ព្រឹត្តិការណ៍​ប្រណាំង​កង់​នឹង​នាំ​អ្នកវិនិយោគ​និង​ទេសចរណ៍​ឱ្យមក​លេង​តំបន់ឆ្នេរ​កាន់តែច្រើន​

457
ចែករម្លែក

ដោយៈមូល​សម្បត្តិ​/​ភ្នំពេញ​៖​លោក​ថោង​ខុន​ជឿជាក់ថា​ព្រឹត្តិការណ៍​ប្រណាំង​កង់​ពិភពលោក​នឹង​បង្កើន​ការទាក់ទាញ​ទេសចរ និង​អ្នកវិនិយោគ​ឱ្យមក​កាន់​តំបន់ឆ្នេរ​សមុទ្រ​កម្ពុជា​ថែមទៀត​។​

​លោក​រដ្ឋមន្ត្រី​ក្រសួងទេសចរណ៍​បានបង្ហាញ​សុទិដ្ឋិនិយម​ថា​តាមរយៈ​ព្រឹត្តិការណ៍​ប្រណាំង​កង់​ពិភពលោក​លើក​ទី​១​ឆ្នាំ​២០២០​ដែល​កំពុង​ប្រព្រឹត្តទៅ​ចាប់ពី​ថ្ងៃទី​៤=៦​ខែមករា​ឆ្នាំ​២០២០​នេះ​នឹង​ជួយ​បង្កើន​ការផ្សព្វផ្សាយ​ពី​ផលិតផល​ទេសចរណ៍​សក្ដានុពល​ទេសចរណ៍​ក៏ដូចជា​បង្កើន​ភាព​ទាក់ទាញ​ភ្ញៀវ​ទេសចរណ៍​និង​អ្នកវិនិយោគ​មកកាន់​តំបន់ឆ្នេរ​សមុទ្រ​កម្ពុជា​កាន់តែច្រើន​ខណៈ​តំបន់ឆ្នេរ​សមុទ្រ​កម្ពុជា​ក៏​កំពុងមាន​ការអភិវឌ្ឍ​ន៍​ប្រកបដោយ​ការទទួលខុសត្រូវ​។​

​លោក​ថ្លែង​បែបនេះ​ត្រូវបាន​ធ្វើឡើង​ក្នុង​សន្និសីទ​សារព័ត៌មាន​ស្ដីពី​ព្រឹត្តិការណ៍​ប្រណាំង​កង់​ពិភពលោក​លើក​ទី​១ ឆ្នាំ​២០២០ នៅ​តំបន់​វិស្សមកាល​តារា​សាគរ ខេត្តកោះកុង​កាលពី​រសៀល​ថ្ងៃទី​៣ ខែមករា​នេះ​។​គោលបំណង​និង​អត្ថប្រយោជន៍​មួយចំនួន​ដែល​កម្ពុជា​រំពឹង​ទទួលបាន​តាមរយៈ​ការរៀបចំ​ព្រឹត្តិការណ៍​កីឡា​ទេសចរណ៍​ដ៏​ធំ​លំដាប់ថ្នាក់​ពិភពលោក​មួយ​នេះ ក្នុងនោះ​រួមមាន​៖

*​គោលបំណង​ទី​១៖​ដោយ​ផ្ដើមចេញពី​នយោបាយ​ឈ្នះ​-​ឈ្នះ​របស់​សម្ដេច​តេ​ជោ​ហ៊ុនសែន​នាយករដ្ឋមន្ត្រី​នៃ​កម្ពុជា​ដែល​បានធ្វើឱ្យ​ប្រទេស​កម្ពុ​ជាមាន​សុខសន្តិភាព​ស្ថិរភាព​នយោបាយ​និង​មានការ​រីកចម្រើន​លើ​គ្រប់​វិស័យ​។​ក្នុងនោះ​វិស័យ​ទេសចរណ៍​ក៏បាន​ក្លាយជា​សសរទ្រូង​មួយ​ដ៏​ចម្បង​នៃ​ខឿនសេដ្ឋកិច្ច​កម្ពុជា​។


