ដោយ៖តារារិទ្ធ(ភ្នំពេញ)៖សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសថា នឹងមិនមានមន្ត្រីណាម្នាក់ត្រូវបានដកចេញពីតំណែងនោះទេនៅក្នុងឧបទ្ទវហេតុបាក់រលំអគារកម្ពស់៦ជាន់នៅខេត្តកែប។សម្តេចនាយករដ្ឋមន្ត្រីបន្តថា លោក កែន សត្ថា អភិបាលខេត្តកែបនិងអភិបាលរង មិនជាប់ព័ន្ធនឹងបញ្ហាបាក់អគារឡើយ បើទោះជាករណីបាក់អគារនេះកើតឡើងក្នុងដែនដីរបស់ខ្លួនក៏ដោយ។សម្តេចបន្តថា ការបកស្រាយបែបនេះមិនមែនចង់សម្រាលការទទួលខុសត្រូវ ឬក៏ចង់បិទបាំងភាពខ្សោយរបស់រាជរដ្ឋាភិបាល ឬមន្ត្រីឡើយ តែសម្តេចចង់ឲ្យអ្នករិះគន់ទាំងនោះកុំឲ្យមានភាពជ្រុលនិយមលើបញ្ហាដែលកើតឡើង ហើយចាប់ផ្តើមស្តីបន្ទោសជាមុនដោយខ្វះការស្រាវជ្រាវ ។
សម្តេចតេជោនាយករដ្ឋមន្ត្រីបានលើកឡើងបែបនេះ នៅក្នុងក្នុងសន្និសីទកាសែតនៅម៉ោង១២ ថ្ងៃត្រង់ នាថ្ងៃទី៥ ខែមករា ឆ្នាំ ២០២០ ស្តីពីការបិទបញ្ចប់ការរុករកជនរងគ្រោះក្នុងគំនរអគារ ៦ ជាន់នៅខេត្តកែប ។
សម្តេចនាយករដ្ឋមន្ត្រីហ៊ុន សែន ដែលបានប្រចាំការនៅទីនោះពីដើមរហូតដល់បិទបញ្ចប់ប្រតិបត្តិការរុករកជនរងគ្រោះបានប្រកាសថា៖ លោក កែន សត្ថា អភិបាលខេត្តកែបនិងអភិបាលរង មិនជាប់ព័ន្ធនឹងបញ្ហាបាក់អគារឡើយ បើទោះជាករណីបាក់អគារនេះកើតឡើងក្នុងដែនដីរបស់ខ្លួនក៏ដោយ ។ សម្តេចបញ្ជាក់ដូច្នេះថា៖ «អភិបាលខេត្តកែបនិងមន្ត្រីខេត្តនឹងមិនត្រូវបានដកចេញពីតំណែងទេ»។
ជាមួយគ្នានឹងការមិនដកអភិបាលខេត្ត សម្តេចនាយករដ្ឋមន្ត្រីថែមទាំងព្រមានចាត់ការលើមន្ត្រីរាជរដ្ឋាភិបាល និងអ្នកទាំងឡាយណាដែលផ្ញើសារទៅសម្តេចតាម WhatsApp និងតាម Telegram រួមទាំងបង្ហោះលើហ្វេសប៊ុកដើម្បីជំរុញឲ្យសម្តេចដកអភិបាលខេត្តកែប។ដោយសម្តេចបានលើកឡើងថា អ្នកទាំងនោះដែលគិតតែពីចង់ឲ្យដកអ្នកនោះ ឬ អ្នកនេះចេញពីតំណែង ទាំងដែលសម្តេចយល់ថារឿងសំខាន់បំផុតគឺការជួយសង្គ្រោះអ្នកដែលកំពុងស្ថិតក្នុងគំនរអគារ ។សម្តេចបានព្រមានថា៖ «ខ្ញុំអាចនឹងពិនិត្យលើមន្ត្រីរបស់ខ្ញុំមួយចំនួនដែលរុញច្រានឲ្យខ្ញុំដកអភិបាល…»។
