុះ វង់ទស្សនាជាន់ទី៣ (ប្រាង្គកណ្តាល) នៃប្រាសាទបាយ័ន្ត នៅដើមឆ្នាំ២០២០៕អប្សរា
