ដោយច័ន្ទគារ/សៀមរាប៖សិស្សានុសិស្សនៃវិទ្យាល័យ១០មករា១៩៧៩ ស្ថិតនៅក្នុងក្រុងសៀមរាប ខេត្តសៀមរាបត្រូវបានមជ្ឈមណ្ឌលព្រះពុទ្ធសាសនាអប់រំយុវជនរៀបចំបើកវគ្គអប់រំសីលធម៌បណ្តុះបណ្តាលគុណធម៌និងនាទីផ្កាឈូកកតញ្ញូ។
ពិធីនេះធ្វើឡើងក្រោមវត្តមានចូលរួមបើកដោយឧត្តមសេនីយ៍ទោបណ្ឌិតខេងរ៉ាមេបញ្ជាការរងនគរបាលជាតិប្រចាំទិសភូមិភាគទី៤និងលោកស្រីអ៊ុករីតា។តំណាងនាយឧត្តមសេនីយ៍ខេងសុមេធអគ្គស្នងការរងនគរបាលជាតិនិងជាមេបញ្ជាការនគរបាលជាតិប្រចាំទិសភូមិភាគទី៤និងទី៥ដែលធ្វើឡើងនៅក្នុងវត្តរាជបូព៌នាព្រឹកថ្ងៃទី៤ ខែមករា ឆ្នាំ២០២០។
បើតាមគម្រោងអប់រំសីលធម៌បណ្តុះបណ្តាលគុណធម៌និងនាទីផ្កាឈូកកតញ្ញូខាងលើនេះគឺធ្វើឡើងរយៈពេល៣ថ្ងៃចាប់ពីថ្ងៃទី៤ដល់ថ្ងៃទី០៦ខែមករាឆ្នាំ២០២០ដែលគម្រោងនេះធ្វើឡើងលើកទី៧៧ដែលរៀបចំឡើងដោយមជ្ឈមណ្ឌលព្រះពុទ្ធសាសនាអប់រំយុវជន។គម្រោងនេះដែរគឺមានគោលបំណងឱ្យសិស្សានុសិស្សដែលជាយុវជនបានចូលសិក្សានិងប្រតិបត្តិតាមគន្លងព្រះពុទ្ធសាសនា។ជាពិសេសឱ្យស្គាល់ពីគុណតម្លៃនិងសេចក្តីសំខាន់របស់ព្រះពុទ្ធសាសនា។
ឧត្តមសេនីយ៍ទោបណ្ឌិត ខេង រ៉ា បានមានប្រសាសន៍ថា គម្រោងនេះពិតជាមានសារសំខាន់ ព្រោះថាធ្វើឱ្យក្មេងៗជំនាន់ក្រោយបានយល់ដឹងអំពីសង្គមកម្ពុជានាពេលបច្ចុប្បន្នជាពិសេសស្គាល់ពីតម្លៃពិតប្រាកដនៃព្រះពុទ្ធសាសនា ដែលកំពុងរីកលូតលាស់យ៉ាងខ្លាំងក្លាថែមទៀតផង។
ឧត្តមសេនីយ៍ទោខេងរ៉ាបានបញ្ជាក់ជូនប្អូនៗសិស្សានុសិស្សថាក្រៅពីការសិក្សារបស់ប្អូនៗនៅឯសាលា ដែលជាការយល់ដឹងចំណេះទូទៅយុវជនគ្រប់រូបក៏ត្រូវបានយល់ដឹងបន្ថែមដែលជាចាំបាច់បំផុត ចំពោះវិស័យព្រះពុទ្ធសាសនានេះឯង។ហេតុដូចនេះហើយទើបរដ្ឋធម្មនុញ្ញនៃព្រះរាជាណាចក្រកម្ពុជា បានកំណត់យ៉ាងច្បាស់ថា ព្រះពុទ្ធសាសនាជាសាសនារបស់រដ្ឋ។
ក្នុងឱកាសប្រកាសបើកវគ្គអប់រំសីលធម៌ បណ្តុះបណ្តាលគុណធម៌ និងនាទីផ្កាឈូកកតញ្ញូនេះដែរ ឧត្តមសេនីយ៍ទោបណ្ឌិត ខេង រ៉ា ក៏បាននាំយកនូវថវិការបស់នាយឧត្តមសេនីយ៍ ខេង សុមេធ និងភរិយាចំនួន៤លានរៀលទៅឧបត្ថម្ភកម្មវិធីរៀបចំ។ថវិកាចំនួន៤០០.០០០រៀលឧបត្ថម្ភក្រុមភ្លេងសាលាបឋមសិក្សាវត្តបូព៌ផងដែរ។បន្ទាប់មកលោកឧត្តមសេនីយ៍ទោខេងរ៉ាប្រកាសបើកវគ្គអប់រំសីលធម៌បណ្តុះបណ្តាលគុណធម៌និងនាទីផ្កាឈូកកតញ្ញូចាប់ពីពេលនេះតទៅ៕S/
រូបភាពៈ ឧត្តមសេនីយ៍ទោបណ្ឌិត ខេង រ៉ា និងលោកស្រី ចូលរួមបើកកម្មវិធីវគ្គអប់រំសីលធម៌ បណ្តុះបណ្តាលគុណធម៌ និងនាទីផ្កាឈូកកតញ្ញូ៕ច័ន្ទគារ
