ក្មេងប្រុសអាយុទើបជាងមួយខួប ជាកូនរបស់ភ្នាក់ងារពន្លត់អគ្គិភ័យស្ម័គ្រចិត្តម្នាក់ ដែលបាន បាត់បង់ជីវិតគួរឱ្យសោកស្ដាបក្នុងបេសកកម្មពន្លត់ភ្លើងឆេះព្រៃនៅប្រទេសអូស្ត្រាលី បាន ទទួលមេដាយកិត្តិយសដ៏ខ្ពង់ខ្ពស់បំផុតជំនួសឪពុករបស់ខ្លួនក្នុងពិធីបុណ្យសពដ៏រំជួលចិត្តកាលពីថ្ងៃព្រហស្បតិ៍ ទី២ ខែមករា។
កុមារា ហាវី ឃីថុន (Harvey Keaton) ដែលមានអាយុទើបតែ ១៩ខែឈរយ៉ាងស្ងៀមស្ងាត់ ដោយទឹកមុខស្រពាប់ស្រពោន នៅពេលប្រធានទីភ្នាក់ងារពន្លត់អគ្គិភ័យបំពាក់មេដាយ កិត្តិយសសម្រាប់ភាពអង់អាចក្លាហាន និងការបំពេញបេសកកម្មរបស់ឪពុកខ្លួន។
សូមបញ្ជាក់ថា លោក ចូហ្វហ្វ្រី ឃីថុន (Geoffrey Keaton) វ័យ ៣២ឆ្នាំដែលជាឪពុករបស់ ក្មេងនេះ គឺជាភ្នាក់ងារម្នាក់ក្នុងចំណោមភ្នាក់ងារពន្លត់អគ្គិភ័យស្ម័គ្រចិត្ត ៣នាក់ដែលបាន បាត់បង់ជីវិតក្នុងបេសកកម្មពន្លត់ភ្លើងឆេះព្រៃក្នុងរយៈពេលប៉ុន្មានសប្ដាហ៍ចុងក្រោយនេះ។
លោក ចូហ្វហ្វ្រី ឃីថុន និងមិត្តរួមការងារម្នាក់បានបាត់បង់ជីវិតគួរឱ្យសោកស្ដាយកាលពីខែមុន នៅពេលដើមឈើមួយដើមដែលត្រូវភ្លើងឆេះបានរលំសង្កត់លើរថយន្តពន្លត់អគ្គិភ័យរបស់ពួកគេ ចំណែកឯភ្នាក់ងារម្នាក់ទៀតបានបាត់បង់ជីវិតនៅសប្ដាហ៍នេះ៕ ប្រែសម្រួលៈ ខុម
