ដោយ៖តារារិទ្ធ(ភ្នំពេញ)៖សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជាបានប្រកាសឧបត្ថម្ភថវិកាជួយដល់គ្រួសារជនរងគ្រោះនិងអ្នករងរបួសនៅក្នុងករណី បាក់រលំអគារនៅខេត្តកែបដោយសពជនរងគ្រោះម្នាក់ៗទទួលបាន៥ម៉ឺនដុល្លារនិងបន្ថែម ១០ លានរៀលទៀតសម្រាប់ពិធីបុណ្យសពខណៈដែលអ្នករងរបួសម្នាក់ៗទទួលបានថវិកា១ម៉ឺនដុល្លារ។
ការប្រកាសនេះធ្វើឡើងនាព្រឹកថ្ងៃទី ០៤ ខែមករា សម្ដេចតេជោ ហ៊ុន សែនបានប្រកាសបែបនេះនៅក្នុងហ្វេសបុកផ្លូវការរបស់សម្តេចថា៖«ដើម្បីសម្រាលនៅការ លំបាកសម្រាប់ជនរងគ្រោះទាំងអ្នករបួសនិងគ្រួសារអ្នកដែលបានស្លាប់ខ្ញុំសម្រេចជួយឧបត្ថម្ភអ្នករបួសក្នុងម្នាក់ ៤០លានរៀលស្មើនឹង១ម៉ឺនដុល្លារ ។សម្រាប់អ្នក ស្លាប់សាកសពមួយថវិកាចំនួន ២០០ លានរៀលស្មើនឹង ៥ ម៉ឺនដុល្លារនិងបន្ថែម ១០លានរៀលសម្រាប់បុណ្យសពនិមួយៗ ។ ថវិការដ្ឋនិងថវិកាសប្បុរសជន ត្រូវបានប្រើប្រាស់សម្រាប់ការងារនេះ ។ ជំនួយការខ្ញុំលោក សេង ទៀង នឹងយកថវិកាទៅដល់ផ្ទះនៃគ្រួសារសព»។
គួរជម្រាបថាគិតត្រឹមព្រឹកថ្ងៃនេះជនរងគ្រោះ ២៥ នាក់ត្រូវបានរកឃើញក្នុងនោះស្លាប់ ៧ នាក់ខណៈក្រុមការងារសង្គ្រោះកំពុងបន្តប្រតិបត្តិការគាស់រំលើងផ្ទាំង បេតុងកាត់សសៃដែករុករកជនរងគ្រោះបន្តទៀត ៕