ក្រុមរដ្ឋអាជ្ញាបាននិយាយថា ប៉ូលិសបារាំងបានបាញ់សម្លាប់បុរសម្នាក់នៅក្បែរទីក្រុងប៉ារីស ប្រទេសបារាំងកាលពីថ្ងៃសុក្រទី៣ខែមករា បន្ទាប់ពីជននេះបានប្រើកាំបិតចាក់មនុស្សនៅក្នុងឧទ្យានមួយ ដោយបានសម្លាប់មនុស្សម្នាក់និង២នាក់ទៀតរងរបួស។
អ្នកនាំពាក្យរដ្ឋអាជ្ញាបាននិយាយថា ឯកសារសាសនាមួយចំនួនដោយរួមទាំងច្បាប់ចម្លងគម្ពីគូអាន ត្រូវបានរកឃើញក្នុងចំណោមរបស់របររបស់បុរសនេះ ប៉ុន្តែមិនមានភស្តុតាងណាដែលថាបុរសនេះរងឥទ្ធិពលពីក្រុមអ៊ីស្លាមនិយមនោះទេ។
អ្នកនាំពាក្យនេះបាននិយាយថា អ្នកវាយប្រហារនេះមានប្រវត្តិមានជំងឺផ្លូវចិត្តហើយត្រូវបានគេបញ្ជូនទៅមន្ទីរពេទ្យកាលពីប៉ុន្មានខែមុន និងបានទទួលការព្យាបាលជំងឺផ្លូវចិត្ត។
ការវាយប្រហារនេះបានកើតឡើងនៅទីប្រជុំជនហ្ស៊ីលឡឺហ្ស៊ី ចម្ងាយប្រមាណ៨ គីឡូម៉ែត្រពីភាគខាងត្បូងនៃទីក្រុងប៉ារីស៕ដោយ៖វាសនា
ប៉ូលិសទៅដល់ឧទ្យាននៅទីប្រជុំជនហ្ស៊ីលឡឺហ្ស៊ី ក្រោយការបាញ់សម្លាប់ខ្មាន់កាំបិត