​កំពែង ខ្មៅ និង ហ៊ឹម គឹម​រៀង លើស​ង្វៀន​ខា​រ៉ា​បាវ សប្ដាហ៍​នេះ​

ដោយ​៖ រ៉ូ​ហ្សា
​ភ្នំពេញ​៖
លើស​ង្វៀន​ខា​រ៉ា​បាវ​របស់ អាស៊ីអាគ្នេយ៍ នា​រសៀល​ថ្ងៃទី​៤ មករា ២០២០ អ្នក​ប្រដាល់​កម្ពុជា ហ៊ឹម គឹម​រៀង ក្លិប​តា​ព្រហ្ម​មានជ័យ នឹង​ជួប​ប្រកួត​ជាមួយ អ្នក​ប្រដាល់​ថៃ ណង ឡេ​ក (Nong Lek) ដោយ​ប្រកួត​គ្នា ក្នុង​ប្រភេទ​ទម្ងន់ ៥១ គីឡូក្រាម ។​

​គឹម​រៀង ជា​ម្ចាស់​មេដាយសំរិទ្ធ ស៊ី​ហ្គេម​លើក​ទី​៣០ នា​ប្រទេស​ហ្វីលីពីន ឆ្នាំ​២០១៩ ចំពោះ​អ្នក​ប្រដាល់​ថៃ ណង ឡេ​ក វិញ នេះ​ជា​លើកដំបូង ហើយ​ដែល​គេ ឆ្លងដែន មក​ប្រកួត​នៅ​ស្រុក​ខ្មែរ ។ មិនមាន នរណា​ដឹងថា អ្នក​ប្រដាល់​ថៃ រូបនេះ​ខ្លាំង ឬ​ខ្សោយ​នោះទេ តែ​គេ​បានបង្ហាញ​រូបថត ដោយមាន​បំពាក់ ខ្សែក្រវាត់​ទៀតផង​។​

ហ៊ឹម គឹម​រៀង និង ណង​ឡេ​ក​

​ប្រសិនបើ​នេះ ជា​ខ្សែក្រវាត់​ផ្ទាល់ របស់គេ​មែន​នោះ បង្ហាញថា ណង ឡេ​ក មិន​ខ្សោយ​នោះទេ ចំពោះ​គឹម​រៀង គេ​ជា​អ្នក​ប្រដាល់ មាឌតូច​វ័យក្មេង ដែលមាន​របៀប​វ៉ៃ​ល្អ​រហ័ស គេ​មាន​ចិត្តធំ​ទៀតផង​។ អ្នក​ប្រដាល់​កម្ពុជា រូបនេះ មាន​ប្រវត្តិ​ប្រកួត ចំនួន​២៤​ដង ឈ្នះ​២០​ដង និង​ចាញ់ ៤​ដង​។​

​ចំពោះ​អ្នក​ប្រដាល់​ថៃ ណង ឡេ​ក វិញ​នោះ គេ​ក៏​ជា​អ្នក​ប្រដាល់​វ័យក្មេង​ដែរ ។ អ្នក​ប្រដាល់​រូបនេះ មាន​ប្រវត្តិ​ប្រកួត ចំនួន​៣៥​ដង ឈ្នះ​២៩​ដង និង​ចាញ់ ៦​ដង​។ ជំនួប​មួយ​នេះ មិនដឹងថា ជ័យជំនះ បាន​ទៅ ហ៊ឹម គឹម​រៀង ឬ បាន​ទៅ ណង ឡេ​ក នោះទេ ។​

កំពែង ខ្មៅ និង មុជ ឈូ​រ៉ា​ច់​

​កំពែង ខ្មៅ សមាគម​ប្រដាល់​ក្រសួងកសិកម្ម ប្រកួត​ជាមួយ​អ្នក​ប្រដាល់ ចំណូល​ថ្មី​ថៃ មុជ ឈូ​រ៉ា​ច់ (Mouch Chourach) ដោយ​ប្រកួត​គ្នា ក្នុង​ប្រភេទ​ទម្ងន់ ៥៧ គីឡូក្រាម ។ កំពែង ខ្មៅ ជា​អ្នក​ប្រដាល់ ដែលមាន​ផ្លែ​វ៉ៃ​ល្អ តែ​កម្លាំង​គេ​ឆាប់​ធ្លាក់ចុះ​ណាស់ ។ គេ​វ៉ៃ​ល្អ​មែន​តែ​គេ​ការពារ​ខ្សោយ ហើយ​បើ​គូប្រកួត​ខ្លាំង​ជាង​នោះ គេ​វ៉ៃ​ចេញ​មិន​រួច​តែម្ដង ។ គេ​មាន​ប្រវត្តិ​ប្រកួត ចំនួន ៤៥​ដង ឈ្នះ​៣៥​ដង ចាញ់​៨​ដង និង​ស្មើ​ពិន្ទុ​២​ដង ។​

​ចំពោះ មុជ ឈូ​រ៉ា​ច់ វិញ គេ​ទើបតែ​ឆ្លងដែន មក​ប្រកួត​នៅ​ស្រុក​ខ្មែរ ជា​លើកដំបូង​នេះ​ទេ ។ មិនដឹងថា គេ​មាន​ក្បាច់គុន​អស្ចារ្យ ឬ ក៏​មក​ដើម្បី ស្ពាយ​បរាជ័យ ទៅវិញ​នោះឡើយ ។ អ្នក​ប្រដាល់​ថៃ​រូបនេះ មាន​ប្រវត្តិ​ប្រកួត ចំនួន​៥៨​ដង ឈ្នះ​៤៥​ដង ចាញ់​១៣​ដង ។ នរណា​ឈ្នះ ក្នុងការ​ប្រកួត​នេះ ?​។

ជើង​ខ្លាំង​ដែល​ត្រូវ​ប្រកួត​គ្នា​

​ជំនួប​រវាង អ្នក​ប្រដាល់​រួម​ជាតិ​វិញ​នោះ សៅ ជំនោរ ក្លិប​ថ្នល់ទទឹង​គុន​ខ្មែរ ប្រកួត​ជាមួយ សាំង គីម ក្លិប​អេ​ភូ​ថង​កីឡា ក្នុង​ប្រភេទ​ទម្ងន់ ៥១ គីឡូក្រាម ។ ថន ភឿ​ត ក្លិប​ឃ្លាំងមឿង​កីឡា ប្រកួត​ជាមួយ ជ័យ ប៊ុន​សង់ ក្លិប​គី​សែ​មាន​រិ​ទ្ធ ក្នុង​ប្រភេទ​ទម្ងន់ ៦០ គីឡូក្រាម ។​

​រិ​ទ្ធ ប្រាក់​បិ​ន្ដ ក្លិប​កងពលតូច​លេខ​៧០ ដែល​បាត់​មុខ​យូរ​នោះ ត្រូវបាន​ដាក់​ឲ្យ​ប្រកួត ជាមួយ​អ្នក​ប្រដាល់ ស៊ុន ប៊ុន​សាន់ ក្លិប​នាគរាជ​ចតុមុខ ក្នុង​ប្រភេទ​ទម្ងន់ ៥៤ គីឡូក្រាម ៕v

ទីតាំងផ្សាយពាណិជ្ជកម្ម

- Advertisment -

Most Popular