ខ្សែការពារ ដេវីដ ល្វីស (David Luiz) បានគាំទ្រគ្រូបង្វឹកថ្មីលោក មីគែល អាតេតា (Mikel Arteta) ថា ជាគ្រូបង្វឹកដ៏ស័ក្តិសមសម្រាប់ការងារនេះ បន្ទាប់ពីលោកបានដឹកនាំក្រុម អាសេណល(Arsenal)ឈ្នះជាលើកដំបូង ប៉ុន្តែសារភាពថា ត្រូវការពេលវេលាបន្ថែមទៀត ដើម្បីធ្វើឲ្យអ្វីៗប្រសើរឡើង។
លោក អាតេតា បានដឹកនាំក្រុមរបស់លោកឈ្នះ ២-០ លើក្រុមម៉េនឆេស្ទ័រយូណាយធីតកាល ពីយប់ថ្ងៃពុធ និងជាជ័យជម្នះលើកដំបូងនៅពហុកីឡាដ្ឋាន Emirates Stadium ចាប់តាំង ពីដើមខែតុលាមក។
កីឡាករ នីកូឡាស ប៉េប៉េ (Nicolas Pepe) និង សូក្រាទីស (Sokratis) រកបានគ្រាប់បាល់ឈ្នះ សម្រាប់ក្រុមម្ចាស់ផ្ទះនៅតង់ទៅមួយ ស្របពេលខ្សែការពារ ល្វីស បង្ហាញទម្រង់លេងដ៏ល្អ របស់ខ្លួន។
ល្វីស បាននិយាយថា “វាពិតជាអស្ចារ្យមែនទែន។ យើងត្រូវតែមានការអត់ធ្មត់និងទទួលស្គាល់ ថា យើងមិនបានត្រៀមខ្លួនគ្រប់គ្រាន់នៅឡើយ។ ក្រុមស្ថិតក្នុងដំណាក់កាលផ្លាស់ប្តូរច្រើន។ យើងនឹងធ្វើរឿងល្អនាពេលអនាគត ប៉ុន្តែមួយជំហានម្តងមួយជំហានម្តង”។
ល្វីស បានសារភាពថា ខ្លួនជឿថា លោក អាតេតា អតីតជំនួយការគ្រូបង្វឹកក្លិបម៉េនឆេស្ទ័រ ស៊ីធី គឺជាគ្រូបង្វឹកដ៏ស័ក្តិសមនឹងការងារនៅពហុកីឡដ្ឋាន Emirates ។
ល្វីស បានបន្តថា “ ខ្ញុំគិតថា មីគែល គឺជាគ្រូបង្វឹកដ៏អស្ចារ្យ។ គាត់ស្គាល់ច្បាស់ពីបាល់ទាត់។ គាត់អាចកែលម្អគ្រប់កីឡាករទាំងអស់”៕ ប្រែសម្រួល: ពិសិដ្ឋ