ពាក់ព័ន្ធការដួលរលំបាក់អគារនេះ សម្តេចនាយករដ្ឋមន្ត្រីបានលើកឡើងថា៖ការបាក់អគារមិនមែនកើតឡើងតែនៅកម្ពុជាទេ គឺតាមបណ្តាប្រទេសដទៃលើពិភពលោកក៏មានដែរ។សម្តេចប្រាប់ឲ្យអ្នករិះគន់ទៅមើលព័ត៌មានដើម្បីដឹងថាតើក្នុងឆ្នាំ២០១៩ មានព្រឹត្តិការណ៍បាក់អគារប៉ុន្មានលើពិភពលោក។សម្តេចបានលើកជាឧទាហរណ៍ថា នៅអាម៉េរិកធ្លាប់មានករណីបាក់សណ្ឋាគារ។នៅប្រទេសបារាំងឆេះសារមន្ទីរ Notre-Dame ក្នុងក្រុងប៉ារីស។ សម្តេចចោទជាសំណួរទៀតថា តើគេឲ្យអភិបាលក្រុងប៉ារីសលាលែងទេ ហើយត្រូវឲ្យរដ្ឋមន្ត្រីលាលែងទេ? សម្តេចបានបន្តថា ហេតុអ្វីបានអ្នកទាំងឡាយចូលចិត្តណាស់អារឿងក្តិចត្រួយផ្តួលគ្នា? ។
សម្តេចនាយករដ្ឋមន្ត្រីបន្តថា ការបកស្រាយបែបនេះ មិនមែនចង់សម្រាលការទទួលខុសត្រូវ ឬក៏ចង់បិទបាំងភាពខ្សោយរបស់រដ្ឋាភិបាលឬមន្ត្រីឡើយ តែសម្តេចចង់ឲ្យអ្នករិះគន់ទាំងនោះកុំឲ្យមានភាពជ្រុលនិយមលើបញ្ហាដែលកើតឡើង ហើយចាប់ផ្តើមស្តីបន្ទោសជាមុនដោយខ្វះការស្រាវជ្រាវ ។សម្តេចសង្កត់ធ្ងន់ថា៖ នេះជាចំណុចដែលចង់ដាស់តឿនមនុស្សទាំងឡាយ។ពិតមែនហើយ សម្តេចគ្មានសិទ្ធិបិទមាត់ចំពោះសេរីភាពរបស់អ្នកណាទេ ក៏ប៉ុន្តែយើងមានសិទ្ធិនឹងពន្យល់ត្រឡប់ទៅវិញថាយើងគួរធ្វើអ្វីនៅពេលណា។
សម្តេចនាយករដ្ឋមន្ត្រីក៏បានជម្រាបឲ្យដឹងជាបឋមអំពីមូលហេតុនៃការបាក់រលំអគារនៅខេត្តកែបនេះថា៖ សម្តេចទទួលបានព័ត៌មានបឋមថា ការសាងសង់អគារនេះមានកំហុស២យ៉ាងគឺទី១. កំហុសផ្នែកគូរប្លង់និងទី២.កំហុសផ្នែកចាក់ប្លង់សេ។សម្តេចថ្លែងថា កំហុសទី១.គឺដោយសារតែការសាងសង់ដាក់ដែកតូចជាងកម្រិតបច្ចេកទេសដែលអ្នកគូរប្លង់ផ្តល់ឲ្យ ,ហើយកំហុសទី២គឺបញ្ហាចាក់ប្លង់សេដោយគេត្រូវការរយៈពេលពី ២៧ ទៅ ២៨ ថ្ងៃ ទើបអាចដកក្តារពុម្ពចេញ តែការចាក់ប្លង់សេនៃអគារនេះមិនដល់ ១០ ថ្ងៃផង មេការក៏ដកក្តារពុម្ពចេញដើម្បីទៅចាក់ជាន់ខាងលើទៀត។
