ដោយៈសាតចាន់បុត្រ/មណ្ឌលគិរីៈក្រុមនិស្សិតសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ចសហការជាមួយក្រុមការងារស.យ.ស.សខេត្តមណ្ឌលគិរីរួមគ្នាសម្អាតអនាម័យបរិស្ថាននៅក្រុងសែនមនោរម្យ។ដើម្បីបំផុសចលនាដល់ប្រជាពលរដ្ឋនិងសាធារណៈជនឱ្យមានការយល់ដឹងនិងចូលរួមសម្អាតអនាម័យបរិស្ថានទាំងអស់គ្នា។
កាលពីព្រឹកថ្ងៃទី៥ខែមករាឆ្នាំ២០២០នេះក្រុមនិស្សិតសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ចសហការជាមួយក្រុមការងារសម្ព័ន្ធយុវជនស្រឡាញ់សន្តិភាពខេត្តមណ្ឌលគិរីសរុបប្រមាណជា១៣០នាក់រួមគ្នាសម្អាតអនាម័យបរិស្ថាននៅលើសួនច្បារ ក្នុងក្រុងសែនមនោរម្យ។
លោក ឡុង វិបុល អភិបាលក្រុងសែនមនោរម្យ និងជាប្រធានកិត្តិយសស.យ.ស.សខេត្តបានឱ្យដឹងថា ក្រុមនិស្សិតសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ចបានចុះមកទស្សនកិច្ចនៅទឹកដីនៃខេត្តមណ្ឌលគិរីរួមទាំងការផ្សារភ្ជាប់នូវកិច្ចការងារសង្គមផងដែរ។លោកអភិបាលក្រុងបញ្ជាក់ថាទោះបីជាការចូលរួមសំអាតអនាម័យបរិស្ថាននាពេលនេះមិនអាចឱ្យសំរាមអស់គ្រប់ទីកន្លែងក៏ដោយ ។តែដើម្បីបំផុសឱ្យសាធារណៈជន រួមគ្នាចូលរួមអនុវត្តឱ្យបានគ្រប់ៗគ្នា ។
លោកបន្ថែមថាអ្នកស្អាតខ្ញុំស្អាតយើងស្អាតទាំងអស់គ្នានិងត្រូវរួមគ្នាសម្អាតអនាម័យបរិស្ថានដើម្បីភូមិស្អាតនិងសុខភាពល្អជាពិសេសក្នុងអត្ថន័យអប់រំបណ្ដុះគំនិតស្រឡាញ់និងពញ្ញាក់ស្មារតីដល់អ្នកចូលរួមទាំងអស់គ្នាក្នុងគោលបំណងបំផុសស្មារតីនិងផ្លាស់ប្ដូរឥរិយាបថប្រជាពលរដ្ឋឲ្យចេះស្រឡាញ់ថែរក្សានិងការសម្អាតអនាម័យបរិស្ថានក្នុងប្រទេសកម្ពុជា។
លោកឡុងវិបុលបានអំពាវនាវដល់ពលរដ្ឋទាំងអស់ត្រូវរួមគ្នាសម្អាតអនាម័យបរិស្ថានព្រោះបរិស្ថានស្អាតផ្តើមចេញពីបុគ្គលម្នាក់ៗក្នុងការចេះទទួលខុសត្រូវរៀបចំទុកដាក់សំរាមនិងសំណល់ដោយមិនចោលពាសវាលពាសកាលតាមទីសាធារណៈ។ជាហេតុធ្វើឱ្យប៉ះពាល់ដល់សោភ័ណ្ឌភាពបរិស្ថានជំរុញការចូលរួមពីសាធារណជនក្នុងការកាត់បន្ថយ និងការបំពុលដោយប្លាស្ទីក៕S/
