ដោយ:គង់ហេង/ត្បូងឃ្មុំ:ក្មេងស្រីវ័យ១៣ឆ្នាំដំណាលគ្នាចំនួនបីនាក់បានលង់ទឹកស្លាប់នៅចំណុចឆ្នេរខ្សាច់កន្លែងកម្សាន្តមួយកន្លែងទើបបានបង្កើតថ្មីនៃដងទន្លេមេគង្គស្ថិតក្នុងភូមិព្រែកពាមឃុំពាមជីលាំង ស្រុកត្បូងឃ្មុំ នៅថ្ងៃចូលឆ្នាំសកលថ្ងៃទី១ខែមករាឆ្នាំ២០២០។
លោកវរសេនីយ៍ សេង មិ អធិការរងនគរបាលស្រុកត្បូងឃ្មុំបានឱ្យកាសែតរស្មីកម្ពុជាដឹងនៅថ្ងៃទី២ មករាឆ្នាំ២០២០នេះថា ក្មេងស្រីជាជនរងគ្រោះទាំងបី មានឈ្មោះ គង់ ថារី នៅភូមិកំពង់ចន្លុះកើត ឃុំពាមជីលាំង,បូណាជីជីងនៅភូមិបឹងព្រួលឃុំបឹងព្រួលនិងម្នាក់ទៀតឈ្មោះលាងតុន្នានៅភូមិព្រែកផ្តៅឃុំពាមជីលាំង ស្រុកត្បូងឃ្មុំ។
លោកអធិការរងបានឱ្យដឹងទៀតថាក្មេងស្រីមានចំនួនសរុបប្រាំនាក់ជាសិស្សសាលាបឋមសិក្សាពាមជីលាំង។ប៉ុន្តែមានភ្ញៀវដែលបានទៅលេងកម្សាន្តទីនោះបានប្រទះឃើញក៏ស្រងជួយសង្គ្រោះរួចជីវិតចំនួនពីរនាក់គឺឈ្មោះហួតស្រីមួយអាយុ១៣ឆ្នាំនៅភូមិកំពង់ចន្លុះលិចនិងឈ្មោះពេជ្រម៉ូលីកា អាយុ១៣ឆ្នាំដែរនៅព្រែកផ្តៅឃុំពាមជីលាំងស្រុកត្បូងឃ្មុំ។
មន្ត្រីនគរបាលរូបនេះបានបន្ថែមថាចំណែកជនរងគ្រោះដែលបានស្លាប់ទាំងបីនាក់គឺយើងបានសហការចំណាយពេលតាំងពីកើតហេតុម៉ោង១០ព្រឹកដល់ម៉ោងជាង២រសៀលថ្ងៃទី១មករាដដែលបានរកឃើញសាកសពស្រង់ឡើងប្រគល់ឱ្យជំនាញធ្វើកោសល្យវិច័យ។សមត្ថកិច្ចបានបញ្ជាក់ថាក្មេងស្រីទាំងបីនាក់ពិតជាបានស្លាប់ដោយលង់ទឹកប្រាកដមែននិងបានប្រគល់សាកសពជូនក្រុមគ្រួសារយកទៅធ្វើបុណ្យតាមប្រពៃណីរៀងៗខ្លួន៕S/
