រៀបចំ​ពិធី​ឆ្លង​ឆ្នាំ​សកល​លើកដំបូង​នៅ​ខេត្ត​ត្បូងឃ្មុំ​មាន​ភ្ញៀវ​ចូលរួម​ទស្សនា​និង​លេង​កម្សាន្ត​ជាង​បួន​ម៉ឺន​នាក់​

250
ចែករម្លែក

ដោយ​: គង់​ហេង / ត្បូងឃ្មុំ​: នៅ​រាត្រី​ឆ្លង​ឆ្នាំ​សកល នៃ​យប់​ថ្ងៃទី ៣១ ខែធ្នូ ឆ្នាំ​២០១៩ ឈានចូល​យប់​ថ្ងៃទី ១ ខែមករា ឆ្នាំ​២០២០ នៅ​តំបន់​រដ្ឋបាល​សាលាខេត្ត​ត្បូងឃ្មុំ គឺមាន​មនុស្សម្នា​ក្មេង​ចាស់​ប្រុស ស្រី​ដែល​ប្រមាណ​ជាង​៩០​ភាគរយ​ជា​ភ្ញៀវ​ក្នុងស្រុក​បានមក​ចូលរួម​លេង​កម្សាន្ត​យ៉ាងច្រើន​កុះករ​។​

​លោក អឿ រិ​ទ្ធ ប្រធាន​មន្ទីរ​ទេសចរណ៍​ខេត្ត​ត្បូងឃ្មុំ​បាន​ប្រាប់​កាសែត​រស្មី​កម្ពុជា​នៅ​ថ្ងៃទី ២ ខែមករា ឆ្នាំ​២០២០​ថា នៅ​រាត្រី​ឆ្លង​ឆ្លង​ឆ្នាំ​២០១៩ ចូលឆ្នាំ​២០២០ នៅ​តំបន់​ជុំវិញ​សាលាខេត្ត​មាន​ភ្ញៀវទេសចរ​រួម​ពិសា​អាហារ រាំលេង​កម្សាន្ត ទស្សនា​ពិ​ព័រ​ណ៌ និង​បាញ់​កាំជ្រួច​សរុប​ចំនួន ៤៦.២២៩ នាក់​។ ក្នុងនោះ​មាន​ភ្ញៀវ​ជា​ស្ត្រី​ចំនួន ២៩.០៣០ នាក់​។​

​លោក​ប្រធាន​មន្ទីរ​បាន​ឲ្យ​ដឹង​ទៀតថា នេះ​ជា​ឆ្នាំ​ដំបូង​ដែល​ខេត្ត​ត្បូងឃ្មុំ​រៀបចំ​ពិធី​ឆ្លង​ឆ្នាំ​សកល គឺ​ឆ្នាំ​២០១៩ ចូលឆ្នាំ​២០២០​។ ដោយឡែក​ប​ច្ចុ​ប្ប​នៅ​ខេត្ត​ត្បូងឃ្មុំ​មាន​តំបន់​កម្សាន្ត​ចំនួន ប្រាំបី កន្លែង គឺ​តំបន់​ដែល​ភ្ញៀវ​ពេញនិយម​ទៅ​ទស្សនា​កម្សាន្ត​ច្រើនជាងគេ​ក្នុង​ពិធីបុណ្យ​សំខាន់ៗ រួមមាន រមណីយដ្ឋាន​ហ្លួង​ព្រះស្តេច​កន និង​ភូមិ​អភិវឌ្ឍន៍​ក្នុងស្រុក​ពញាក្រែក និង​តំបន់​សហគមន៍​ទេសចរណ៍​«​អូ​ប៊ី​ធី​»(OBT)​ក្នុង​ឃុំ​ជី​រោទ៍​ទី​១ ស្រុក​ត្បូងឃ្មុំ​។​

​លោក​បាន​បន្តថា ក្រៅពីនោះ​យើង​មាន​តំបន់​កម្សាន្ត​ដែលមាន​សក្តានុពល​មួយចំនួន​ដូចជា ព្រះ​ធាតុ​បា​ស្រី នៅក្នុង​ស្រុក​ត្បូងឃ្មុំ ទឹកធ្លាក់​ហោង ស្រុក​តំបែរ តំបន់​ចម្ការកៅស៊ូ ក្នុងស្រុក​មេមត់ ស្រុក​ពញាក្រែក ស្រុក​ត្បូងឃ្មុំ និង​ស្រុក​អូ​រាំង​ឪ រមណីយដ្ឋាន​កែច្នៃ​ខ្នង​ក្រពើ​និង សារមន្ទីរ ក្នុងស្រុក​មេមត់​។​

​លោក​បាន​បន្ថែមថា ក្នុងនោះ​នៅមាន​តំបន់​កម្សាន្ត​ជា​គោលដៅ​ទេសចរណ៍​មួយចំនួនទៀត​ដូចជា តំបន់​កម្សាន្ត​មាត់​ឃ្មង់ តំបន់​កម្សាន្ត​អូរ​ក្តុង និង​ប៉ម ជាដើម​៕ ល​

អាជ្ញាប័ណ្ណចែកចាយផ្តាច់មុខ