Home ព័ត៌មានអន្តរជាតិ ឥណ្ឌូនេស៊ី​បង...

ឥណ្ឌូនេស៊ី​បង្កើន​ការ​ល្បាត ដោយសារ​មាន​ជម្លោះ​ដែនទឹក​ជាមួយ​ចិន​

​ឥណ្ឌូនេស៊ី កំពុង​បង្កើន​ការ​ល្បាត​ក្នុង​សមុទ្រ​និង​ពី​អាកាស​នៅ​បណ្តា​កោះ​នៅ​ជិត​សមុទ្រ​ចិន​ខាងត្បូង ក្រោយពី​មាន​ជម្លោះ​ការទូត​មួយ​អំពី​ការបើក​នាវា​និង​​ទូក​នេសាទ​ចិន​ចូលក្នុង​អ្វី​ដែល​រដ្ឋាភិបាល​ក្រុង​ហ្សា​ការតា​អះអាងថា​ជា​តំបន់សេដ្ឋកិច្ចផ្តាច់មុ​ខ​របស់ខ្លួន​។​

​មន្ត្រី​ឥណ្ឌូនេស៊ី​បាន​និយាយ​កាលពី​ថ្ងៃ​សៅរ៍​ទី​០៤​មករា​ថា យន្តហោះ​យោធា​និង​នាវាចម្បាំង​៣​គ្រឿង​ជាមួយនឹង​ទាហាន​ប្រមាណ​៦០០​នាក់ ត្រូវបាន​បញ្ជូន​ទៅកាន់​​ដែនទឹក​នៅ​ម្តុំ​កោះ ណា​ទូ​ណា ជាប់​ព្រំដែន​សមុទ្រ​ចិន​ខាងត្បូង​។​

​កន្លង​មក​ឥណ្ឌូនេស៊ី បាន​ឃាត់​នាវា​ចិន​នៅក្នុង​ដែនទឹក​សំបូរ​ត្រី​នេះ​។​

​មេបញ្ជាការ​ទ័ពជើងទឹក ឧត្តនា​វី យូ​ដូ ម៉ា​ហ្គោ​ណូ បាន​និយាយ​ក្នុង​សេចក្តីថ្លែងការណ៍​មួយ​ថា «​ការរំលោភ​ដែនទឹក​ដោយ​នាវា​បរទេស​ក្នុង​តំបន់​សេដ្ឋកិច្ច​ផ្តាច់​​មុខ​ឥណ្ឌូនេស៊ី​…​ជាការ​គំរាម​មួយ​ដល់​អធិបតេយ្យភាព​ឥណ្ឌូនេស៊ី​»​។​

​ចំណាត់ការ​របស់​ឥណ្ឌូនេស៊ី​បាន​កើតឡើង ក្រោយ​ពី​ឥណ្ឌូនេស៊ី​បាន​កោះហៅ​ឯកអគ្គរដ្ឋទូត​ចិន​នៅ​សប្តាហ៍​នេះ មក​ស្តាប់​ការតវ៉ា​ប្រឆាំង​ការ​ដែល​នាវា​ឆ្មាំ​សមុទ្រ​​ចិន​មួយ​បើក​អម​ការពារ​ទូ​កនេ​សាទ​ចិន​ជាច្រើន នៅ​ម្តុំ​កោះ​ណា​ទូ​ណា​កាលពី​ពាក់កណ្តាល​ខែ​ធ្នូ​។​

​រដ្ឋាភិបាល​ក្រុង​ប៉េកាំ​បាន​តប​វិញ​ថា ខ្លួន​មាន​«​សិទ្ធិ​ប្រវត្តិសាស្ត្រ​»​នៅក្នុង​តំបន់​នោះ និង​ថា​បណ្តា​ទូក​នេសាទ​ទាំងនោះ​ធ្វើការ​នេសាទ​ដោយ​«​ស្របច្បាប់​និង​សម​​ហេតុផល​»​។​

​សូមបញ្ជាក់​ថា ចិន​អះអាង​កម្មសិទ្ធិ​ធំធេង​នៅ​សមុទ្រ​ចិន​ខាងត្បូង ដោយ​ជាន់​ការអះអាង​ជា​កម្មសិទ្ធិ​ផងដែរ​ពី​វៀតណាម ហ្វីលីពីន ម៉ាឡេស៊ី ព្រុយ​ណេ និង​កោះ​​តៃវ៉ាន់​។​

​ឥណ្ឌូនេស៊ី មិន​អះអាង​កម្មសិទ្ធិ​ជាន់​ជាមួយ​ចិន​នៅ​សមុទ្រ​ចិន​ខាងត្បូង​ទេ តែ​ថា​ខ្លួន​នឹង​មិន​អត់ឱន​ចំពោះ​ការទន្ទ្រាន​ចូល​របស់​ចិន​ទេ ដោយ​អ្នកនាំពាក្យ​ប្រធា​​នា​ធិបតី បាន​និយាយ​កាលពី​ថ្ងៃ​សៅរ៍ ថា​«​មិន​មាន​ការសម្របសម្រួល​ទេ អំពី​អធិបតេយ្យភាព​របស់​ឥណ្ឌូនេស៊ី​»៕​ប្រែ​សម្រួល​៖​វាសនា​

ឥណ្ឌូនេស៊ី​បង្កើន​ការ​ល្បាត​លើទឹក​និង​ពី​អាកាស នៅ​ម្តុំ​កោះ​ណា​ទូ​ណា ជិត​សមុទ្រ​ចិន​ខាងត្បូង​

ទីតាំងផ្សាយពាណិជ្ជកម្ម

- Advertisment -

Most Popular