នេះជាករណីគ្រោះថ្នាក់ចរាចរណ៍ដ៏រន្ធត់ និងកម្របានឃើញរវាងរថយន្ត និងសេះមួយក្បាល ដែលបណ្ដាលឱ្យសេះប៉ើងខ្ទាតគាប់ជាប់ក្នុងកញ្ចក់មុខ។
តាមរយៈរូបភាពវីដេអូទាំងនេះ ខ្លួនសេះទាំងមូលបានគាបជាប់ក្នុងកញ្ចក់មុខ ដោយទម្លាក់តែ កន្ទុយបក់រវិចលើគម្របក្បាលរថយន្ត។ ហេតុការណ៍គ្រោះថ្នាក់ចរាចរណ៍នេះបានកើតឡើង កាលពីពេលថ្មីៗនៅក្រុងក្វេណាបូ (Guaynabo) ប្រទេសពើរូ រីកូ។
ក្រោយបង្ហោះតាមបណ្ដាញអ៊ីនធឺណិត វីដេអូឃ្លីបនេះមានអ្នកចូលទស្សនារូតដល់ទៅជាង ២,២ លានដង ហើយយុទ្ធនាការមួយត្រូវបានផ្តួចផ្ដើមឡើងដើម្បីរៃអង្គាសប្រាក់ជួយព្យាបាល របួសរបស់សេះនេះ។
យោងតាមប្រព័ន្ធផ្សព្វផ្សាយក្នុងស្រុកឱ្យដឹងថា ភ្នាក់ងារសង្គ្រោះបន្ទាន់បានបង្ខំចិត្តកាត់ដំបូល រថយន្តចោលដើម្បីទាញសេះចេញមកក្រៅ។ សេះនេះបានរងរបួសដាច់រយះជាច្រើនកន្លែង ប៉ុន្តែមិនគ្រោះថ្នាក់ដល់អាយុជីវិតទេ។
ទោះជាយ៉ាងណា គ្មានការបញ្ជាក់ពីអ្នកនៅក្នុងរថយន្តទេ ថាតើមានអ្នករបួស ឬក៏អត់។ ហើយ សមត្ថកិច្ចបានបើកការស៊ើបអង្កេតដើម្បីកំណត់ច្បាស់ថា តើករណីនេះកើតឡើងបានដោយ របៀបណា៕ ប្រែសម្រួលៈខុម
