ណេ​ម៉ាន​ចា ម៉ា​ទិ​ក រង់ចាំ​ឱកាស​ផ្ទេរចេញ​នៅ​ខែមករា​

​ខ្សែបម្រើ ណេ​ម៉ាន​ចា ម៉ា​ទិ​ក (Nemanja Matic) របស់​ក្លិប​ម៉េ​ន​ឆេ​ស្ទ័​រ យូ​ណាយ​ធី​ត​បាន​បង្ហើប ប្រាប់ថា ខ្លួន​មិន​ប្រាកដថា នឹងមាន​អ្វី​កើតឡើង​នៅ​ខែមករា​នេះ​ទេ​។​
​ ​
​កីឡាករ​វ័យ​៣១​ឆ្នាំ​រូបនេះ​នៅសល់​កិច្ចសន្យា​៦​ខែ​ទៀត​ជាមួយ​ម៉េ​ន​ឆេ​ស្ទ័​រ យូ​ណាយ​ធី​ត ប៉ុន្តែ​បាន​សារភាពថា បើក​ចិត្ត​ទទួលយក​កិច្ចសន្យា​ផ្ទេរចេញ​ណាមួយ​ពី​ពហុ​កីឡដ្ឋាន Old Trafford នៅ​ខែ​នេះ​។​
​ ​
​កីឡាករ​សញ្ជាតិ​ស៊ែ​ប​រូបនេះ​បានបង្ហាញ​មុខ​៨​លើក​នៅ​រដូវ​កាល​នេះ ប៉ុន្តែ​មិនទាន់បាន​ចាប់ ផ្តើម​ជាមួយ​ក្រុម​យូ​ណាយ​ធី​ត​នៅ​រដូវ​កាល​នេះ​នៅឡើយ​ទេ អំឡុងពេល​ក្រុម​យូ​ណាយ​ធី​ត យកឈ្នះ​ក្រុម Burnley ២-០ ។​
​ ​
ម៉ា​ទិ​ក បាន​និយាយថា “​ខ្ញុំ​មិនដឹងថា ត្រូវ​និយាយ​យ៉ាងម៉េច​ទេ​។ ខ្ញុំ​មាន​កិច្ចសន្យា​សម្រាប់​រយៈ ពេល​៦​ខែក្រោយ​។ យើង​នឹង​រង់ចាំ​មើលថា តើ​មាន​អ្វី​កើតឡើង​នៅ​ខែម​ករានេះ​។ តើ​ខ្ញុំ​នឹង​ពន្យារ កិច្ចសន្យា​ឬ​ព្យាយាម​ស្វែង​កន្លែង​ថ្មី​?”​។​
​ ​
ម៉ា​ទិ​ក បន្តថា “​យូ​ណាយ​ធី​ត​មាន​ជម្រើស​ពន្យារ​កិច្ចសន្យា​របស់ខ្ញុំ ប៉ុន្តែ​យើង​នឹង​មើលឃើញថា តើ​ផែនការ​របស់​ក្លិប​នេះ​នឹង​សមស្រប​ជាមួយ​ផែនការ​របស់ខ្លួន​ដែរ​ឬ​យ៉ាងណា​។ ខ្ញុំ​មិនអាច និយាយបាន​ច្រើនជាង​នេះ​ទេ ពីព្រោះ​ខ្ញុំ​ក៏​មិនដឹង​ដែរ​”​។​
​ ​
​តាម​ព័ត៌មាន​ថា ក្លឹប Atletico Madrid ក៏​ស្ថិត​ក្នុងចំណោម​ក្លិប​ដែល​ចាប់អារម្មណ៍​ចង់បាន ម៉ា​ទិ​ក ផងដែរ​៕ ប្រែ​សម្រួល​: ពិសិដ្ឋ​