ដោយៈមុនីរ័ត្ន,បូព៌ព្រឹក្ស/ភ្នំពេញៈគិតត្រឹមម៉ោង៥ព្រឹក ថ្ងៃទី៤ខែមករា ឆ្នាំ២០២០នេះ ក្រុមសមត្ថកិច្ចចម្រុះបានជួយសង្គ្រោះជនរងគ្រោះ២៣នាក់ចេញពីគំនរថ្ម ក្នុងនោះមានប្រាំនាក់បានស្លាប់ (ប្រុស២ ស្រី៣) ។អគារកម្ពស់៦ជាន់ ដែលរលំបាក់ ស្ថិតនៅក្បែរវត្តសមាធិ ក្នុងក្រុងកែប ខេត្តកែប។នេះបើយោងតាមសេចក្តីប្រកាសព័ត៌មានរបស់អ្នកនាំពាក្យរដ្ឋបាលខេត្តកែបផ្សព្វផ្សាយ។
ព្រឹកនេះប្រតិបត្តិការជួយសង្គ្រោះកំពុងតែបន្ត។អគារនេះបានបាក់រលំ នៅវេលាម៉ោង ៤:១៥ រសៀល នាថ្ងៃទី៣ ខែមករា។ជាអគារមួយដែលកំពុងដំណើរការសាងសង់កម្ពស់៦ជាន់ មានទីតាំងស្ថិតនៅផ្លូវឡើងវត្តសមាធិ ភូមិកែប សង្កាត់កែប ក្រុងកែប ខេត្តកែប។មានការបញ្ជាក់ថា មានមនុស្សប្រមាណ៤០នាក់កំពុងធ្វើការនៅក្នុងការដ្ឋានសំណង់មួយនេះ។
យោងតាមប្រភពបញ្ជាក់ថា ម្ចាស់សំណង់នោះឈ្មោះ ឯក សារុន (ប្តី) និង ឈីវ សុធី (ប្រពន្ធ) មានលំនៅបច្ចុប្បន្នភូមិ ១ សង្កាត់៣ ក្រុងព្រះសីហនុ។សំណង់នេះមានសំណើចុះថ្ងៃ ០៦-៣-២០១៩។ មកដល់ច្រកចេញចូលសាលាខេត្ត លេខ ១៧៩/១៩ ចុះថ្ងៃ ១៦-៧-២០១៩។ មន្ទីរ ដនសស ខេត្តកែប លេខ ០០៩ ដនសស/ក.សុដី ចុះថ្ងៃ ០៣-៧-២០១៩។ ខេត្តសម្រេច លេខ ៤២៧/១៩ បជ ចុះថ្ងៃ ០២-៨-២០១៩។បើកការដ្ឋាន ០២៣/ដនសស-ខក ចុះថ្ងៃ២០-៨-២០១៩។ថ្ងៃទី ៥-១២-២០១៩ មន្ទីរបានចុះពិនិត្យ បានសន្និដ្ឋានថា សំណង់សង់ខុសពីលិខិតអនុញ្ញាត។ សំណង់នេះ ក្រោម៣០០០ម៉ែត្រការ៉េ រដ្ឋបាលខេត្តកែប សម្រេចក្នុងដែនសមត្ថកិច្ចរបស់ខ្លួន ។
ក្រសួងរៀបចំដែនដីនគរូបនីយកម្មនិងសំណង់ក៏បានបង្កើតគណៈកម្មការមួយដើម្បីធ្វើការស្រាវជ្រាវលើករណីនេះផងដែរ៕សរន/Ha
