Home ព័ត៌មានអន្តរជាតិ ទើបអួតថា​អ៊ីរ...

ទើបអួតថា​អ៊ីរ៉ង់​មិន​ញញើត អាម៉េរិកបានមួយថ្ងៃ ត្រាំ​បញ្ជា​ឲ្យ​សម្លាប់ចោលបាត់

​ប្រធានាធិបតី​អាម៉េរិក លោក​ដូណាល់ ត្រាំ បាន​ចេញ​បញ្ជា​ឲ្យសម្លាប់​មេបញ្ជាការ​កង​ឆ្មាំ​បដិវត្តន៍​អ៊ីរ៉ង់ ឧត្តមសេនីយ៍ កា​សេម សូ​ឡេ​ម៉ានី​ ដែល​បាន​ស្លាប់​​ដោយ​ការវាយប្រហារ​តាម​ផ្លូវអាកាស​របស់​អាម៉េរិក​កាលពី​ថ្ងៃ​សុក្រ​ទី​៣​មករា នេះ​បើ​តាម​ការអះអាង​របស់​ក្រសួង​ការពារជាតិ​អាម៉េរិក​។​

ឧត្តមសេនីយ៍ កា​សេម សូ​ឡេ​ម៉ានី ត្រូវបានសម្លាប់តាមបញ្ជារបស់ត្រាំ

​ក្រសួង​បាន​និយាយថា​« ឧត្តមសេនីយ៍ សូ​ឡេ​ម៉ានី ធ្វើ​ផែនការ​យ៉ាងសកម្ម​ដើម្បី​វាយប្រហារ​អ្នក​ការទូត​និង​ទាហាន​អាម៉េរិក​នៅ​អ៊ីរ៉ាក់​និង​នៅ​ទូទាំង​តំបន់​នោះ​។​​ឧត្តមសេនីយ៍ សូ​ឡេ​ម៉ានី​​និង​កងកម្លាំ​ហគូត (Quds Force)​របស់គាត់​ទទួលខុសត្រូវ​ចំពោះ​ការស្លាប់​ទាហាន​អាម៉េរិក​និង​ទាហាន​មក​ពី​ក្រុមចម្រុះ​ជាតិ​សាសន៍​​រាប់ពាន់នាក់ និង​បង្ក​របួសស្នាម​រាប់ពាន់​នាក់​ទៀត​»​។​

​តាម​ការបញ្ជា​ពី​ប្រធានាធិបតី យោធា​អាម៉េរិក​បាន​ចាត់វិធានការ​ដាច់ខាត​ដើម្បី​ការពារ​បុគ្គលិក​យោធា​អាម៉េរិក​នៅ​បរទេស ដោយ​សម្លាប់ កា​សេម សូ​ឡេ​ម៉ានី​ ដែល​ជា​ប្រមុខ​កងកម្លាំង​គូត​របស់​កង​ឆ្មាំ​បដិវត្តន៍​អ៊ីរ៉ង់ ជា​អង្គការ​ភេរវកម្ម​មួយ​ដែល​អាម៉េរិក​ដាក់​ក្នុង​បញ្ជីខ្មៅ​។​

​ឧត្តមសេនីយ៍ កា​សេម សូ​ឡេ​ម៉ានី ជា​បុគ្គល​មាន​ប្រជាប្រិយភាព​បំផុត​ម្នាក់​នៅ​អ៊ីរ៉ង់ និង​ជា​សត្រូវ​ស្លាប់រ​ស់ម្នាក់​ចំពោះ​អាម៉េរិក​និង​សម្ពន្ធមិត្ត​។​បុរស​នេះ​បង្ហាញ​​ឥទ្ធិពល​តំបន់​ជា​សាធារណៈ​ចាប់តាំងពី​ឆ្នាំ​២០១៨ នៅពេល​គេ​ឯង​ដឹង​ថា​គាត់​បាន​ចូល​ពាក់ព័ន្ធ​ដោយផ្ទាល់​នៅក្នុង​កិច្ចពិភាក្សា​បង្កើត​រដ្ឋាភិបាល​អ៊ីរ៉ាក់​។​

​សូមបញ្ជាក់​ថា មុន​ការស្លាប់​របស់​គាត់​មួយថ្ងៃ ឧត្តមសេនីយ៍រូប​នេះបាន​ប្រកាសថា រដ្ឋាភិបាល​ក្រុងតេអេ​រ៉ង់​មិន​ខ្លាច​ការ​គំរាមរ​បស់​ប្រធានាធិបតី​ត្រាំ ក្រោយ​​ស្ថានទូត​អាម៉េរិក​នៅ​ក្រុង​បា​ដា​តរង​ការឡោមព័ទ្ធ​ពី​ពួក​ជីវពល​គាំទ្រ​អ៊ីរ៉ង់​។​

​លោក​ត្រាំ​បាន​ព្រមាន​អ៊ីរ៉ង់​ថា​នឹង​សង​នូវ​តម្លៃ​ដ៏​ធំ​មួយ បើសិនជា​អាយុជីវិត​ពលរដ្ឋ​និង​ទ្រព្យសម្បត្តិ​អាម៉េរិក​នៅក្នុង​តំបន់​រង​ការវាយប្រហារ តែ​កា​សេម សូ​ឡេ​ម៉ានី បាន​តប​ភ្លាម​ថា​« យើង​មិន​នាំ​ប្រទេស​ចូល​ភ្នក់ភ្លើងសង្គ្រាម​ទេ តែ​យើង​ក៏​មិន​ខ្លាច​សង្គ្រាម​ណាមួយ​ដែរ​។​យើង​សូម​ឲ្យអាម៉េរិក​និយាយ​ឲ្យបាន​​ត្រឹមត្រូវ​ជា​មួយ​ប្រជាជាតិ​អ៊ីរ៉ង់​»​។​

​កាលពី​ថ្ងៃ​អង្គារ យុទ្ធជន​ជីវពល​ស៊ី​អាយ​គាំទ្រ​អ៊ីរ៉ង់​ប្រមាណ​៦.០០០​នាក់​បាន​សម្រុកចូល​ស្ថានទូត​អាម៉េរិក​នៅ​ក្រុង​បា​ដា​ត ដោយ​ដុត​បំផ្លាញ និង​ស្រែក​«​ស្លាប់ទៅ​​អាម៉េរិក​!» ដើម្បី​ជា​ការ​សងសឹក​ការវាយប្រហារ​របស់​អាម៉េរិ​ក​ដែល​បាន​សម្លាប់យុទ្ធ​មិត្ត​របស់គេ​២៥​នាក់​។​

​ក្នុងពេល​ជាមួយគ្នា មេទ័ព​អ៊ីរ៉ង់​​លោក ឧត្តមសេនីយ៍ អាប់​ដុល​រ៉ា​ហ៊ីម មូ​សាវី កាលពី​ថ្ងៃ​០២​មករា​បាន​និយាយ​ថា​​កងកម្លាំង​របស់​លោក​ត្រៀម​ខ្លួន​រួច​ហើយ​ដើម្បី​​ប្រឈម​មុខ​ជាមួយ​សត្រូវ​៕​ប្រែ​សម្រួល​៖​វាសនា​/Ha

ទីតាំងផ្សាយពាណិជ្ជកម្ម

- Advertisment -

Most Popular