សម្តេចតេជោ ហ៊ុន សែន បានចាត់ទុកកំហុសទាំង២នេះថាជាកំហុសរបស់មេការ ។ ប៉ុន្តែមេការនិងកូនរបស់គាត់បានបាត់ជីវិតទៅហើយដោយសារការបាក់អគារនេះ។ ដូចនេះយើងមិនអាចចាប់គាត់ឲ្យមកសងគេទេ ក្រៅតែពីផ្តល់ថវិកាបន្ថែមដល់គ្រួសារ ព្រោះនេះជាសោកនាដកម្មដែលបានកើតឡើង…។ បច្ចុប្បន្នម្ចាស់អគារនេះត្រូវសមត្ថកិច្ចចាប់ខ្លួនហើយ ។ សម្តេចនិយាយថា ចំពោះការប្តឹងទារសំណងរដ្ឋប្បវេណីគឺត្រូវធ្វើទៅតាមច្បាប់ ។ ប៉ុន្តែផ្នែកកោលសវិច័យនឹងបន្ត។
សម្តេចតេជោនាយករដ្ឋមន្ត្រីបានមានប្រសាសន៍ថា ប្រតិបត្តិការរុករកនិងជួយសង្គ្រោះនេះត្រូវបានបិទបញ្ចប់នៅម៉ោង១១:៣៥នាទីព្រឹក ដោយប្រើរយៈពេល៤៣ម៉ោង។ សម្តេចតេជោនាយករដ្ឋមន្ត្រីបានលើកឡើងថា ប្រតិបត្តិការនេះយើងមិនអាចធ្វើដោយទទឹងទិសនោះទេ ពោលគឺពេលណាដែលយើងសង្ស័យថាមានអ្នកនៅរស់គឺយើងត្រូវបញ្ឈប់គ្រឿងចក្រ ហើយត្រូវរកវិធីដើម្បីជួយសង្គ្រោះជីវិតមនុស្ស ។ ម្យ៉ាងវិញទៀតយើងក៏ត្រូវគោរពទៅលើសាកសពផងដែរ យើងមិនអាចឲ្យគ្រឿងចក្រកាយទៅប៉ះពាល់ដល់សាកសពឡើយ ។
សម្តេចតេជោ ហ៊ុន សែន នាយករដ្ឋមន្ត្រីបានថ្លែងអំណរគុណដល់កម្លាំងប្រតិបត្តិការទាំងអស់ មិនថាតែខេត្តកែបទេ គឺមកពីបណ្តាខេត្តនានាផងដែរ។ សម្តេចតេជោនាយករដ្ឋមន្ត្រីក៏បានគោរពថ្លែងនូវអំណរព្រះគុណយ៉ាងខ្ពង់ខ្ពស់បំផុតដល់ព្រះមហាក្សត្រកម្ពុជា និងសម្តេចម៉ែដែលព្រះអង្គទាំងទ្វេតែងតែយកព្រទ័យទុកដាក់អំពីសុខទុក្ខប្រជារាស្ត្រ ហើយព្រះអង្គក៏បានចូលរួមជាព្រះរាជអំណោយថវិកាក្នុងការជួយដល់បងប្អូនជនរងគ្រោះនៅក្នុងឧប្បទ្ទវហេតុដ៏រន្ធត់នេះផងដែរ ។
សម្ដេចតេជោនាយករដ្ឋមន្ត្រីហ៊ុនសែន បានប្រកាសឧបត្ថម្ភថវិកាដែលទទួលបានពីសប្បុរសជនគឺសម្រាប់អ្នកដែលរងរបួសគឺទទួលបាន១ម៉ឺនដុល្លារ។ដោយឡែក ករណីពិសេសនៃការជួយសង្គ្រោះ ៧ នាក់ចុងក្រោយនេះគឺម្នាក់ៗទទួលបាន ២ ម៉ឺនដុល្លារ ។ សម្រាប់គ្រួសារសពជនរងគ្រោះម្នាក់ៗទទួលបាន ៥ ម៉ឺនដុល្លារនិង បន្ថែម ១០ លានរៀលទៀតសម្រាប់ពិធីបុណ្យសព ។
សម្តេចតេជោ ហ៊ុន សែន នាយករដ្ឋមន្ត្រីបានថ្លែងអំណរគុណយ៉ាងជ្រាលជ្រៅដល់ក្រុមការងារនិងអ្នកស្ម័គ្រចិត្តទាំងអស់ដែលបានចូលរួមនៅក្នុងប្រតិបត្តិការ ជួយសង្គ្រោះបន្ទាន់នេះ ព្រមទាំងថ្លែងអំណរគុណយ៉ាងជ្រាលជ្រៅដល់សប្បុរសជនទាំងអស់ដែលបានចូលរួមវិភាគទានថវិកាជួយដល់បងប្អូនជនរងគ្រោះ។
