ដោយៈ សាវរក្ស / ភ្នំពេញ: ប្រជាពលរដ្ឋបានយកសំរាមចាក់គរចោលលើតាមដងផ្លូវសាធារណៈ បង្កជាក្លិនស្អុយ ធ្វើឲ្យប៉ះពាល់យ៉ាងធ្ងន់ធ្ងរទៅដល់សុខភាពផ្លូវដង្ហើមនិងបរិស្ថាន។ ជារៀងរាល់ថ្ងៃ គេសង្កេតឃើញប្រជាពលរដ្ឋយកសំរាមមកចាក់គរលើផ្លូវទីសាធារណៈ ដូចជានៅផ្លូវ២១៧ ចំណុចខាងជើងស្ពានដែកស្ថិតនៅភូមិឫស្សី សង្កាត់ស្ទឹងមានជ័យទី២ ខណ្ឌមានជ័យ។
តាមដងផ្លូវម្តុំនោះ បានក្លាយជាទីចាក់សំរាមយ៉ាងអនាធិបតេយ្យពាសវាលពាសកាល ធ្វើឲ្យផ្លូវរួមតូច ពិបាកធ្វើដំណើរ បង្កការកកស្ទះចរាចរណ៍ មានក្លិនស្អុយប៉ះពាល់ទៅលើសុខភាពផ្លូវដង្ហើមរបស់ប្រជាពលរដ្ឋ ក៏ដូចជាបងប្អូនដែលធ្វើដំណើរឆ្លងកាត់តាមដងផ្លូវផងដែរ។
ជុំវិញនឹងបញ្ហាសំរាមខាងលើ នៅរសៀលថ្ងៃទី១ខែមករា ឆ្នាំ២០២០ ប្រជាពលរដ្ឋដែលមានលំនៅដ្ឋាននៅក្បែរសំណូមពរដល់ក្រុមហ៊ុនដឹកស៊ិនទ្រី មកកើបឲ្យបានទាន់ពេលវេលាផង កុំទុកគរដូចភ្នំតាមដងផ្លូវសាធារណៈបែបនេះ បង្កឲ្យមានក្លិនស្អុយប៉ះពាលដល់សុខភាពផ្លូវដង្ហើម ជាពិសេសក្មេងៗងាយនឹងរងគ្រោះ។
សូមសំណូមពរដល់លោក ពេជ្រ កែវមុនី អភិបាលនៃគណៈអភិបាលខណ្ឌខណ្ឌមានជ័យ និងលោកចៅសង្កាត់ស្ទឹងមានជ័យទី២ មេត្តាជួយត្រួតតពិនិត្យបញ្ហាសំរាមនេះផង នឹងចាត់វិធានការតឹងរឹងកុំឲ្យពលរដ្ឋយកសំរាមមកចាក់គរលើផ្លូវសាធារណៈ ពាសវាលកាលបន្តទៀតនាំឲ្យប៉ះពាល់ដល់សុខភាពលើផ្លូវដង្ហើម នឹងបរិស្ថាន ក៏ដូចជាសោភ័ណភាពតាមដងផ្លូវសាធារណៈ៕ ល/Ha