តាមសេចក្តីរាយការណ៍ថា ក្លិប អ៊ីនធ័រ មីលេន(Inter Milan) កំពុងថ្លឹងថ្លែងដាក់សំណើផ្ទេរ២៥ លានផោនសម្រាប់ខ្សែការពារ អេមឺសិន ប៉ាលមីរី (Emerson Palmieri) របស់ក្លិបឆេលស៊ី។
ឆេលស៊ីបើកចិត្តលក់ខ្សែការពាររូបនេះ ប៉ុន្តែការផ្ទេរចេញណាមួយនោះគឺអាស្រ័យលើថា តើលោក ហ្វ្រែង ឡាំផាត (Frank Lampard) អាចរកអ្នកមកជំនួសបានឬយ៉ាងណានៅ ខែមករានេះ។
ខ្សែការពារស្លាបឆ្វេង អេមឺសិន និង ម៉ាកូស អាឡុនសូ (Marcos Alonso) មិនសូវទទួលបានការ ពេញចិត្តពីលោក ឡាំផាត ទេដោយលោកពេញចិត្តដាក់ឲ្យកីឡាករ សេសា អាស្ពីលីគូអេតា (Cesar Azpilicueta) លេងក្នុងតំណែងនេះ។
អេមឺសិន មិនសូវមានឱកាសលេងទេ បន្ទាប់ពីបង្ហាញមុខត្រឹម៣៤នាទី អំឡុងពេលប្រកួតឈ្នះ កាលពីថ្ងៃអាទិត្យ ប៉ុន្តែឆេលស៊ីនឹងមិនឲ្យកីឡាកររូបនេះចាកចេញទេប្រសិនបើគ្មានជម្រើស ច្រើន។
តាមសេចក្តីរាយការណ៍ថា ក្លិបជូវេនទុស ក៏ចាប់អារម្មណ៍នឹងកីឡាករវ័យ២៥ឆ្នាំរូបនេះផងដែរ ខណ:ក្លិប Inter Milan កំពុងចាប់អារម្មណ៍៕ ប្រែសម្រួល: ពិសិដ្ឋ