​បច្ចុប្បន្ន​តំបន់ឆ្នេរ​សមុទ្រ​កម្ពុជា​បានក្លាយ​ជា​តំបន់​ទេសចរណ៍​ដ៏​មាន​សក្ដានុពល​និង​មាន​ភាព​ទាក់ទាញ​សម្រាប់​ការវិនិយោគ​លើ​វិស័យ​ទេសចរណ៍​និង​សម្រាប់​ភ្ញៀវទេសចរ​សម្រាក​កម្សាន្ត​ដែល​ពោរពេញ​ទៅដោយ​ផលិតផល​ទេសចរណ៍​ដ៏​សម្បូរបែប​។​ពិសេស​ឆ្នេរ​ខ្សាច់​កោះ​ធនធាន​ក្រោម​សមុទ្រ តំបន់​អេកូ​ទេសចរណ៍​និង​តំបន់​វប្បធម៌​-​បេតិកភណ្ឌ​ជាដើម​។​ការរៀបចំ​ព្រឹត្តិការណ៍​កីឡា​ប្រណាំង​កង់​ពិភពលោក​នេះ​ក៏​នឹងចូលរួម​បង្ហាញ​ពី​ការរីកចម្រើន​របស់​ក​ម្ពុ​ជា​ដែលជា​សមិទ្ធផល​នៃ​សន្តិភាព​ផងដែរ​»​។​

*​គោលបំណង​ទី​២៖​ដើម្បី​បង្កើន​ការផ្សព្វផ្សាយ​ពី​ផលិតផល​ទេសចរណ៍ សក្ដានុពល​ទេសចរណ៍ ក៏ដូចជា​បង្កើន​ភាព​ទាក់ទាញ​ភ្ញៀវទេសចរ​និង​អ្នកវិនិយោគ​មកកាន់​តំបន់ឆ្នេរ​សមុទ្រ​កម្ពុជា​កាន់តែច្រើន​។​ព្រឹត្តិការណ៍​នេះ​ក៏​អាច​នឹង​ក្លាយជា​យន្តការ​ដ៏​មាន​ប្រសិទ្ធភាព​ប្រកបដោយ​ភាព​ច្នៃប្រឌិត​ស្រប​នឹង​ទីផ្សារ​បែប​ទំនើប​នាពេល​បច្ចុប្បន្ន​។​

*​គោលបំណង​ទី​៣៖​គឺ​ដើម្បី​បណ្ដុះបណ្ដាល​ធនធានមនុស្ស​ក៏ដូចជា​ជួយ​ពង្រឹងសមត្ថភាព​ដល់​ស​ហ​ព័ន្ធ​ទោចក្រយាន​កម្ពុជា​ក្នុងការ​ត្រៀមខ្លួន​ធ្វើជា​ម្ចាស់ផ្ទះ​រៀបចំ​ព្រឹត្តិការណ៍​កីឡា​ស៊ី​ហ្គេម​នា​ឆ្នាំ​២០២៣​និង​សម្រាប់​សម្រាប់​ព្រឹត្តិការណ៍​នានា​នៅ​ថ្ងៃ​អនាគត​ផងដែរ​។​លោក​ក៏បានផ្ដល់​ជា​អនុសាសន៍​សម្រាប់​សហព័ន្ធ​ទោចក្រយាន​កម្ពុជា​ផងដែរ​ថា​នេះ​ជា​ឱកាស​មួយ​ដ៏​ល្អ​សម្រាប់​សហព័ន្ធ​ទោចក្រយាន​កម្ពុជា​ត្រូវ​ចាប់យក​បទពិសោធន៍​ដ៏​ល្អ​។​

​ព្រោះ​ការរៀបចំ​គឺមាន​កិច្ចសហការ​ល្អ​ពី​សហព័ន្ធ​ប្រណាំង​កង់​អន្តរជាតិ​ហើយក៏​មានការ​ចូលរួម​ត្រួតពិនិត្យ​ពី​លោក​វ៉ែន​ណេ​ហ្វូ​ម៉ា​រី​អូ​(WaynePomari)​ប្រធាន​ស្នងការ​គ្រប់គ្រង​ព្រឹត្តិការណ៍​ប្រណាំង​កង់​ពិភពលោក​ជាមួយ​លោក​ប្រ៊ុ​យ​ណូ​ប៊ូ​ដា​ដ​(BrunoBodard)​អគ្គនាយក​ក្លិប​ឆ្នេរ​ស្អាត​ជាងគេ​បំផុត​លើ​ពិភពលោក​ផងដែរ​។​នា​ថ្ងៃទី​៤​ខែមករា​នេះ​ក្បួន​ប្រណាំង​កង់​ពិភពលោក​នឹង​ចេញដំណើរ​ពី​រមណីយដ្ឋាន​តារា​សាគរ​ឆ្ពោះទៅ​ក្រុង​ខេមរភូមិន្ទ​(​ទី​រួម​ខេត្តកោះកុង​)​ដែលមាន​ចម្ងាយ​សរុប​ប្រមាណ​១៥៣.៥​គីឡូម៉ែត្រ​៕S/​