រដ្ឋបាលខេត្តកែបនៅរសៀលថ្ងៃទី៥ ខែមករា ឆ្នាំ២០២០នេះ បានចេញសេចក្តីប្រកាសព័ត៌មានជុំវិញការបិទបញ្ចប់ជាស្ថាពរនៃប្រតិបត្តិការរុករកជនរងគ្រោះនៅក្រោមគំនរបាក់បែកអគាររលំដួលកម្ពស់ ៦ ជាន់នៅខេត្តកែប។ដោយបានរកឃើញអ្នកស្ថិតនៅក្រោមគំនរបាក់បែកនៃអគារនេះមានរហូតដល់៥៩ នាក់ ក្នុងនោះជួយសង្គ្រោះជីវិតបាន ២៣ នាក់និងស្លាប់ ៣៦ នាក់ ។
រដ្ឋបាលខេត្តកែបបានបញ្ជាក់ថា ប្រតិបត្តិការនៃការរុករកជនរងគ្រោះប្រើរយៈពេលជិត២ថ្ងៃ(៤៣ម៉ោង២០នាទី)ចាប់ពីថ្ងៃទី៣ដល់ថ្ងៃទី៥ ខែមករា ឆ្នាំ២០២០ ត្រូវបានបិទបញ្ចប់ជាស្ថាពរត្រឹមវេលាម៉ោង១១៖៣៥ថ្ងៃត្រង់នាថ្ងៃទី៥ខែមករាឆ្នាំ២០២០។ តុល្យការជនរងគ្រោះដែលក្រុមការងារបានជួយសង្គ្រោះយកចេញពីគំនរបាក់បែកនៃអគាររលំមានចំនួនសរុប៥៩នាក់(ស្រី២២នាក់)ក្នុងនោះបាត់បង់ជីវិតចំនួន៣៦នាក់(ស្រី១៤នាក់)។ក្នុងចំណោមជនរងគ្រោះទាំងនេះមានក្មេងចំនួន៦នាក់(ក្មេងស្រី២នាក់)និងរងរបួសចំនួន២៣នាក់(ស្រី៨នាក់)។រដ្ឋបាលខេត្តកែបបានបញ្ជាក់ទៀតថា ចំពោះជនរងគ្រោះបាត់បង់ជីវិតត្រូវបានក្រុមគ្រួសារមកបំពេញឯកសារដើម្បីទទួលយកសពទៅធ្វើបុណ្យតាមប្រពៃណី។
រដ្ឋបាលខេត្តនិងប្រជាពលរដ្ឋទូទាំងខេត្តកែប សូមគោរពថ្លែងអំណរគុណយ៉ាងជ្រាលជ្រៅជាទីបំផុតចំពោះវត្តមានសម្តេចតេជោហ៊ុន សែន នាយករដ្ឋមន្ត្រីនៃកម្ពុជាដែលបានអញ្ជើញចុះត្រួតពិនិត្យដឹកនាំបញ្ជាផ្ទាល់នៅទីតាំងកើតហេតុរយៈពេល២ថ្ងៃ២យប់និងបានឧបត្ថម្ភជាសម្ភារ ថវិកាផងនោះ គឺពិតជាបានបង្ហាញនូវការយកចិត្តទុកដាក់ខ្ពស់ចំពោះសុខទុក្ខរបស់បងប្អូនកម្មករជាជនរងគ្រោះនិងក្រុមគ្រួសារជនរងគ្រោះ ហើយក៏ជាការលើកទឹកចិត្តដ៏ធំធេងដល់បងប្អូនគ្រប់ក្រុមការងារទាំងអស់ដែលចូលរួមក្នុងបេសកកម្មករកជនរងគ្រោះដោយឧបទ្ទវហេតុដ៏សែនអាក្រក់នេះ។
ជាមួយគ្នានេះ រដ្ឋបាលខេត្តកែបក៏សូមគោរពថ្លែងអំណរគុណចំពោះក្រុមការងារជួយសង្គ្រោះទាំងអស់ដែលបានចំណាយពេលវេលាប្រើអស់កម្លាំងកាយកម្លាំងចិត្តក្នុងការជួយសង្គ្រោះជនរងគ្រោះចេញពីគំនរបាក់បែកនៃអគារដួលរលំនេះ៕/Ha
